ޕޯޗުގީޒުން އެގައުމުގެ މަޝްހޫރު ފުޓްބޯޅަ ތަރި ކްރިސްޓިއާނޯ ރޮނާލްޑޯގެ ޝަރަފުގައި ފައިސާ ފޮއްޗެއް ނެރެން ނިންމައި ފައިސާ ފޮތީގެ ރަމްޒެއް ދައްކާލައިފިއެވެ.
ޕޯޗުގަލްގެ ސެންޓްރަލް ބޭންކުން އާންމުކޮށްފައިވާ ފޮޓޯއިން ފެންނަ ގޮތުގައި ރޮނާލްޑޯގެ ފޮޓޯ ޖެހި ފައިސާ ފޮތީގައި ބޭނުން ކުރާނީ ރޮނާލްޑޯ ދަނޑުމަތީގައި މަޝްހޫރުކަން ހޯދި 7 ނަންބަރެވެ. އަދި އޭނާގެ ބްރޭންޑް "ސީއާރު7" ވެސް ފައިސާ ފޮތީގައި ހިމެނުމަށް ވަނީ ނިންމާފައެވެ. ފައިސާ ފޮތި ހެދުމަށް ނިންމާފައި ވަނީ ޕޯޗުގަލްގެ ރަސްމީ ފައިސާގެ ގޮތުގައި ބޭނުން ކުރަމުންް އަންނަ އަދި ޔޫރަޕިއަން ޔޫނިއަންގެ ރަސްމީ ފައިސާ ފޮތި "ޔޫރޯ" ގައެވެ.
ރޮނާލްޑޯއަށް ހާއްްސަ ކޮށްފައިވާ ފައިސާ ފޮތި ބޭނުން ކުރަން ފަށަން ހަމަޖެހިފައިވާ ރަސްމީ ތާރިހް، މަރުކަޒީ ބޭންކުން އަދި ހާމަކޮށްފައެއް ނުވެއެވެ. ޕޯޗުގަލްގެ މީޑިޔާ ރިޕޯޓުތައް ބުނާ ގޮތުން މާލަސްތަކެއް ނުވެ މި ފައިސާ ފޮތި ބޭނުން ކުރަން ފަށާނެއެވެ.
ރޮނާލްޑޯއަކީ ޕޯޗުގަލްގެ ތާރިހުގައި މިހާތަނަށް އުފެދުނު އެންމެ މޮޅު އަދި އެންމެ ކާމިޔާބު ކުޅުންތެރިޔާއެވެ. ޕޯޗުގަލްގައި އެގައުމުގެ ރައްޔިތުން ރޮނާލްޑޯ ބަލައިގަންނަނީ ގައުމުގެ ރަމްޒެއްގެ ގޮތުގައެވެ. ފުރަތަމަ ފަހަރަށް ޕޯޗުގަލްއަށް ބައިނަލްއަގުވާމީ ފުޓްބޯޅަ މުބާރާތެއް (2016 ގެ ޔޫރޯ) ކާމިޔާބު ކޮށްދިނުމާއި އިންޑިވިޖުއަލީ ރޮނާލްޑޯ ހޯދާފައިވާ ކާމިޔާބީތަކުގެ ސަބަބުން، މީގެ ކުރިން ޕޯޗުގަލްގެ މެޑެއިރާ އިންޓަނޭޝަނަލް އެއަރޕޯޓުގެ ނަން "ކްރިސްޓިއާނޯ ރޮނާލްޑޯ އިންޓަނޭޝަނަލް އެއަރޕޯޓް" ގެ ނަމަށްވެސް ވަނީ ބަދަލު ކޮށްފައެވެ. ސޯޝިއަލް މީޑިޔާގައި 1 ބިލިޔަން ފްލޯވަރުން ތިބި ހަަމައެކަނި އެތުލީޓް، ރޮނާލްޑޯ ނިސްބަތް ވަނީ 4 ރަށުގެ މައްޗަށް އެކުލެވޭ މެޑެއިރާއަށެވެ.
