ކޮންމެ އަހަރަކުވެސް މިދުވަހަކީ އަލްޖީރިއާ މަތިން ދުނިޔެ ހަނދާން ކުރާ ދުވަހެވެ. މީގެ 70 އަހަރު ކުރިން އަލްޖީރިއާ މިނިވަން ވާން ޖެހޭ ކަމަށް ބުނެ، މިދުވަހު އަލްޖީރިއާގެ ނޭޝަނަލް ލިބަރޭޝަން ފްރޮންޓުން އެކަން އިއުލާން ކުރިއެވެ.
100 އަހަރު ވަންދެން ފަރަންސޭސި އިސްތިއުމާރުން އަލްޖީރިއާއަށް ވެރިވެގަނެ، ގަތުލުއާންމު ހިންގަމުން ގޮސް އަލްޖީރިއާގެ މިލިއަން މީހުން ޝަހީދުކޮށްލިއެވެ.
މިނިވަންކަމަށް ހަނގުރާމަ ކުރަމުންދާ، މިއަދުގެ ފަލަސްޠީނެކޭ އެއްފަދައިން އެއިރު އަލްޖީރިއާގައިވެސް ތިބީ ހުސް ޓެރަރިސްޓުންނެވެ.
އަލްޖީރިއާގެ މިނިވަން ކަމުގެ ވާހަކަ ދައްކަން އދއަށް ދާން އުޅުނު މަންދޫބަށްވެސް ޕާސްޕޯޓެއް ނުލިބިގެން އޭނާގެ ޤައުމުގެ މިނިވަންކަމުގެ ވާހަކަ އދގައި އިއްވުމަށް ދަތުރު ކުރީ ޕާކިސްތާނު ސަރުކާރުން ހެޔޮއެދިގެން ދިން ޕާސްޕޯޓެއްގައެވެ.
އަލްޖީރިއާއަށް މިނިވަންކަން ލިބުނީ، 5 ޖުލައި 1962ގައެވެ.
އަލްޖީރިއާގެ މިނިވަންކަމަށް މަސައްކަތް ފެށިތާ މިއަދު 70 އަހަރު ފަހުން އަލްޖީރިއާއަކީ، މިނިވަންކަމުގެ ޙަރަކާތުގައި އުޅޭ ހުރިހައި ޤައުމަކުންވެސް އަދި ޖަމާއަތަކުންވެސް އުންމީދު ލިބިގަންނަ ޤައުމެވެ.
އެފްރިކާގެ އޭއެންސީއާއި ނެލްސަން މަންޑޭލާގެ ނަމޫނާ ޤައުމެވެ.
ފަލަސްޠީނުގެ ފުރަތަމަ އިންތިފާޟާގައި ފަލަސްޠީނު މިނިވަންކުރުމަށާއި ޤުދުސްއަކީ މިނިވަން ފަލަސްޠީނުގެ ވެރިރަށް ކަމަށް ޕީއެލްއޯގެ ލީޑަރު ޔާސިރު ޢަރަފާތު އިޢުލާން ކުރެއްވީ އަލްޖީރިއާއިންނެވެ.
އެއަށްފަހު ހިނދުކޮޅެއްގެ ތެރޭގައި އެކަން އެ މޭރުމުން އެންމެ ފުރަތަމައަށް އިޢުލާން ކުރި ޤައުމަކީ އަލްޖީރިއާއެވެ! މިލިއަން ޝަހީދުންގެ އަލްޖީރިއާއެވެ!
1962ގައި މިނިވަން ވިފަހުން އަދިވެސް އަލްޖީރިއާއަށް ފަރަންސޭސިން އަދިވެސް ބަދަލެއް ދީފައެއް ނުވެއެވެ.
ޕެރިސްގެ އީފެލް ޓަވަރަކީ ފަރަންސޭސިން އަލްޖީރިއާ ލޫޓިވާލި ގޮތުގެ ސާފު ހެއްކެކެވެ. އެ ޓަވަރުގައި ބޭނުންކޮށްފައިވާ ހުރިހައި ދަނގަނޑަކީ އަލްޖީރިއާއިން ވަގަށް ނަގައިގެން ފަރަންސޭސިން ގެންދިޔަ ދަނގަނޑެވެ!
