20 ވަނަބައި
"އެއީ އޭނައަކަށް މިހާރު އަހަރެމެންނާ ވާހަކަދައްކާނެ ވަގުތެއްނުވޭ.. އަހަރެމެންނަކީ ރައްޓެހިންކަން އޭނަ ހަނދާން ނެތިއްޖެ.. އޭނަ އޭނަގެ ދުނިޔޭގަ އުފަލުގަ އުޅެން ދޫކޮށްލާ.. އަހަރެމެން އަހަރެމެންގެ ހާލައިގެން އުޅުނީމަ ނިމުނީ.. އެހެންވީމަ މާޒް ގާތުވެސް މިބުނީ އޭނަ އަންނާނެކަމަށް ތިހެން ޚިޔާލީފޮލާ ނުކައްކާ އޭނަގެ މަތިން ހަނދާން ނައްތާލާށޭ.." ލީން އެހެން ބުނެލުމުން މާޒްގެ ހިތަށް ވަރަށް ތަދުވިއެވެ. އައިކާ ހަމަ އެހާވަރަށް ބަދަލުވީ ހެއްޔެވެ؟ އޭނާގެ މަތިން ހަނދާން ނައްތާލިޔަސް އޭނާގެ ހިޔަނި ފަދައިން އުޅުނު އޭނާގެ ހުރިހާ ސިއްރުތަކެއް އެނގޭ އޭނާގެ އެންމެ ގާތް އެކުވެރިޔާ މަތިންވެސް ހަނދާން ނައްތާލީ ހެއްޔެވެ؟ މާޒްއަށް އެވާހަކައެއް ޤަބޫލެއް ނުކުރެވުނެވެ.
"އެކަމަކު އަހަރެންނަކަށް ތިވާހަކަ ޤަބޫލެއް ނުކުރެވޭ.. އިކާ އަހަރެން މަތިން ހަނދާން ނައްތާލިޔަސް އަދި އަހަރެންނާ ވާހަކަދައްކަން ބޭނުންނުވިޔަސް ލީން މަތިން ހަނދާން ނައްތާލާނެއެކޭ އަހަރެންނަކަށް ހިއެއްނުވޭ.." މާޒް އެހެން ބުނެލުމުން ލީންއަށް ބޯހޫރާލެވުނެވެ.
"ހަނދާން ނައްތާލީމަ ދޯ އޭނައަށް އަހަރެންނަށް ގުޅާނުލެވެނީ.. މީހަކާ އިނީމަ ބިޒީވާނެކަންވެސް އެނގޭ.. އެކަމަކު އަބަދަކު ބިޒީއެއް ނުވާނެއެއްނު.. އޭނައަށް މާލެ ދެވުނީމަ އަހަރެމެން މަތިން ހަނދާން ނެތުނީ.." ލީން ބުނެލިއެވެ.
"ލީންވެސް ރަނގަޅުވާނެއެއްނު ގުޅާލަން.."
"ކިހާ ވަރަކަށް؟ އޭނައަށް އަމިއްލައަށް ފެނިގެން ގުޅާލަން ނުކެރޭތާ އަހަރެން ގުޅީމަ ފޯނުވެސް ނެގެނީ ހާލަކުން ފަހަރަކު.. އަހަރެން މިހާރު ފޫހިވެއްޖެ އިކާއަށް ގުޅަން.. އެއްވެސް މީހަކު ނޫޅޭ ވަރަކުން އަހަރެންނެއް ނޫޅޭނަން.." ލީން އެހެން ބުނެލުމުން މާޒް ލީންއަށް ބަލާލިއެވެ.
"އެކަމަކުވެސް އަހަރެންނަށް.."
"މާޒް! ނިކަން ހޭއަރާބަލަ.. ތިހެން ބޭކާރު ގޮތުގަ ދިރިއުޅުން ނަގާނުލާބަލަ.. އިކާއަށްވުރެ މާ ރަނގަޅު ކުދިންވެސް މާޒްއަށް ވާނެޔޭ.. ކީއްވެތަ ނުވިސްނިގެން ތިއުޅެނީ؟ އިކާއެއް އެނބުރިއެއް ނާންނާނެ.." ލީން ބެލީ މާޒްއަށް ވިސްނައިދެވޭތޯއެވެ. މާޒް އިތުރަށް އެއްޗެކޭ ނުބުނެއެވެ.
ދުވަސްތައް ފާއިތުވަމުންދެއެވެ. ލަމްހާއާއި އައިކާ އެއްގެއެއްގައި ޔޫޝައުއާއެކު އުފަލުގައި ދުވަސްތައް ވޭތުކުރަމުންދިޔައީ ޚިޔާލެއް ފިކުރެއް ނެތިއެވެ. އަނެއްކޮޅުން އައިކާ ނުލިބުމުގެ ހިތާމަޔާއި އެކުވެގެން ލިހާމްގެ ފުރައްސާރަތަކާއިހުރެ މާޒްގެ ދިރިއުޅުމުގެ ހާލަތު ދުވަހެއް ދުވަހަކަށް ދިޔައީ ދަށަށެވެ. އެހެންކަމުން އޭނާގެ މަންމައާއި ދޮންބައްޕަ އޭނާ ގޮވައިގެން ރާއްޖޭން ބޭރަށް ދިރިއުޅުން ބަދަލުކުރިއެވެ. މާޒް ކިތަންމެ ވަރަކަށް ދާން ދެކޮޅު ހެދިނަމަވެސް ރަމްޒިއްޔާގެ އާދޭސްތަކުން ދެކޮޅު ހަދަން ނުކެރުނީއެވެ.
