ފެނަކަ ކޯޕަރޭޝަން ލިމިޓެޑުން އެ ކުންފުނި ޑިޖިޓަލައިޒް ކުރުމަށް އަމާޒުކޮށްގެން ރޯޑްމެޕެއް ތަޢާރަފުކޮށްފިއެވެ.
މި ރޯޑްމެޕުގައި ހިމެނެނީ ފެނަކައިން މިހާރުވެސް ދެމުންދާ ޚިދުމަތްތައް އިތުރަށް ހަރުދަނާކުރުމަށްޓަކައި އެކި ޕޯޓަލްތަކާއި ސޮފްޓްވެއަރތަކެވެ. މި ރޯޑްމެޕް ތަޢާރަފުކޮށް، އެއާ ބެހޭ މަޢުލޫމާތު ދިނުމަށް ބޭއްވުނު ރަސްމިއްޔާތުގައި ރައީސުލްޖުމްހޫރިއްޔާގެ އޮފީހުގެ ޕަބްލިކް ޕޮލިސީއާބެހޭ ޕްރިންސިޕަލް ސެކްރެޓަރީ ޢަބްދުﷲ ނާޒިމާއި ފެނަކައިގެ މެނޭޖިންގ ޑިރެކްޓަރ މުޢާޒު މުޙައްމަދު ރަޝީދު ބައިވެރިވެވަޑައިގެންނެވިއެވެ.
ރޯޑްމެޕާ ބެހޭގޮތުން ވާހަކަދައްކަވަމުން، ފެނަކައިގެ މެނޭޖިންގ ޑިރެކްޓަރ މުޢާޒު ވިދާޅުވީ އެކި އަތޮޅުތަކަށް ކުރެއްވި ދަތުރުފުޅުތަކުގައި ފާހަގަކުރެވުނީ ފެނަކައިގެ އޮފީސްތަކާއި ކުންފުނީގެ މައި އޮފީހާ ދެމެދު ގުޅުން ކެނޑިފައި އޮތްތަނެވެ. އެހެންކަމުން، ރަށްރަށަށް ދެވޭ އަސާސީ ޚިދުމަތްތައް ހަލުވިކަމާއި ފަސޭހަކަމާއެކު ފޯރުކޮށްދިނުމަށްޓަކައި ޑިޖިޓަލައިޒް ކުރުމަކީ މުހިންމު ކަމެއްކަމަށް މުޢާޒް ވިދާޅުވިއެވެ.
މި ރަސްމިއްޔާތުގައި ފެނަކައިން ވަނީ "ގިރުންބާ ޕޯޓަލް" ރަސްމީކޮށް ތަޢާރަފުކޮށްފައެވެ. މިއީ ރަށްރަށުގައި ދެވޭ ޚިދުމަތްތަކާ ގުޅޭ މަޢުލޫމާތާއި ތަފާސްހިސާބު ރައްކާކޮށް، އިންޖީނުގެތަކާއި، ފެން ޕްލާންޓުތައް މޮނިޓަރ ކުރުމަށް ބޭނުންކުރާނެ ޕޯޓަލެކެވެ. މީގެ އިތުރުން، މި ޕޯޓަލްގެ ސަބަބުން ޚިދުމަތްތަކަށް ބުރޫއަރާފާނެ ޙާލަތެއް އައުމުގެ ކުރިން ދުރާލާ ތައްޔާރުވެ، ފިޔަވަޅުތައް އެޅުމަށް ފުރުސަތު ފަހިވާނެކަމަށް އެ ކުންފުނިން ވިދާޅުވެފައިވެއެވެ.
"ގިރުންބާ ޕޯޓަލް" ގެ އިތުރުން، ފެނަކައިން ވަނީ އިންސާނީ ވަސީލަތްތަކުގެ މަސައްކަތްތައް ޑިޖިޓަލައިޒް ކުރުމަށް ޚާއްޞަ ސޮފްޓްވެއަރއެއް ތަޢާރަފުކޮށްފައެވެ. މި ސޮފްޓްވެއަރގެ ސަބަބުން މުވައްޒަފުންނަށް ޗުއްޓީއަށް އެދުމާއި ވަޒީފާއާ ގުޅޭ އެހެނިހެން ކަންކަމަށް އެދުމުގައި ފަސޭހަތަކެއް ލިބިގެންދާނެ ކަމަށް ކުންފުނިން ވިދާޅުވެފައިވެއެވެ. މީގެ އިތުރުން، ރޯޑްމެޕްގައި ފެނަކަ ޓެންޑަރ ޕޯޓަލް، ޓިކެޓް ސިސްޓަމް، ފިއުލް މެނޭޖްމަންޓް ސިސްޓަމް އަދި މައި ފެނަކަ ޕޯޓަލް ވެސް ހިމެނިފައިވެއެވެ.
ފެނަކައިން ވިދާޅުވެފައިވާ ގޮތުގައި އެޗްއާރު ސިސްޓަމް ފިޔަވައި އެހެން ހުރިހާ ސޮފްޓްވެއަރ ޕްރޮގްރާމްތަކެއް ހަދާފައިވަނީ ފެނަކައިގައި މަސައްކަތްކުރާ ޑިވެލޮޕަރުންނާއި ސޮފްޓްވެއަރ އިންޖިނިއަރުންނެވެ.
ކުންފުނި ޑިޖިޓަލައިޒް ކުރުމުގެ މަސައްކަތުގެ ދަށުން، ތ. އަތޮޅުގައި ސެންޓްރަލް ސްކާޑާ ސިސްޓަމެއްވެސް ދަނީ ބޭނުންކުރަމުންނެވެ. އަދި ފެނަކައިން ވިދާޅުވެފައިވާ ގޮތުގައި ޑިޖިޓަލް ޕްލޭންގެ ބައެއްގެ ގޮތުން މިހާރު ބޭނުންކުރާ ހުރިހާ މީޓަރުތަކެއް ސްމާޓް މީޓަރުތަކަކަށް ބަދަލުކުރުމަށް އަމާޒުކުރެވިފައިވެއެވެ. މިގޮތުން، ދ. އަތޮޅު ކުޑަހުވަދޫގެ ގޭބިސީތަކުގައި މިހާރު ވަނީ ސްމާޓް މީޓަރުތައް ހަރުކޮށް ރަސްމީކޮށް ބޭނުންކުރަން ފަށާފައެވެ.
ފެނަކައިގެ މައިގަނޑު އަމާޒަކީ ރޯޑްމެޕްގައި ކަނޑައަޅާފައިވާ ހުރިހާ ލަނޑުދަނޑިތަކެއް ހާސިލުކޮށް، އަހަރު ނިމުމުގެ ކުރިން ކުންފުނި ފުރިހަމައަށް ޑިޖިޓަލައިޒް ކުރުމެވެ. މި ބަދަލުވުމުގެ މަސައްކަތުގެ ސަބަބުން ކުންފުނީގެ މަސައްކަތްތައް އަވަސްވެ، މުވައްޒަފުންގެ މަސައްކަތުގެ ފެންވަރު މަތިވެގެންދާނެ ކަމަށް ފެނަކައިން ވިދާޅުވެފައިވެއެވެ.
