ރާއްޖޭގައި ޒަމާނުއްސުރެ ކަންކުރެވިފައި އޮތް ގޮތުން ތަރިކަ ރައްކާތެރިކޮށް އެ ބެލެހެއްޓުމުގެ ދާއިރާ ވެފައިވަނީ ހަރަދުތަކެއްކޮށް އެއިން އާމްދަނީ އެއް ނުލިބޭ ދާއިރާއަކަށް ކަމަށާއި ނަމަވެސް އެކަން ބަދަލު ކުރައްވާނެ ކަމަށް ދިވެހި ބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހިމް ވިދާޅުވެއްޖެއެވެ.
ވަޒީރު އާދަމް ނަސީރު މިހެން ވިދާޅުވީ, އެ މިިނިސްޓްރީގެ މަސައްކަތްތަކާއި ގުޅޭ ގޮތުން އިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިޔަކު ކުރި ސުވާލަކަށް ދެއްވި ޖަވާބުގައެވެ.
ވަރީރު އިތުރަށް ވިދާޅުވީ ރާއްޖޭގައި މިހާތަނަށް ކަން ހިންގަމުން އައި ގޮތަށް ބަލާއިރު ތަރިކައިގެ ދާއިރާ ވެފައި އޮތީ ބޮޑެތި ހަރަދުތަކެއް ކުރަން ޖެހޭ ދާއިރާއެއްގެ ގޮތުގައި ކަމަށާއި ނަމަވެސް ސަރުކާރުން ބޭނުންވަނީ އެކަން ބަދަލުކޮށް މި ދާއިރާއަކީ ދައުލަތަށް އާމްދަނީ ލިބޭނެ ދާއިރާއަކަށް ހެދުމަށް ކަމަށެވެ. އަދި އެ ވުޒާރާއިން މިހާރު އެކުލަވާލާފައިވާ ސްޓްރެޓީޖިކް އެކްޝަން ޕްލޭންގައި ތަރިކައިން އާމްދަނީ ހޯދުމަށް ހިމަނާފައިވާކަމަށާއި އެއާ އެއްގޮތަށް މަސައްކަތްތައް ކުރެވެމުންދާކަމަށްވެސް ވަޒީރު ވިދާޅުވިއެވެ.
އަދި ދުނިޔޭގެ އެހެން ބައެއް ގައުމުތަކެކޭ އެއްގޮތަށް މިދާއިރާގެ ކަންކަން ފަރުމާކުރެވި ބަދަލު ކުރެވުމުން ރާއްޖޭގައިވެސް ތަރިކައިން އާމްދަނީ ލިބޭނެ ކަމަށާއި އަދި މިކަން ކުރުމަށް ޒަމާނީ ޓެކްނޮލޮޖީގެ އެހީތެރިކަން ހޯދަން ޖެހޭ ކަމަށްވެސް އެމަނިކުފާނު ވިދާޅުވިއެވެ.
މީގެއިތުރުން ރާއްޖޭގެ ދެ ސަރަހައްދެއްގައި ސައިޓް މިއުޒިއަމެއް ހެދުމަށް މަސައްކަތް ކުރަމުންދާތީ އެކަމަކީ ފީސިބަލް ކަމެއްތޯ ނޫސްވެރިޔަކު ކުރި ސުވާލަށް ޖަވާބުދެއްވަމުން ވަޒީރު އާދަމް ނަސީރު ވަނީ ، ނ. ލަންދޫ މާ ބަދިގެ ސަރަހައްދު އަދި ތ. ދިޔަމިގިލި ގަނޑުވަރު ސައިޓް މިއުޒިއަމެއް ގޮތުގައި ތަރައްގީކުރަމުން އަންނަ ކަމަށް ވިދާޅުވެފައެވެ.
މި ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާގެ އޮފީހުގެ އިސް ތަރުޖަމާނާ މިނިސްޓަރ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖް ވަނީ ނޫސްވެރިން ކުރެއްވި ސުވާލުތަކަށް ޖަވާބުދެއްވާފައެވެ.