ދުވަސްވަރަކީ މުޅި ރާއްޖެއަށްވެސް ވިއްސާރަ ދުވަސްވަރެކެވެ. ހެނދުނުއްސުރެ ވެހެމުންދިޔަ އިރުއިރުކޮޅާ ބޯކުރަމުން މެދުކެނޑުމެއްނެތި ވެހެމުން ދިޔައެވެ. ދުވަހުގެ ފިނިކަމާއިހުރެ ބޭރަށް ނުކުންނާނެ މީހަކުވެސް ނުވެއެވެ. ކޮންމެ މީހަކުވެސް ބެލީ އަރާމު ނިންޖަކުން ނިދާލެވޭތޯއެވެ. މެންދުރުގެ ވަގުތުގައި މާ ގަދައަށް ނިދުމުގެ ސަބަބުން އެރޭ މެންދަންވީއިރުވެސް ޒިޔާންއާއި ލީންގެ ލޮލާއި ނިދި ވަނީ މާދުރުގައެވެ.
"ޒިޔާ! އަހަރެން ބުނީ ކޮންއިރަކުންހޭ އަހަރެމެން ކުއްޖަކު ހޯދާނީ؟ މިހާރު އަށްމަސް ވީއެއްނު.. މިހާރު އަހަރެމެންނަށް ކުއްޖަކު ލިބުނަސް ދަތިނުވެ އުޅެވޭވަރަށް ރެޑީވެވިއްޖެއެއްނު.." ލީން ޒިޔާންގެ މޭގައި ބޯއަޅާލައިގެން އޮވެ ބުނެލިއެވެ.
"ހޫމް.. އަހަރެންވެސް މިހާރު އެބަ ތިކަމާ ވިސްނަން.. އިރާދަކުރެއްވިއްޔާ މިހާރު އަހަރެމެންނަށް ފައިސާގެ ދަތިކަމެއް ކުރިމައްޗެއް ނުވާނެ.. އެކަމަކު އަހަރެން މިހުންނަނީ ލީން ރަނގަޅަށް ތައްޔާރުވީމަ ނޫނީ އެކަން ނުކުރަންވެގެން.. އަހަރެން ބޭނުންވިޔަސް ލީން ކުއްޖަކު ބޭނުން ނުވަންޏާ ކަމަކު ނުދާނެއެއްނު.. އެހެންވެ ލީން ބޭނުންވެގެން ބުނަންދެން އަހަރެން މަޑުކޮށްގެން މި ހުންނަނީ.." ޒިޔާންގެ ވާހަކައިން ލީން ހިނިތުންވެލިއެވެ.
"ކީއްވެ އަހަރެންނާ ދޭތެރޭ އެހާވަރަށް ތި ވިސްނަނީ؟"
"ލޯބިވާތީ.. އެކަމެއް ނޭނގޭތަ؟ ލީންގެ އުފަލަކީ އަހަރެންގެ އުފާ.. އަދި ލީންއަށް ލިބޭ ކޮންމެ ދެރައަކީ އަހަރެންނަށްވެސް ލިބޭ ދެރައެއް.. ތީ އަހަރެންގެ ދިރިއުޅުމުގެ އެއްބައި.. އަހަރެންގެ ދުޢާއަކީ ލީންއާ އަހަރެން އަބަދުވެސް އެކީގަ ލެއްވެވުން.. ދުވަހަކުވެސް ދެމީހުން ވަކިނުވުން.. ލީން އަހަރެންނާ ވަކިވާ ދުވަހަކީ އަހަރެން ދެކެން ބޭނުންވާ ދުވަހެއް ނޫން.. އެހެން ގޮތަކަށް ބުނަންޏާ ލީން އަހަރެންނާ ވަކިވުމަކީ ހަށިގަނޑާއި ފުރާނަ ވަކިވުން ކަހަލަ ކަމެއް.." ލީންގެ ގައިގައި ބައްދާލައިގެން އޮވެ ޒިޔާން ބުނެލިއެވެ.
"އަހަރެން ހިއެއްނުކުރަން ދުވަހަކުވެސް އަހަރެންދެކެ ތިހާ ލޯބިވާ މީހަކު ލިބިދާނެ ކަމަކަށް.." ވީ އުފަލެއްގެ ބޮޑުކަމުން ލީންގެ ލޮލުން ކަރުނަ ހިލުނެވެ.
