ޣައްޒާގެ ހަމާސްޖަމާއަތާއެކު އަސީރުން ބަދަލު ކުރުމުގެ އެއްބަސްވުމުގެ މައްސަލާގައި ހިތްހަމަ ނުޖެހިގެން ޒަޔަނިސްޓް އިޒްރޭލުގެ ޔަހޫދީން ވެރިރަށް ތެލްއަވީވުގެ މަގުތަކަށް ނިކުމެ ހަމަނުޖެހުން ހިންގަން ފަށައިފިއެވެ.
އިޒްރޭލުގެ މީޑިޔާތަކުން ހަމަނުޖެހުންތަކުގެ މަންޒަރުތައް ބްރޯޑްކާސްޓް ކުރުމުން ދަނީ ވަރަށް ބޮޑަށް ސެންސަރު ކޮށްގެންނެވެ. ހަމަނުޖެހުމުގެ ބައެއް މަންޒަރަތަކުން ފެންނަނީ ހަމަނުޖެހުން ހިންގަމުންދާ މީހުން ތެލްއަވީވުގެ މަގުތަކުގެ އެކި ސަރަހައްދުތައް ބަންދުކޮށް، ޓަޔަރުތަކުގައި އަލިފާން ރޯކޮށްފައިވާ މަންޒަރެވެ.
މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހު ފަލަސްތީނުގެ މުޖާހިދުން އިޒްރޭލުގެ ތެރެއަށް ވަދެ، ދިން ކުއްލި ހަމަލާގައި 200 އެއްހައި ޔަހޫދީން އަސީރުން ގޮތުގައި ހައްޔަރު ކުރިއެވެ. އަސީރުން މިނިވަން ކުރުމުގެ ނަމުގައި ޒަޔަނިސްޓް އިޒްރޭލުން ޣައްޒާއަށް ދެމުން އަންނަ ޢުދުވާނީ ހަމަލާތަކުގައި ޔަހޫދީ އަސީރުންގެ ތެރެއިން އެތައްބަޔަކު މިހާރުވެސް ވަނީ މަރުވެފައެވެ. ޢުދުވާނީ ހަމަލާތައް ހުއްޓާލައި، އަސީރުން ބަދަލު ކުރުމުގެ އެއްބަސްވުމުގައި ޣައްޒާގެ ވެރިކަން ކުރަމުން އަންނަ ހަމާސް ޖަމައާތާއެކު އެއްބަސްވުމުގައި ސޮއި ކުރަން އިޒްރޭލުގެ ހައްދުފަހަނައެޅި ބޮޑު ވަޒީރު ބެންޖަމިން ނަތަންޔާހޫ ގެންދަނީ ދެކޮޅު ހަދަމުންނެވެ.
އަސީރުންގެ މައްސަލައިގައި މިދިޔަ ހަފްތާގައި ބައި މިލިޔަނެއްހައި ޔަހޫދީން ވަނީ ތެލްއަވީވުގެ މަގުތަކުގައި މުޒާހަރާކޮށް ނަތަންޔާހޫގެ އިސްތިއުފާއަށް ގޮވާލާފައެވެ.
ޣައްޒާގައި އިޒްރޭލުން ހިންގަމުން އަންނަ ޢުދުވާންތައް ހުއްޓާލާނީ އަސީރުން މިނިވަން ކުރުމަށްފަހު ކަމަށް ނަތަންޔާހޫ ބުނަމުން ގެންދިޔަނަމަވެސް، ހަމާސް ޖަމާއަތުން ބުނަމުން ދަނީ އެންމެ އަސީރަކު ވިޔަސް މިނިވަން ކުރެވޭނީ އެޖަމާއަތުން މިނިވަން ކުރުމުން ކަމުގައި ބުނަމުންނެވެ. ހަމާސް ޖަމާއަތުން ހައްޔަރުކޮށްފައިވާ އެއްވެސް އަސީރަކު މިނިވަން ކުރުމުގެ ގާބިލްކަން އިޒްރޭލުގެ އަސްކަރިއްޔާގައި ނެތް ކަމަށް ހަމާސް ޖަމާއަތުން ދަނީ ބުނަމުންނެވެ. މިހަގީގަތް އިޒްރޭލުގެ ޒަޔަނިސްޓް ޔަހޫދީންގެ ބޮޑު އިންސައްތައެއްވެސް ގަބޫލް ކުރާކަން މިކަމާ ގުޅިގެން ނަގާފައިވާ އެކިއެކި ޕޯލްތަކުން ދައްކައެވެ.
