ދުނިޔޭގެ މީހުންނަށް ޑިމޮކްރެސީ ކިޔަވައިދޭ، ބޮޑު ޑިމޮކްރެސީގެ އުމުރުން 248 އަހަރު ވެފައިވާއިރު އަދިވެސް ވޯޓު ލާ މީހުންގެ ރަޖިސްޓްރީ އެއް އެކުލަވާލާކަށެއް ނޭނގެއެވެ.
އަޚާއެވެ! އުޚުތާއެވެ! ތިބާ ދިވެއްސަކަށް ވީތީ ފަޚުރުވެރިވާށެވެ. އަދި ފުއާދު ތައުފީޤަށްވެސް ފަޚުރުވެރިވާށެވެ.
ވޯޓުލާ މީހުންގެ ރަޖިސްޓްރީއެއް އެކުލަވާލައި ޝައްކެއް ނެތް މިންވަރަށް ވޯޓު ލުމުގެ ޑިމޮކްރެޓިކް ޙައްޤު ހޯދައިދިނުމަށް އެމެރިކާއަށް ޖެހޭނީ ފުއާދު ތައުފީޤު އަރިހުން ފިލާވަޅު ނަގާށެވެ!
މިއީ ސާމާސާ ވާހަކައެއް ނޫނެވެ!
ޖުލައި މަހު އެރިޒޯނާގެ ސްޓޭޓް ޕްރައިމަރީގައި ޖެނިފާ ހުއާން ވޯޓުލާން ދިޔައިރު، ވޯޓުލާ މަރުކަޒުގައި ތިބި މީހުންނަށް، ޖެނިފާއަށް ވޯޓުލުމަށް ހުއްދަ ދޭން ޖެހޭ ކަން ސާބިތުކޮށް ދިނުމަށް އޭނާއަށް އެއްގަޑިއިރު ނެގިއެވެ! ޒިމްބާބްވޭގައިވެސް މިހެނެއް ނުވާނެ ކަން ކަށަވަރެވެ.
ޖެނިފާއަށް ޖެހުނީ އޭނާގެ އަތުގައި ހުރި އޭނާއަކީ ކާކުކަން އަންގައިދޭ ލިޔުންތަކާއި އޭނާގެ އެޑްރެސް ސާބިތު ކޮށްދޭ ލިޔުންތަކާއި އޭނާއަކީ އެމެރިކާގެ އެ ފަސްގަނޑަށް އުފަން، ރެޑް އިންޑިއަނުންނޭ އެކިޔާ ދަރިކޮޅުގެ މީހެއްކަން ސާބިތުކޮށް ދޭށެވެ. އެކަމަށް އެއްގަޑިއިރު ނެގިއެވެ.
ޖެނިފާ އެކޭ އެއްފަދައިން އެމެރިކާގެ ފަސްގަނޑުގެ އަސްލު ވަޒަންވެރިންނަށް ވޯޓުލާން ދާ ކޮންމެ ފަހަރަކު އާދަވެގެން މިމައްސަލަ ދިމާވެއެވެ.
އެމެރިކާގެ އަސްލު ވަޒަންވެރިންނާ ދެކޮޅަށް ހިންގާފައިވާ ގަތުލުއާންމުތަކަށްފަހު އެމީހުން ތިބެނީ ޣައްޒާގައި މީހުން ތިބޭހެން ނަރުދަމައި ސަރަހައްދު ވަކިކޮށްފައިވާ ތަންތާނގައި އެކަހެރިކޮށް ބައިތިއްބާފައެވެ. ރީތިކޮށްލަން ވެގެން އެތަންތަނަށް ކިޔައީ "ރިޒަރވޭޝަން" ތަކެވެ.
