އޭޝިއަން ޑިވެލޮޕްމަންޓް ބޭންކް (އޭ.ޑީ.ބީ) އިން ބަންގްލަދޭޝަށް އާ ކަންޓްރީ ޑިރެކްޓަރަކު ޢައްޔަންކޮށްފިއެވެ.
މިގޮތުން މި މަޤާމަށް ޢައްޔަންކޮށްފައިވަނީ ހޯ ޔުން ޖޮންގް އެވެ. އޭނާއަކީ މި 25 އަހަރުގެ ތަޖުރިބާ ލިބިފައިވާ ބޭފުޅެކެވެ. 15 އަހަރު ދުވަހު އޭ.ޑީ.ބީ އަށް ޚިދުމަތްކޮށްދެއްވާފައިވާ ޖޮންގް ވަނީ ކޮރެއާގެ މިނިސްޓްރީ އޮފް ސްޓްރެޓަޖީ އެންޑް ފިނޭންސްގެ އިސް މަޤާމުތައް ފުރުއްވައިފައެވެ.
2009 ވަނަ އަހަރު އޭ.ޑީ.ބީ އާ ގުޅުމަށްފަހު ސަރަޙައްދީ ގުޅުމާއި ހިންގުމުގައި އޭނާ ވަނީ ގިނަ މަސައްކަތްތައް ކޮށްފައެވެ. ޖޮންގް އަކީ އެމެރިކާގެ ޔުނިވަރސިޓީ އޮފް ވޮޝިންގްޓަން އިން ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓަރސް ޑިގްރީ އަދި ކޮރެއާގެ ސޯލް ނޭޝަނަލް ޔުނިވަރސިޓީން އިކޮނޮމިކްސްގެ ދާއިރާއިން ބެޗްލަރސް ޑިގްރީ ހާސިލުކުރައްވާފައިވާ ފަރާތެކެވެ. ބަންގްލަދޭޝް އޭ.ޑީ.ބީގެ މެންބަރަކަށް ވީ 1973 ވަނަ އަހަރުގައެވެ. އޭ.ޑީ.ބީން ވަނީ ކޯފައިނޭންސިންގ އާއެކު ލޯނާއި ގްރާންޓްގެ ގޮތުގައި އެ ޤައުމަށް މިހާތަނަށް 61 ބިލިއަން އެމެރިކާ ޑޮލަރު ދީފައެވެ.
މަޢުލޫމާތު: https://sarukaaru.gov.mv/articles/4035
