ބައިނަލްއަޤުވާމީ ޤާނޫނުތަކާ ޚިލާފަށް ޒަޔަނިސްޓް އިޒްރޭލުން ވެރިވެގަނެފައިވާ ފަލަސްޠީނުގެ ބިންތަކުން 12 މަސްދުވަހުގެ ތެރޭގައި ފޭބުމަށް އިޒްރޭލާ ދެކޮޅަށް ފަލަސްތީނުން އދ.ގެ ޢާންމު މަޖިލީހަށް ހުށަހެޅި ޤަރާރަށް ތާއިދުކޮށް ރާއްޖެއިން ވޯޓް ދީފިއެވެ.
އދ.ގެ އާންމު މަޖިލީހުގައި ނެގި މި ޤަރާރު ފާސް ކުރުމަށް ފަލަސްތީނާ އެއްކޮޅަށް ރާއްޖެއާ އެއްކޮށް 124 ގައުމުން ވޯޓް ދިނެވެ. ޤަރާރާ ދެކޮޅު ހެދީ އިޒްރޭލާއި އިޒްރޭލުގެ އެންމެ ބޮޑު މިތުރު، އަދި އިޒްރޭލުން ހިންގަމުން އަންނަ ލާއިންސާނީ ހުރިހާ ޖަރީމާއެއްގެ ފަހަތުގައި އޮތް އެމެރިކާ އާއި އެގައުމުގެ ބައިވެރިން ހިމެނޭހެން 14 ގައުމަކުންނެވެ. އިޒްރޭލަށް ހަތިޔާރު ފޯރުކޮށްދޭ ހުޅަނގުގެ ބޮޑެތި ބާރުތައް ކަމުގައިވާ އިނގިރޭސިވިލާތާއި ޖަރުމަނުން މި ވޯޓުގައި ބައިވެރިއެއް ނުވެއެެއެވެ. ވޯޓުގައި 43 ގައުމަކުން ބައިވެރިއެއް ނުވެއެވެ.
މި ޤަރާރުގެ ދަށުން 1967 ވަނަ އަހަރު ބޯޑަރު އެކުލަވާލާފައިވާ ގޮތަށް އިޒްރޭލުން ފަހަތަށް ޖެހެން ޖެހޭނެއެވެ.
ފަލަސްތީނުގެ ހައްޤުގައި ރާއްޖެއިން އަބަދުވެސް ބައިނަލްއަގުވާމީ މައިދާނުގައި އަޑުހަރުކޮށް ވަކާލާތު ކުރެއެވެ. ފަލަސްތީނުގެ ބިމުގައި ފަލަސްތީނުގެ ރައްޔިތުންނާ ދެކޮޅަށް ހިންގަމުން އަންނަ ޤަތުލް އާންމުތައް ރާއްޖެއިން ހަރުކަށި އިބާރާތުން ކުއްވެރި ކޮށްފަައިވެސް ވެއެވެ.