ޖެނިފާއާއި އޭނާގެ ގަބީލާގެ މީހުން ދިރިއުޅޭ އެ ރިޒަރވޭޝަންގައި މީހުންގެ ގެތަކަށް އެޑްރެސްތަކެއް ނުހުރެއެވެ. މަގުތަކަށް ނަން ތަކެއް ދީފައެއް ނުހުރެއެވެ. ގަސްތަކަށް ނަން ދީފައެއް ނުވެއެވެ. އަދި ގެތަކަށް ނަންބަރުތަކެއް ދީފައެއް ނުހުރެއެވެ.
ޖެނިފާ ދިރިއުޅެނީ، "އިންޑިއަން ރޫޓް 19" ގެ "މައިލްޕޯސްޓް "7 ކައިރީގައި ހުންނަ ގެއެއް ގައެވެ. އޭނާގެ ގެއަކީ ކޯލްޑް ފީލްޑްސް ވިލެޖުގައި ބިނާކުރި 53 ވަނަ ގެ އެވެ. އެހެންވެ، ޖެނިފާއާއި އެ ފަދަ އެހެން އަސްލު ވަޒަންވެރިންގެ އެޑްރެހެއް ނެތުމުން ވޯޓުނުލެވެއެވެ. ނުވަތަ ލާން އުނދަގޫ ކަމަކަށް ވެއެވެ.
އުމުރުން 41 އަހަރުގެ ޖެނިފާއަށް އޭނާގެ ގޭގެ ވާހަކަ ސާބިތު ކޮށްދެވުނަސް އެހެން ގިނަ މީހުން އެމެޒޮން އިން ޕެކެޓާއި ސިޓީ ގެނައުމަށް އެޑްރެސް ދޭނީ ޕޯސްޓް ބޮކްސްއެއްގެ އެވެ.
ވޯޓުލާން ގޮސް ޕޯސްޓް ބޮކްސްގެ ނަންބަރު ބުނުމުން ގަބޫލެއް ނުކުރާނެއެވެ.
ޕޯސްޓް ބޮކްސް ނުގެންގުޅޭ މީހުން، އެމީހުންގެ އެމެޒޮން ޕެކެޓްތައް ގެނުއާނީ އެހިސާބުގައި ހުންނަ ޝެލް ކުންފުނީގެ ޕެޓްރޯލް ސްޓޭޝަނަށެވެ. ޕެޓްރޯލް އަޅަން ދާއިރު އެތަނުން ޕެކެޓް ނަގައިގެން އަންނަނީއެވެ.
އެމެރިކާގެ ބޯހިމެނުމުގެ ތަފާސްހިސާބުތަކަށް ބަލާއިރު ގާތްގަނޑަކަށް ޖެނިފާގެ ޓޮހޯނޯ އޮއޮޑަމް ނޭޝަން ރިޒާވް ސޮނޯރަން އާބާދީގައި 10،000 މީހުން ދިރިއުޅެއެވެ. އެއީ އެމެރިކާގެ ކަނެކްޓިކެޓް ސްޓޭޓާ އެއްވަރުގެ ސައިޒްގެ ސަރަހައްދެކެވެ.
އެމެރިކާގެ ވާދަވެރި ރިއާސީ އިންތިޚާބު އޮންނާނީ މިމަހުގެ 5 ގައެވެ.
މިއިންތިޚާބުގައި އަސްލު ވަޒަންވެރިންގެ އާބާދީއަކީ ވޯޓު އަނބުރާލަން މުހިންމު ބަޔެކެވެ.
އެމެރިކާގެ 2023 ވަނަ އަހަރުގެ ބޯހިމެނުމުގެ ތަފާސްހިސާބުތަކަށް ބަލާއިރު ހުދު މީހުންގެ ނަސްލު ސާފުކޮށްލުމުގެ ހަރަކާތްތަކަށް ފަހުވެސް އެމެރިކާގެ އަސްލު ވަޒަންވެރިންގެ ގާތްގަނޑަކަށް 400،000 މީހުން ދިރިއުޅޭ އެރިޒޯނާ ފަދަ މުހިންމު ސްޓޭޓްތަކުގައި އެމީހުން ކުޑަ ތަފާތަކުން ނަތީޖާ ނިންމައި ދީފާނެ ކަމަށް ބެލެވެއެވެ.
