ލުބްނާނުގެ ހިޒްބުﷲ ޖަމާއަތުގެ މުޖާހިދުންގެ ވޯކީޓޯކީތަކަށް ޒަޔަނިސްޓް އިޒްރޭލުން ދިން ސައިބަރ ހަމަލާއެއްގައި 20 މީހުން ޝަހީދުވެ 450 އެއްހައި މީހުން އިއްޔެ ޒަހަމްވެއްޖެއެވެ.
ޒަޔަނިސްޓް އިޒްރޭލުން ވޯކީޓޯކީތައް ގޮއްވާލާފައި މިވަނީ ހިޒްބުﷲ ޖަމާއަތުގެ މެމްބަރުން މުއާސަލާތު ކުރުމަށް ބޭނުން ކުރަމުންދިޔަ 1000 އެއްހައި ޕޭޖަރުތަކަށް ދިން ސައިބަރ ހަމަލާގައި 12 މީހުން ޝަހީދުވެ ތިންހާހެއްހައި މީހުން ޒަހަމްކޮށްލިތާ 24 ގަޑިއިރު ނުވެ އުޅެނިކޮށެވެ. މި ހާދިސާގައި ކުޑަ 2 ކުދިންނާއި އަންހެނަކު ޝަހީދުވިއެވެ.
ވޯކީޓޯކީތައް ގޮއްވާލާފައި ވަނީ، ޕޭޖަރުތައް ގޮއްވާލި ހާދިސާގައި ނިޔާވި މީހުންގެ ޖަނާޒާގެ ކަންކަން ކުރިއަށް ދިޔަ ވަގުތުގައެވެ.
ގޮއްވާލި ވޯކީޓޯކީތަކީ ޖަޕާނުގެ "އިކޮމް" ކުންފުނިން 2004 އާއި 2014 އާ ދެމެދު އުފެއްދި މޮޑެލެއްގެ ވޯކީޓޯކީތަކެވެ. އެކުންފުނިން ނެރެފައިވާ ބަޔާނެއްގައި ބުނީ 2014 ގެ ފަހުން އެކުންފުނިން މިބާވަތުގެ ވޯކީޓޯކީ އުފެއްދުން ހުއްޓާލާފައިވާ ކަމަށެވެ.
ލުބްނާނުގެ މީޑިޔާ ރިޕޯޓުތައް ބުނާ ގޮތުން ހިޒްބުﷲއިން ޕޭޖަރުތަކާއި ވޯކީޓޯކީތައް ގަނެފައި ވަނީ މީގެ ފަސް މަހެއްހައި ދުވަސް ކުރިންނެވެ. ހިޒްބުﷲއިން ތުހުމަތު ކުރާ ގޮތުގައި ކަޅު ލެއިން ތަތްތެޅިފައި އޮތް ތާރިހެއް އޮތް އިޒްރޭލުގެ ޖާސޫސީ އިދާރާ "މޮސާޑް" އިން ޕޭޖަރުތަކާއި ވޯކީޓޯކީތަކުގައި ގޮވާތަކެތި ހަރުކޮށް އޭގެ ކޮންޓްރޯލް ހޯދާފައި ވަނީ އެތަކެތި އުފެއްދި މަރުހަލާގައެވެ.
