އިންޑިއާ އިން ރަޝިއާ އާއި ޖަޕާން ފަހަނައަޅައި، އެމެރިކާ އާއި ޗައިނާގެ ފަހަތުން، އޭޝިއާ ސަރަޙައްދުގެ އެންމެ ބާރުގަދަ ޤައުމުތަކުގެ ތެރެއިން ތިންވަނަ މަޤާމު ހޯދާފައިވެއެވެ.
ލޯވީ އިންސްޓިޓިއުޓުުން ދާދި ފަހުން ނެރުނު ރިޕޯޓަކުން މިކަން ބަޔާންކޮށް، އެޝިއާގެ ޕަވަރ ޑައިނެމިކްސްއަށް ވަރަށް ބޮޑު ބަދަލުތަކެއް އައިސްފައިވާކަމަށް ހާމަކޮށްފައިވެއެވެ.
ވަސީލަތްތަކާއި ނުފޫޒު މިންކުރާ އަހަރީ 'އޭޝިއާ ޕަވަރ އިންޑެކްސް' ގައި އޭޝިއާގެ 27 ޤައުމަކާއި ޓެރިޓަރީތައް ބަލާފައިވެެއެވެ. މި ގޮތުން އެމެރިކާ ފަދަ ޤައުމުތަށް މި ލިސްޓުގައި ހިމެނިފައިވަނީ އެމީހުންގެ ޓެރިޓަރީތަކާއި ނުފޫޒު އެޝިއާގައި އޮންނާތީއެވެ. 2024 ވަނަ އަހަރުގެ އެޑިޝަންގައި އިންޑިއާގެ އިތުރުވަމުންދާ ބާރު ފާހަގަކޮށް، ފުރަތަމަ ފަހަރަށް ޖަޕާން ފަހަނައަޅާފައިވާކަން ފާހަގަކޮށްފައިވެއެވެ. ނަމަވެސް، މި ރިޕޯޓުގައި އިންޑިއާގެ ނުފޫޒު އަދިވެސް އޭގެ ފުރިހަމަ ޤާބިލުކަމާ ހަމައަށް ނުދެވޭކަން، ފާހަގަކޮށްފައިވެއެވެ.
ކުރީގައި އިޤްތިޞާދީ އަދި ޘަޤާފީ ގޮތުން ބާރުގަދަ ބާރަކަށްވެފައިވާ ޖަޕާން، އިތުރުވަމުންދާ ވާދަވެރިކަމާއި އިޤްތިޞާދު ފަހަތަށް ޖެހުމުގެ ސަބަބުން އޭގެ ބާރު ދަށްވަމުންދާތަން ފެނިފައިވެއެވެ. ދިފާޢީ އަދި ސަލާމަތީ ކަންކަމުގައި އިތުރަށް ބައިވެރިވުމުގެ ސަބަބުން ޕޮއިންޓް އިތުރުވެފައިވީ ނަމަވެސް، ޖަޕާނުގެ އިޤްތިޞާދީ ބާރު ބޮޑުތަން ވަނީ ދަށްވެފައިއެވެ.
މި ރިޕޯޓުގައި އެމެރިކާ އާއި ޗައިނާގެ މެދުގައި ހިނގަމުންދާ ބާރުގެ ވާދަވެރިކަންވެސް ދިރާސާކޮށްފައިވެއެވެ. އެމެރިކާ އިން ގިނަ ދާއިރާތަކެއްގައި އިސްކަން ހިފަހައްޓާފައިވީ ނަމަވެސް، ޗައިނާ އިން އަސްކަރީ ޤާބިލުކަމުގައި މުހިންމު ކުރިއެރުންތަކެއް ހޯދައި، މި ދެ ސުޕަރ ޕަވަރ ދެމެދުގައިގައިވާ ފަރަގު ކުޑަކޮށްފައިވެއެވެ.
ޖުމްލަ ގޮތެއްގައި، 2024 ވަނަ އަހަރުގެ އޭޝިއާ ޕަވަރ އިންޑެކްސްއިން ސަރަޙައްދުގައި ބަދަލުވަމުންދާ ބާރުގެ ހަމަހަމަކަން ފާހަގަކޮށް، އިންޑިއާކީ ކުރިއަރަމުންދާ ބާރަކަށް ވަމުންދާއިރު ޖަޕާން އިން ކުރީގެ ފެނުނު އާރައި ބާރު ދެމެހެއްޓުމުގައި ގޮންޖެހުންތަކާ ކުރިމަތިލަމުންދާކަން ފާހަގަކޮށްފައިވެއެވެ.
