ކާބަފައިން ދޫކޮށްފައިވާ ތާރީޚީ އާސާރުތަކުގެ މުހިންމުކަން ފާހަގަކުރައްވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ މި އާސާރުތަކަކީ ދިވެހިރާއްޖޭގެ މުއްސަނދި އަދި ފަޚުރުވެރި ތާރީޚުގެ ހެކިތަކެއް ކަމަށެވެ.
ފުރަތަމަ ފަހަރަށް ފާހަގަކުރެވުނު ޤައުމީ ތަރިކައިގެ ދުވަހާ ގުޅިގެން ރައީސް ވަނީ ސޯޝަލް މީޑިއާގައި އެމަނިކުފާނުގެ ޚިޔާލުފުޅުތައް ހިއްސާކުރައްވާފައެވެ. އަދި ޤައުމުގެ މިނިވަންކަމުގެ ހެއްކެއްގެ ގޮތުގައި ދެމިގެންދާ ތަރިކައިގެ މުހިންމުކަން ރައީސް ފާހަގަކުރައްވާފައިވެއެވެ.
ޤައުމީ ތަރިކައިގެ ދުވަހާ ގުޅިގެން ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް ވެސް ވަނީ ސޯޝަލް މީޑިއާގޑިއާގައި ހެޔޮއެދުމާއި ތަހުނިޔާ ދިވެހި ރައްޔިތުންނަށް ފޮނުއްވާފައެވެ.
މިއީ ދިވެހިރާއްޖޭގައި ޤައުމީ ތަރިކައިގެ ދުވަސް ފާހަގަކުރި ފުރަތަމަ ފަހަރެވެ. މިގޮތަށް ފާހަގަކުރުމަށް ނިންމާފައިވަނީ 2023 ވަނަ އަހަރުގެ ނޮވެމްބަރު މަހު ކެބިނެޓުންނެވެ. މި ދުވަސް ފާހަގަކުރަން ނިންމާފައިވަނީ ސެޕްޓެމްބަރު 12 ގައެވެ. އެއީ ސަގާފީ ތަރިކައިގެ ޤާނޫނު ވުޖޫދައްއައި ދުވަސް ކަމުގައި ވާތީއެވެ. މި އަހަރުގެ ޝިޢާރަކީ "ތަރިކަ ރައްކާތެރިކުރުން، އުންމީދުގެ ހުޅުކޮޅު އަލުން ދިއްލުން" އެވެ. މި ޝިޢާރުން ދޭހަކޮށްދެނީ ޤައުމުގެ ސަގާފީ ތަރިކަ ރައްކާތެރިކުރުމުގެ މުހިންމުކަމެވެ.
