މުވައްޒަފުންގެ ހުނަރު އިތުރުކުރުމަށްޓަކައި، ރޯޑް ޑިވެލޮޕްމަންޓް ކޯޕަރޭޝަން (އާރު.ޑީ.ސީ) އާއި އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް) އާ ދެމެދު ފަހުމުނާމާއެއްގައި ސޮއިކޮށްފައެވެ.
މި އެއްބަސްވުމުގައި އާރުޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ، އަލީ ޒުހެއިރުއެވެ. އަދި އައިޔޫއެމްގެ ފަރާތުން ސޮއި ކުރެއްވީ އެ ޔުނިވާސިޓީގެ ވައިސް ޗާންސެލަރ ޑރ. އަލީ ޒާހިރުއެވެ.
އާރުޑީސީގެ ސޯޝަލް މީޑިއާ މެދުވެރިކޮށް އިޢުލާންކޮށްފައިވާ ގޮތުގައި، މި ފަހުމުނާމާގެ ދަށުން އާރުޑީސީގެ މުވައްޒަފުންގެ ފަންނީ ކުރިއެރުމަށް އެހީތެރިވުމަށްޓަކައި ޚާއްޞަކޮށް ފަރުމާކުރެވިފައިވާ ތަމްރީނު ޕްރޮގްރާމްތަކެއް ހިންގުމަށް އަމާޒުކުރެވޭނެއެވެ.
މި ގުޅުމުގެ ސަބަބުން އާރުޑީސީގެ މަސައްކަތްތެރިންގެ ކުރިއެރުމާއި ހުނަރު އިތުރުކުރުމަށް މަގުފަހިވެގެންދާނެ ކަމަށް ބެލެވެއެވެ. އަދި މިއީ ކުންފުނީގެ އަމާޒުތަކާ އެއްގޮތަށް، ތަރައްޤީވުމާއި ހިންގުމުގެ ފެންވަރު ރަނގަޅުކުރުމަށް އެހީތެރިވެދޭނެ ކަމެއް ކަމުގައި ބެލެވެއެވެ.
މި މަސައްކަތަކީ އާރުޑީސީ އިން ކުންފުނީގެ ތެރޭގައި ހުނަރުވެރި މުވައްޒަފުން އުފެއްދުމަށް ކުރާ މަސައްކަތްތަކުގެ ތެރެއިން ކަމެއްކަން ފާހަގަކުރެވެއެވެ.
