ގދ. ފިޔޯރީގައި ކުރިއަށްގެންދާ ހެޔޮލަފާ ޒުވާނުން ޕްރޮގްރާމުގެ ތެރެއިން، ފިޔޯރީ ސްކޫލު ބެލެނިވެރިންނަށް ޕޭރެންޓިންގ ސްކިލްސް ސެޝަނެއް ކުރިއަށް ގެންގޮސްފިއެވެ.
ފުލުހުން ބުނީ މިމަހު 14 ވަނަ ދުވަހު ކުރިއަށް ގެންދިޔަ މި ސެޝަނުގައި، ދަރިންގެ ފަރާތުން ފެންނަ ނޭދެވޭ ކަންކަމާއި އެކަންކަން ހައްލުކުރުމަށް މުއައްސަސާތަކާއި ވިޔަފާރިވެރިންނާއި، މަދަނީ ޖަމުއިއްޔާތަކާއި، ސްޕޯޓްސް އެކެޑަމީތަކާއި، ބެލެނިވެރިން ގުޅިގެން ކުރެވިދާނެ ކަންކަމާ ގުޅޭގޮތުން މައުލޫމާތުދީ މަޝްވަރާކޮށްފައިވާ ކަމަށެވެ.
އަދި ދަރިންގެ ފަރާތުން ދިމާވާ ނޭދެވޭ ކަންކަން ހުއްޓުވައި ދަރިން ހެޔޮގޮތުގައި ތަރުބިއްޔަތު ކުރުމަށް ނަމޫނާ ބެލެނިވެރިޔަކަށްވުމަށް ކޮންމެ މީހަކަށް ވެސް ފަރުދީ ގޮތުން ކުރެވިދާނެ ކަންކަމަކީ ކޮބައިތޯބަލައި އެކަންކަން އެގޮތުގައި ކުރުމަށް ބައިވެރިންގެ މެދުގައި މަޝްވަރާކޮށްފައިވާ ކަމަށްވެސް ފުލުހުން ބުނެފައިވެއެވެ.
މި ސެޝަންގައި ފިޔޯރީ ސްކޫލް މެނޭޖްމަންޓާއި މުދައްރިސުންނާއި ބެލެނިވެރިން ހިމެނޭހެން 41 މީހުން ބައިވެރިވެފައިވެއެވެ.
ފިޔޯރީގެ 18 އަހަރުން ދަށުގެ ކުޑަކުދިންނަށް ކުރިއަށް ގެންދާ ހެޔޮލަފާ ޒުވާނުން ޕްރޮގްރާމަކީ ފިޔޯރީ ޕޮލިސް ސްޓޭޝަނުން އިންތިޒާމުކޮށްގެ ރަށުގެ މުއައްސަސާތަކާއި، ޖަމުއިއްޔާތަކާ އަދި ވިޔަފާރިވެރިންގެ އެހީތެރިކަމާއެކު ކުރިއަށް ގެންދާ ޕްރޮގްރާމެކެވެ.