މުޅި އެމެރިކާގައި، ގައުމީ ފެންވަރުގައި ވޯޓުލާ އުމުރުގެ ގާތްގަނޑަކަށް 8 މިލިއަން އަސްލު ވަޒަންވެރިން ތިބި ކަމަށް ބައިޑަންގެ ވެރިކަމުން 2022 ވަނަ އަހަރު ނެރުނު ރިޕޯޓެއްގައި ބުނެފައި ވެއެވެ.
މިދިޔަ ފަހަރު އަވަށްޓެރި، އިންޑިއާގައި ވޯޓު ލިއިރު ހިމާރު މަތީގައި، ފަރުބަދައިގެ ކުންނުތަކަށް ވޯޓުލާ މެޝިން އުފުލިތަން ފެނުނެވެ. އެންމެ މީހަކަށްވެސް ވޯޓުލާން މެޝިނެއް ބަހައްޓައި ދިނެވެ. އެއީ ކޮންމެ ފަރުދެއްގެވެސް ވޯޓު ގުނުމަށް މަސައްކަތް ކުރަން ޖެހޭ މިންވަރުގެ މުހިންމު ކަމެވެ.
ކުލީ ހަނގުރާމަތައް ކުރުވާހެން އެމެރިކާއިން ވޯޓު ލުމުގެ ކަންކަން ބެލެހެއްޓުންވެސް ހަވާލު ކޮށްލަނީ އަމިއްލަ ކުންފުނިތަކާއި އަދި އެމީހުންގެ މެޝިންތަކާއެވެ.
ސްމާޓްމެޓިކްއާއި ޑޮމިނިއަން ވޯޓިންގ ސިސްޓަމަކީ މިއަހަރު ވޯޓު މެޝިން ބަހައްޓައި ދިނުމާއި ވޯޓުލުމުގެ މަސައްކަތް ކުރިއަށް ގެންދިއުމަށް ހަވާލުކޮށްފައިވާ ކުންފުނިތަކުން މައުލުމާތު ހޯދާލެވުނު ދެކުންފުންޏެވެ.
އެމެރިކާގެ އަސްލު ވަޒަންވެރިންގެ މީހަކު ވޯޓެއް އަޅަން ބޭނުންވެއްޖެނަމަ، އޭނާއަށް 3 ގަޑިއިރުގެ ދަތުރެއް ކުރަން ޖެހެއެވެ! މާލެއިން ކުޅުދުއްފުށްޓަށް ދިއުމަށްވުރެން ވޭންދެވިނި މަސައްކަތެކެވެ.
އެމެރިކާއަކީ ނަސްލީ ތަފާތު ކުރުމާއި ފުރުސަތު ނުދިނުމުގެ ތާރީޚެއް އޮންނަ ޤައުމެކެވެ. އެހެންވެ، އަސްލު ވަޒަންވެރިންނާއި ކަޅު ނަސްލުގެ މީހުންނަށް ވޯޓުލުންވެސް އިތުރު މުސީބާތަކަށް ވެއެވެ.
މޮންޓާނާ ސްޓޭޓްގައި އަސްލު ވަޒަންވެރިންނަށް ކަނޑައަޅާފައިވާ، ފޯޓް ޕެކް ރިޒަވޭޝަންގައި ދިރިއުޅޭ، އުމުރުން 38 އަހަރުގެ ޖޯސެފް ޑޮލެޒިލެކް ބުނީ އޭނާގެ ގަބީލާގެ ގިނަމީހުން ވޯޓުލާން ބޭނުންވިއަސް އެކަން ކުރެވޭނެ ގޮތެއް ނޯންނަ ކަމަށެވެ.
