ދ. ކުޑަހުވަދޫގައި އިލެކްޓްރިކަލް އިންސްޓޮލޭޝަން އަދި މެއިންޓެނެންސްގެ ނޭޝަނަލް ސެޓްފިކެޓް 3 ގެ އެމްއެންއެސްޑީއޭ ފައިނަލް އިމްތިޙާނުތައް ކާމިޔާބުކަމާއެކު ނިންމާލެވިއްޖެކަމަށް ފެނަކަ ކޯޕަރޭޝަނުން ސޯޝަލް މީޑިއާ މެދުވެރިކޮށް އިޢުލާނުކޮށްފިއެވެ.
މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީ (އެމްއެންއެސްޑީއޭ) އިން ހިންގި މި އިމްތިޙާނުގައި ހިމެނެނީ ތިން ދާއިރާއެއްގެ އެކްސްޓާނަލް އިވެލުއޭޝަންތަކެކެވެ. އޭގެ ތެރޭގައި ތިއޮރެޓިކަލް، ޕްރެކްޓިކަލް އަދި އަނގަބަހުގެ އިމްތިޙާނު ހިމެނުނުކަމަށް ފެނަކައިން މައުލޫމާތުދެއެެވެ.
މި އިމްތިޙާނުތައް ފަރުމާކުރެވިފައިވަނީ ޕްރޮގްރާމުގެ ފެންވަރު ކަށަވަރުކުރުމަށާއި ދަރިވަރުންގެ ޤާބިލުކަން ވަޒަންކުރުމަށެވެ. މިއީ ފެނަކަ ކޯޕަރޭޝަނުގެ މަތީ ފެންވަރު ދެމެހެއްޓުމަށް އެޅުނު މުހިންމު ފިޔަވަޅެކެވެ.
އަދި ހިދުމަތްތަކުގެ ފެންވަރު ރަނގަޅުކުރުމުގެ ގޮތުން މުވައްޒަފުން ތަމްރީނުކުރުމަށް ފެނަކަ ކޯޕަރޭޝަނުން ދާދި ފަހުން ވިލާ ކޮލެޖާއެކު ފަހުމުނާމާއެއްގައިވެސް ސޮއިކޮށްފައިވެއެވެ.
