ސަލްމާން މިސްކިތުގައި، މީހުންނަށް ވަދެވޭނެހެން ގައުމީ އިސްލާމީ ލައިބްރަރީ އަންނަ އަހަރުގެ ޖެނުއަރީ މަހު ގާއިމުކުރައްވާނެކަމަށް އިސްލާމީ ކަންތައްތަކާބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ވަޒީރު ޝަހީމް މިހެން ވިދާޅުވީ އިިސްލާމީ ކަންތައްތަކާބެހޭ ވުޒާރާގެ މަސައްކަތްތަކާގުޅޭގޮތުން ނޫސްވެރިންނަށް މައުލޫމާތު ހިއްސާކުރުމަށް ރައީސުލްޖުމްހޫރިއްޔާގެ އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައެވެ.
އެމަނިކުފާނު އިތުރަށް ވިދާޅުވީ މީގެކުރިން އިސްލާމީ މަރުކަޒުގައި ކުރިން ލައިބްރަރީއެއް ހުރި ކަމަށާއި އެތަން ބަންދުކޮށް ފޮތްތައް މިދިޔަ އަހަރުގައި ގުދަނަށް ލާފައިވާކަމަށެވެ. ނަމަވެސް އެކަން ބަދަލުކޮށް، ސަލްމާން މިސްކިތުގައި، މީހުންނަށް ވަދެވޭނެހެން ގައުމީ އިސްލާމީ ލައިބްރަރީއެއް ގާއިމުކުރައްވާނެކަމަށްވެސް ވަޒީރު ވިދާޅުވިއެވެ.
އިސްލާމީ ކަންތައްތަކާބެހޭ ވުޒާރާއިން ވަނީ ލައިބްރަރީތައް މާލެގެ އިތުރުން ރާއްޖޭގެ ބައެއް އަތޮޅުތަކުގައިވެސް ލައިބްރަރީތައް ގާއިމުކުރަން ނިންމަވާފައެވެ.
އެގޮތުން ލައިބްރަރީތައް ގާއިމުކުރަން ވުޒާރާއިން ނިންމާފައިވާ ތަންތަނީ ގދ. ތިނަދޫ އިސްލާމިކް ސެންޓަރާއި، ރ. އުނގޫފާރު އިސްލާމިކް ސެންޓަރާއި ހއ. ދިއްދޫ އިސްލާމީ ސެންޓަރު ނިމޭއިރާއި، އައްޑޫސިޓީ ހިތަދޫގައި އިސްލާމީ ސެންޓަރުގެ އިތުރުން ޏ. ފުވައްމުލަކުގައި ކީރީތި ޤުރުއާނާ ބެހޭ މަރުކަޒު ހިމެނެއެވެ. ވަޒީރު ޝަހީމް ވިދާޅުވީ، އެ ވުޒާރާގެ އަމާޒަކީ އަންނަ އަހަރު ނިމެންވާއިރަށް މި ހުރިހާ ތަނެއްގައި އިސްލާމީ ލައިބްރަރީ ގާއިމުކުރެއްވުންކަމަށެވެ.
ވަޒީރު އިތުރަށް ވިދާޅުވީ، ރާއްޖޭގައި އިސްލާމީ ކަންތައްތައް ކުރިއަރުވާ ދަމަހައްޓަވަން ސަރުކާރުން ވަރަށް ގިނަ މަސައްކަތްތަކެއް ކުރައްވަމުންދާ ކަމަށެވެ. ރާއްޖެއަށް ގެންނަން ބޭނުންފުޅުވަނީ މާއްދީ ތަރައްޤީ ނޫންކަމަށާއި ފިކުރީ ތަރައްޤީ ގެންނަވާނެކަމަށް ރައީސުލްޖުމްހޫރިއްޔާ ޑރ. މުޢިއްޒު ވިދާޅުވި ކަމަށް ވަޒީރު ވަނީ ވިދާޅުވެފައެވެ.
