ރާއްޖޭގެ ފުޓްބޯޅައިގެ މައި އިދާރާ އެފްއޭއެމަށް ކޮވިޑް ލޯނުގެ ގޮތުގައި ފީފާއިން ދިން އެއް މިލިޔަން ޑޮލަރު މާރުކޮށްގެން، އެފްއޭއެމްގެ ކުރީގެ ބައްސާމް އަދީލް ޖަޖީލް ހުޅުމާލޭ އަމީން އެވެނިއުން 2 އެޕާޓްމަންޓް ގަތްކަން ފުލުހުންގެ ތަހްގީގުތަކުން ހާމަވެއްޖެއެވެ.
މި މައްސަލާގައި ބައްސާމުގެ މައްޗަށް ދައުވާ ކޮށްދިނުމަށް އެދި މި މައްސަލަ ފުލުހުން ވަނީ ޕީޖީއަށް ހުށަހަޅާފައެވެ.
މި މައްސަލައިގައި ފުލުހުން ދައުވާ ކުރަން ފޮނުވާފައި ވަނީ ބައްސާމުގެ އިތުރުން، އަމީން އެވެނިއުގެ ވެރިފަރާތް، އަމީން ކޮންސްޓްރަކްޝަނާއި އެފްއޭއެމްގެ ކުރީގެ ފައިނޭންސިއަލް ޑިޕާޓްމަންޓްގެ ހެޑް މުހައްމަދު އަގީލް އަދި އެފްއޭއެމްގައި އޭރު އިސްކޮށް އުޅުނު ހަސަން ވަހީދު (ދޮނާ) ގެ މައްޗަށެވެ.
ފުލުހުންގެ ތަހްގީގަށް ހާމަވެފައިވާ ގޮތުގައި ފީފާއިން ކޮވިޑް ލޯނު ގޮތުގައި ރާއްޖެއަށް 1.9 މިލިޔަން ޑޮލަރު ދިނެވެ. އޭގެ ތެރެއިން 1 މިލިޔަން ޑޮލަރު މާރުކޮށް، 3 ޕޭމަންޓް ގޮތަށް ބަހާލައިގެން 2 އެޕާޓްމަންޓް ގަންނަން ބައްސާމް ހަރަދުކޮށްފައިވާކަން ތަހްގީގަށް ވަނީ ސާބިތުވެފައެވެ.
ރާއްޖޭގެ ފުޓްބޯޅަ އިނދަ ޖައްސާލައި، އަމިއްލަ ފައިދާއަށް އެތައް ކަމެއް ކޮށްފައިވާ ކަމުގެ ތުހުމަތު ކުރެވިފައި އޮތް ބައްސާމުގެ ހިޔާނާތާއި މަނީ ލޯންޑަރިންގެ މައްސަލަ ޕީޖީއިން ބަލަމުންް އަންނަ ރާއްޖެއިން އޭނާ ފުރުން މަނާކޮށް ޕާސްޕޯޓް ވަނީ ހަފަހައްޓާފައެވެ.
