މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ކުރިއަށްގެންދާ 'އިންޑަސްޓްރިއަލް ގޭސް ސިލިންޑަރު ސޭފް ހެންޑަލިން ޓްރެއިނިންގ' ގެ ތިންވަނަ ބެޗް ކާމިޔާބުކަމާއެކު ނިންމާލައިފިއެވެ.
މި ސެޝަންގައި ޓްރޭޑިންގ ޑިވިޜަން (ޓީއާރްޑީ) އަދި ސްޕެޝަލް ރިސޯސަސް ޑިވިޜަން (އެސްއާރްޑީ) ގެ ޖުމްލަ 16 މުވައްޒަފުން ބައިވެރިވިއެވެ. މި ތަމްރީނު ޕްރޮގްރާމް ނިންމާލައިފައިވަނީ 18 ސެޕްޓެމްބަރުގައިއެވެ.
މި ތިންވަނަ ބުރުގެ ތަމްރީނު ދެއްވީ ކުންފުނީގެ އިން-ހައުސް އެކްސްޕާޓުން ކަމުގައިވާ ޙުސައިން އިރުޝާމް އަދި އަޙްމަދު ރިޔާދުއެވެ. މި ތަމްރީނުގެ މަޤްޞަދަކީ މުވައްޒަފުންގެ ދުވަހުން ދުވަހަށް ކުރާ މަސައްކަތުގެ މުހިންމު ބައެއްކަމުގައިވާ އިންޑަސްޓްރިއަލް ގޭސް ސިލިންޑަރުތައް ރައްކާތެރިކަމާއެކު ގެންގުޅުމާއި ބެލެހެއްޓުމުގެ މުހިންމު ހުނަރުތައް މުވައްޒަފުންނަށް ދަސްކޮށްދިނުމެވެ.
މީގެ ކުރިން، ޓްރޭޑިންގ ޑިވިޝަންގެ ދެ ބެޗެއްގެ މުވައްޒަފުންނަށް މިފަދަ ތަމްރީނެއް ދެވިފައިވެއެވެ. 11 ސެޕްޓެމްބަރ 2024 ގައި ބޭއްވުނު ފުރަތަމަ ބެޗްގައި 9 ބައިވެރިން ހިމެނުނު އިރު، 12 ސެޕްޓެމްބަރ 2024 ގައި ބޭއްވުނު ދެވަނަ ބެޗްގައި 14 މުވައްޒަފުން ބައިވެރިވިއެވެ.
އެމްޓީސީސީ އިން މުވައްޒަފުންގެ ރައްކާތެރިކަމާއި ޕްރޮފެޝަނަލް ކުރިއެރުމަށް އިސްކަންދެމުންދާއިރު، މި ފަދަ ތަމްރީނުތަކުގެ އެހީގައި ކުންފުނީގެ ހިންގުމުގެ ބޭނުންތަކަށް ރަނގަޅަށް ތައްޔާރުވެފައިވާ ވޯކްފޯސްއެއް އުފެދިގެންދާނެއެވެ.
