ސްޕެނިޝް ލަލީގާގައި ރެއާލް ސޮސިއެޑާޑް އަތުން ރޭ ލިބުނީ ހައްގު މޮޅެއް ނޫން ކަމަށް ރެއާލް މެޑްރިޑުގެ ކޯޗް ކާލޯ އެންޗަލޮއްޓީ ބުނެފިއެވެ.
ރެއާލް މޮޅުވީ ދެވަނަ ހާފުގައި ރެފްރީ ދިން ރެއާލްއަށް ދިން 2 ޕެނަލްޓީ ކާމިޔާބު ކޮށްގެންނެވެ. ރެއާލްގެ ފުރަތަމަ ޕެނަލްޓީ 58 ވަނަ މިނެޓުގައި ކާމިޔާބުކޮށް ރެއާލްއަށް ލީޑް ނަގައިދިނީ ބްރެޒިލް ގައުމީ ޓީމުގެ ޖާޒީގައި ރަނގަޅު ކުޅުމެއް ނުދެއްކޭތީ ފާޑުކިޔުންތައް އަމާޒުވެފައިވާ ވިނީޝިއަސް ޖޫނިއާއެވެ. ފްރާންސްގެ ފޯވާޑް ކިލިއަން އެމްބައްޕޭ ލީޑް ފުޅާކޮށްދިނީ 75 ވަނަ މިނެޓުގައި ލިބުނު ޕެނަލްޓީއަކުންނެވެ.
މެޗަށްފަހު އަންޗެލޮއްޓީ ބުނީ ސޮސިއެޑާޑުން އެންމެ ފުރަތަމަ ސިކުންތުން ފެށިގެން ވަރަށް ވަރުގަދައަށް ޕްރެސްކޮށް، މުޅި މެޗުގައިވެސް ރެއާލްއަށް ކުޅެލާނެ ފުރުސަތެއްވެސް ނުދީ ހިފެހެއްޓިކަމަށެވެ. ސޮސިއެޑާޑުން ދެއްކި ކުޅުން ވަރަށް ބޮޑަށް ބަލައިގަންނަ ކަމަށާއި މިމެޗުން ރެއާލް މޮޅުވެގެން ފޭބުމަކީ ހައްގު ގޮތެއް ނޫން ކަމަށް އަންޗެލޮއްޓީ ބުންޏެވެ.
މިމޮޅާއެކު ތާވަލުގެ ދެވަނައަށް ރެއާލް ވަނީ ޖެހިލާފައެވެ. އެކަމަކު ތާވަލުގެ ދެވަނައިގައި 11 ޕޮއިންޓާއެކު ރެއާލް އޮތީ، ތާވަލުގެ އެއްވަނައިގައި އޮތް ބާސެލޯނާއަށްވުރެ އިތުރަށް އެއްމެޗް ކުޅެގެންނެވެ.
ލީގުގައި މިރޭ ޖިރޯނާ އަތުން ބާސެލޯނާ މޮޅުވެއްޖެނަމަ އަލުން 4 ޕޮއިންޓަށް ލީޑް ފުޅާކޮށްލެވޭނެއެވެ. މަޝްހޫރު ކޯޗް ޕެޕް ގާޑިއޯލާގެ ހިއްސާ އޮންނަ ޖިރޯނާއަކީ މިިދިޔަ ސީޒަނުގައި ބާސެލޯނާ ފަހަތަށް ޖައްސާލުމަށް ލީގުގެ ދެވަނަ ހޯދި ޓީމެވެ. އަނެއްކޮޅުން މިދިޔަ ސިޒަނުގައި ލަލީގާގައި ބާސެލޯނާއާ ދެކޮޅަށް ކުޅުނު ދެ މެޗުވެސް ކާމިޔާބު ކުރީ ޖިރޯނާކަން ފާހަގަ ކޮށްލެވެއެވެ. މި ދެ ކްލަބަކުވެސް ނިސްބަތްވަނީ ކެޓަލޯނިޔާ ސަރަހައްދަށް ކަމުގައިވާތީ، މިރޭގެ ކުރިމަތިލުން ވަރަށް ފޯރިގަދަވާނެ ކަމަށް ބެލެވެއެވެ.
