ޒަޔަނިސްޓް އިޒްރޭލުން ޣައްޒާގެ ނުސެއިރަތު ރެފިއުޖީ ކޭމްޕަށް ދިން ޢުދުވާނީ ހަމަލާއެއްގައި ދިހަ މީހުން ޝަހީދު ކޮށްލައިފިއެވެ.
ފަަލަސްތީނުގެ "ވަފާ" ނިއުސް އެޖެންސީއިން ރިޕޯޓް ކޮށްފައިވާ ގޮތުގައި މި ހަމަލާގައި ޝަހީދުވި މީހުންގެ ތެރޭގައި ކުޑަކުދިންނާއި އަންހެނުން ހިމެނެއެވެ. "ވަފާ" ނިއުސް އެޖެންސީއިން ބުނެފައިވާ ގޮތުގައި ސަހްޔޫނީ ސިފައިން ހަމަލާދިނީ އަލް ޤަސަސް އާއިލާ ދިރިއުޅެމުން ދިޔަ ގެ އަށެވެ.
ނުސެއިރަތު ރެފިއުޖީ ކޭމްޕުގެ އިތުރުން އިޒްރޭލުން ޣައްޒާގެ ޒެއިތޫން އަވަށާއި ޝެއިޚް ރަޑްވާން ނެއިބަރހުޑަށް ދިން ޢުދުވާނީ ހަމަލާތަކުގައި 10 މީހުން މަރުވެފައިވާ ކަމަށް "އަލްޖަޒީރާ" އިން ބުނެއެވެ.
މިދިޔަ އަހަރުގެ އޮކްޓޫބަރު 8 ވަނަ ދުވަހުން ފެށިގެން ފަލަސްތީނުގެ ރައްޔިތުންނާ ދެކޮޅަށް ސަހްޔޫނީ އިޒްރޭލުން ހިންގަމުން އަންނަ ޤަތުލް އާންމުގައި މިހާތަނަށް 41،206 މީހުން ޝަހީދު ކޮށްލާފައިވާ ކަމަށް ފަލަސްތީނުގެ ކަމާބެހޭ އިދާރާތަކުން ހާމަކުރައްވައެވެ. އަދި އިޒްރޭލުގެ ޢުދުވާނުގައި ފަލަސްތީނުގެ 95،000 އަށްވުރެ ގިނަ ރައްޔިތުން ޒަޚަމްވެފައިވާކަމަށްވެސް ތަފާސް ހިސާބުތަކުން ދައްކައެވެ.
