ޒަޔަނިސްޓް އިޒްރޭލު އިންޓަލެޖެންސުން ލުބްނާނުގެ ހިޒްބުﷲ ޖަމާއަތުގެ މެމްބަރުންނަށް ދިން ކަމަށް ބެލެވޭ ވަރުގަދަ ސައިބަރ ހަމަލާއެއްގައި އެޖަމާއަތުގެ 1000 އެއްހައި މެމްބަރުންނަށް ސީރިއަސް ޒަޚަމްތަކެއް ލިބިއްޖެއެވެ.
ހިޒްބުﷲ ޖަމާއަތުގެ މެމްބަރުންގެ އިތުރުން މި ސައިބަރ ހަމަލާ އަމާޒުވި އެއްބޭފުޅަކީ ލުބްނާނުގެ ވެރިރަށް ބެއިރޫތުގައި ހުންނަވާ އިރާނުގެ ސަފީރު މޮޖްތަބާ އަމާނީއެވެ. އެކަމަކު އެމަނިކުފާނަށް ލިބިވަޑައިގެންނެވި ޒަހަމްތައް ސީރިއަސް ނޫން ކަމަށް "އަލްޖަޒީރާ" އިން ބުނެއެވެ.
އަލްޖަޒީރާއިން ބުނާ ގޮތުގައި ހިޒްބުﷲ ޖަމާއަތުގެ ހާހެއްހައި މެމްބަރުންނަށް ލިބިފައިވަނީ ސީރިއަސް ޒަޚަމްތަކެއް ކަމަށެވެ. މި ހަމަލާއާ ގުޅިގެން ލުބްނާނުގެ ސަރުކާރުން ވަނީ ބެއިރޫތުގައި މަސައްކަތް ކުރައްވާ ސިއްހީ ހުރިހާ ޚިދުމަތްތެެރިން މަސައްކަތަށް ނިކުތުމަށް އަންގާފައެވެ.
މި ހަމަލާގެ ޚަބަރުތައް ގެނެސްދެމުން އަންނަ އަލްޖަޒީރާގެ ލިންކް:
މި ހަމަލާއާ ގުޅިގެން މުޅި ލުބްނާން ހާސްކަމެއްގެ ތެރެއަށް ވެއްޓި އާންމު ރައްޔިތުންގެ މެދުގައި ބޮޑު ބިރުވެރިކަމެއް ވަނީ އުފެދިފައެވެ.
މީޑިޔާ ރިޕޯޓްތައް ބުނާ ގޮތުގައި ހިޒްބުﷲ ޖަމާއަތުގެ މެމްބަރުން ސްމާޓް ފޯނު ނުގެންގުޅެއެވެ. ބޭނުމަކީ އިޒްރޭލުގެ އިންޓަލެޖެންސަށް ހިޒްބުﷲ ޖަމާއަތުގެ ކޮމިއުނިކޭޝަން ތެރެއަށް ވަދެގަތުމަށް ހުރަސް އެޅުމެވެ. ހިޒްބުﷲ ޖަމާއަތުގެ މެމްބަރުން ބޭނުން ކުރަމުންދަނީ އިރާނުގައި އުފައްދާފައިވާ "ޕޭޖާ" ކަމަށް ރިޕޯޓުތައް ބުނެއެވެ. ޕޭޖާތައް ގޮއްވާލައިގެން ހަމަލާދިނީ އިޒްރޭލުގެ އިންޓަލެޖެންސުންކަމަށް ތުހުމަތު ކުރެވޭއިރު، ހިޒްބުﷲއިން ދީފާނެ ހަމަލާއަކަށް ތައްޔާރުވުމަށް އިޒްރޭލުގެ ރިޒަރވް ފޯސްތައް މިހާރު ވަނީ އަސްކަރީ ހިދުމަތަށް ނެރެފައެވެ. އަދި ލުބްނާނުގެ ބޯޑަރާ ކައިރީގައި ދިރިއުޅެމުން އަންނަ ޔަހޫދީން އެސަރަހައްދު ދޫކޮށް ދިޔުމަށް ހައްދުފަހަނައެޅި އިޒްރޭލުގެ ސަރުކާރުން މިހާރު ވަނީ އަންގާފައެވެ.
ލުބްނާނުގެ ސިއްޚީ ވުޒާރާއިން ހާމަކޮށްފައިވާ އެންމެފަހުގެ މައުލޫމާތުތަކަށް ބަލާއިރު ޕޭޖާތަކަށް ދިން ސައިބަރ ހަމަލާގައި މިހާތަނަށް 2،750 މީހުން ޒަޚަމްވެފައިވާކަން ކަށަވަރު ކުރެވިފައިވާ ކަމަށެވެ. އަދި 3 މީހުން މަރުވެފައިވާކަން ވަނީ ކަށަވަރުވެފައެވެ.
