މޯލްޑިވްސް ވިމެން އިން ޕޮލިސިންގ ދުވަސް ފާހަގަކުރުމަށް ދިވެހި ފުލުހުންގެ ޚިދުމަތުގެ އަންހެން މުވައްޒަފުންގެ ގާލާ ނައިޓް ބާއްވައިފިއެވެ.
ރޭ އިސްކަންދަރު ބިލްޑިންގ މަލްޓިޕަރޕަސް ހޯލުގައި ބޭއްވި މި ހަފުލާ ޝަރަފުވެރިކޮށްދެއްވީ ކޮމިޝަނަރ އޮފް ޕޮލިސް ޢަލީ ޝުޖާޢު އާއި ކޮމިޝަނަރގެ އަނބިކަނބަލުންނެވެ. މި ހަފުލާގައި، ޑެޕިއުޓީ ކޮމިޝަނަރ އޮފް ޕޮލިސް އިސްމާއިލް ނަވީންގެ އިތުރުން ފުލުހުންގެ އިސް މަގާމުތަކުގެ ގިނަ ބޭފުޅުން ބައިވެރިވެ ވަޑައިގަތެވެ.
މި ހަފުލާގެ ޝަރަފުވެރި މެހެމާނު، ކޮމިޝަނަރ އަލީ ޝުޖާއު ވާހަކަފުޅު ދައްކަވަމުން ވިދާޅުވީ، ފުލުހުންގެ ތެރޭގައި ހުރިހާ ދާއިރާއެއްގައި އަންހެން މުވައްޒަފުން މަސައްކަތް ކުރަމުންދާކަމީ ފަހުރުވެރިވާންޖެހޭ ކަމެއްކަމަށާއި މީގެ ކުރިން އެޑްމިނިސްޓްރޭޓިވް މަސައްކަތްތައް ކުރަމުން އައި އަންހެން މުވައްޒަފުން މިއަދު މި ޚިދުމަތުގެ އެކި ބަހާތަކުގައި މަސައްކަތްކުރާކަމީ ލިބޭ ވަރަށް ބޮޑު އުފަލެއް ކަމަށެވެ. މީގެއިތުރުން، ކޮމިޝަނަރ ވިދާޅުވީ ގާތްގަޑަކަށް މުއައްސަސާގެ 15 އިންސައްތަ މުވައްޒަފުންނަކީ އަންހެން މުވައްޒަފުންކަމަށެވެ. އަދި އަންހެނުންނަށް ކުރިއަށް ދިއުމަށް ފުރުސަތުތައް ފަހިކޮށްދިނުމަކީ މުއައްސަސާގެ އަމާޒެއް ކަމަށް ވިދާޅުވިއެވެ.
