ރެއާލް މެޑްރިޑުގެ ފޯމު އަންނަނީ މަޑުމަޑުން ރަނގަޅުވަމުން ކަމަށް އެ ޓީމުގެ ކޯޗު ކާލޯ އެންޗެލޯޓީ ބުނެފިއެވެ.
ސީޒަން ފެށިގެންއައިރު އާދައިގެ ފެންވަރެއްގެ ކުޅުމެއް ދައްކަމުން އައި ރެއާލް މެޑްރިޑުގެ ކުޅުމާއި އެ ޓީމުން ނެރޭ ނަތީޖާތައް ރަނގަޅުވަމުން އަންނަ ކަން ފާހަގަކޮށް އެންޗެލޯޓީ މިހެން ބުނީ، ސްޕެނިޝް ލަލީގާގައި ރޭގައި ރެއާލް މެޑްރިޑް ފަހަތުން އަރައި 4-1 އިން އެސްޕަންޔޯލް އަތުން މޮޅުވި މެޗަށް ފަހު ވާހަކަދައްކަމުންނެވެ.
"އެސްޕަންޔޯލްއިން މެޗުގެ ލީޑު ނެގުމާއެކު އަހަރެމެންގެ ކުޅުމަށް އައި ބަދަލުތަކާ މެދު އަހަރެން ވަރަށް ހިތްހަމަޖެހޭ. އަހަރެމެންގެ ކުޅުން ހުރީ އަވަސްކޮށް އަދި ނުރައްކާތެރިކޮށް. މަޑުމަޑުން އަހަރެމެންގެ ފޯމު އަންނަނީ ރަނގަޅުވަމުން" ރޭގެ މެޗަށްފަހު ވާހަކަދައްކަމުން އެންޗެލޯޓީ ބުންޏެވެ.
އެސްޕަންޔޯލް އަތުން ރެއާލު ކުރި ހޯދުމާއެކު އެ ޓީމުން މިހާރު ވަނީ ލީގުގައި ބަލިނުވެ 38 މެޗު ހަމަކޮށްފައެވެ. ރެއާލު އެންމެ ފަހުން ލަލީގާގައި ބަލިވީ 2023 ވަނަ އަހަރުގެ ސެޕްޓެމްބަރު މަހުގައެވެ.
ރޭގައި ކުޅުނު މެޗުން މޮޅުވުމާއެކު ރެއާލު އޮތީ މި ސީޒަނުގައި ލީގުގައި ކުޅުނު 6 މެޗުން ލިބުނު 14 ޕޮއިންޓާއެކު ލީގުގެ ދެވަނައިގައެވެ. އެއްވަނައިގައި އޮތީ ރެއާލުގެ ޒަމާންވީ ވާދަވެރިން ކަމުގައިވާ ބާސެލޯނާއެވެ. ބާސާއިން ލީގުގެ އެއްވަނައިގައި އޮތީ ކުޅުނު 5 މެޗުގެ ތެރެއިން ހުރިހާ މެޗެއް ވެސް ކާމިޔާބުކޮށް ލިބުނު 15 ޕޮއިންޓާއެކުގައެވެ.