ވޯޓު ލާން ދާން ޖެހެނީ ކައުންޓީ އޮފީހަށެވެ. އެއީ 20 މޭލު ދުރުގައި އޮންނަ އާބާދީއެކެވެ. އެތަނަށް ދާކަށް ބަސް ދަތުރެއްވެސް ނުލިބޭ ކަމަށެވެ.
ޖޯސެފްގެ ދަތުރުފަތުރު އޮންނަނީ ތިބާގެ އާރްޓީއެލް ހެނެއް ނޫނެވެ. ނޫނީ ތިބާ ޝަކުވާ ކޮށްލުމުން އެމްޓީސީސީން އަނެއް ދުވަހު ކަންކަން ރަނގަޅު ކުރާ ހެނެއްވެސް ނޫނެވެ!
"ބަސް ދަތުރު އޮންނަނީ، ދުވާލަކު އެންމެ ފަހަރަކު. ބައެއް ފަހަރު ބަހަށް މަޑުކޮށްގެން 8 ގަޑިއިރުވެސް ތިބެން ޖެހޭ" އޭނާ ކިޔައި ދިނެވެ.
މިހިސާބުން ސިޔާސީ ފަންތީގެ ޣަދަރުވެރިކަމުގެ ވާހަކައެއްވެސް ކިޔާލާށެވެ.
2020 ވަނަ އަހަރު މިހާރުގެ ރައީސް ބައިޑެން އިންތިޚާބު ކާމިޔާބު ކުރެއްވީ އެރިޒޯނާއިން ގާތްގަނޑަކަށް 10،000 ވޯޓުގެ ކާމިޔާބަކުންނެވެ.
އޭނާއަށް ތާއީދު ކުރިތަންތާނގައި، އަސްލު ދަރިކޮޅުގެ ގަބީލާގެ ޓޮހޮނޯ އޯޑަމް ނޭޝަން ރިޒާވްގެ ގަބީލާ މީހުން ހިމެނުނެވެ.
އެނާގެ ވެރިކަމަށް 2 އަހަރު ފަހުން އެރިޒޯނާގެ ރިޕަބްލިކަން ޕާޓީން ވަނީ އަސްލު ވަޒަންވެރިންނަށް ވޯޓުލާން ރަޖިސްޓްރީ ކުރުން އުދަގޫ ކުރުމަށް ޒާތްޒާތުގެ ޑޮކިއުމެންޓު ހުށަހަޅައިގެން ރަޖިސްޓްރީ ވާން ޖެހޭ ކަމަށް ބުނެ ގާނޫނެއް ފާސްކޮށްފައެވެ.
އެކަމުގެ ސަބަބުން ޓޮހޮނޯ އޮއޮޑަމް ނޭޝަން އިން ކޯޓުގައި ދައުވާ ކުރިއެވެ. އެ ދައުވާގައި އެރިޒޯނާގައި ތިބި ރަސްމީ އެޑްރެހެއް ނެތް 40،000 އަސްލު ވަޒަންވެރި ގަބީލާތަކުގެ މީހުންގެ ހައްގު ގެއްލުވާލަނީ ކަމަށް ބުންޏެވެ. ކޯޓުން ޙުކުމް ކުރީ މަދު ލިޔެކިޔުމަކާއެކު އަސްލު ވަޒަންވެރިންނަށް ފަހި ކޮށްދޭށެވެ. ނަމަވެސް ވޯޓުގެ ކަންކަން ކުރިއަށް ގެންދާ ކުލީ ކުންފުނިތަކުން އެމީހުންގެ ލިޔެކިޔުންތައް ގަބޫލެއް ނުކުރެއެވެ.
އަދިވެސް ބުނަމެވެ. ދިވެއްސަކަށް ވީތީ ތިބާ ފަޚުރުވެރިވާށެވެ. އެހެން ޤައުމުތަކަށް ވުރެން މިޤައުމުގައި ލައްކަ ކަން ހާސްބައި މާބޮޑަށްވެސް ރަނގަޅު ކަމަށް ޔަގީން ކުރާށެވެ!