"އުނހު.. މިލޮލުން އެންމެ ކަރުނަ ތިއްކެއްވެސް ވެއްޓޭކަށް އަހަރެން ބޭނުމެއްނޫން.." ޒިޔާން ވަރަށް ލޯތްބާއެކު ލީންގެ ދެލޯ ފޮހެލައިދިނެވެ. ކުއްޖަކު ހޯދާ ވާހަކަ ދެއްކުމުން ލީން މާބޮޑަށް އައިކާ މަތިން ހަނދާންވާން ފެށިއެވެ. އެއީ ލީން ޒިޔާންއާ ރައްޓެހިވި ހިސާބުން ފެށިގެން ލީން އަބަދުވެސް އައިކާ ގާތުގައި ދައްކާ ވާހަކައަކަށް ވާތީއެވެ. އޭނާ ހޯދަން އެންމެ ބޭނުންވަނީ ދެ ޖިންސުގެ ދެކުދިންކަމަށް އަބަދުވެސް އޭނާ އައިކާ ގާތުގައި ބުނެއެވެ. އިރާދަކުރެއްވިއްޔާ ލީންއަށް ލިބޭނީ ލީން އެންމެ ބޭނުންވާ ކަހަލަ ދެކުދިންނޭ އައިކާ އަބަދުވެސް ބުނެއެވެ. އަދި އެކަމަށް އެދި ދުޢާކުރާނަމޭވެސް ބުނެއެވެ.
"ޒިޔާ! އަހަރެން ވަރަށް ދެރަވޭ އިކާ އެހާބޮޑަށް ބަދަލުވީމަ.. ހީވެސް ނުކުރަން މިހެން ވެދާނެކަމަކަށް.. ހިތަށްއަރަނީ ކީއްވެބާއޭ އޭނައަށް އެހާބޮޑު ބަދަލެއް އެއައީ.." ލީން ދެރަވެލާފައި ބުނެލިއެވެ.
"އެކަމާ އެހާބޮޑަށް ނުވިސްނާ.. އެއީ ރަށްފުށުގެ ގިނަ މީހުންނަށް މާލެ ދެވި މުއްސަނދި ދިރިއުޅުމެއް ލިބުނީމަ ވާގޮތް.. ތިމާއަށް ތިމާގެ ފެންވަރު އޮޅެނީ.. އެކަހަލަ ގިނަ މީހުންނަށް ހަމަ ތެޅިތެޅިފަ އެނބުރި އަންނަން ޖެހެނީ ކުރީގަ އުޅުނު ދިރިއުޅުމަށް.." ޒިޔާންވެސް ހުރީ އައިކާދެކެ ފޫހިވެފައެވެ.
"ވިސްނާކަށް ބޭނުމެއްނޫން.. އެކަމް އަހަރެންނަށް ހަމަ ވިސްނެނީއޭ.. ކޮންމެ ގޮތެއްވިޔަސް ސޯޅަ އަހަރު ވަންދެން އެކީގަ އުޅެފަ އެންމެ ދެއަހަރު ތެރޭ އެގުޅުން ކެނޑޭ ހިސާބަށް ދިޔައީމަ ދެރަވާނެއެއްނު.. އިކާގެ ކަންތަކާ ބޯގޮވައިގެން މާޒްގެ ދުވަސް އެދަނީ.. އަނެއްކާ އެހެރަ އުޅޭ ލިހާމްއެއްގެ އުނދަގޫވެސް ހާދަހާ ބޮޑޭ.. މާޒްއާ ދިމާކޮށްނުލާ އޭނައަށް ހަމަނިދި ލިބޭކަމަކަށް ނުވޭ.. ހިތަށްއަރަނީ އޭނައަށް ކޮން މޮޅެއްބާއޭ ވަނީ އެހެން އުޅެގެން؟ މާޒް އިކާގެ ކަންތަކާ އެހާ ބޯގޮވާފަ ހުއްޓާ ލިހާމްގެ އުނދަގޫ ކުރިއަށްވުރެވެސް ބޮޑުވެގެން ގޮސް އޭނަ އެހާ ސަކަރާތްވީ.. އެކަމާ ހެދި އޭނައަށް ރަށުން ފައިބަންވެސް އެ ޖެހުނީ.." ލީން ހުރީ ލިހާމްދެކެ ވަރަށް ރުޅިއައިސްފައެވެ.
"ރިލޭކްސް ލީން.. ބުނެބަލަ! މިރޭ އަސްލު ކިހިނެއްވެގެން ތިއުޅެނީ؟ އެހެން ދުވަސްދުވަހު އުޅޭ ގޮތެއް ނޫން ތީ.. ކޮންކަމަކާ ހިތްހަމަނުޖެހިގެން ތިއުޅެނީ؟" ޒިޔާންއަށް ލީންގެ މޫޑް ރަނގަޅު ނޫންކަން އެނގުނެވެ.
"މިއަދު ރަމްތައަށް ގުޅާލިން.. ބުނި މިހާރު މާޒް މަދުމަދުން މަސައްކަތް ކޮށްވެސް އުޅެޔޭ.. ރަށުގަ ހުރިއިރާ ބަލާފަ ހާސްބައި ރަނގަޅޭ.. މަޑުމަޑުން ހަމައަކަށް އެޅެމުންނޯ އަންނަނީ.. އެހެންވެ އަސްލު އެކި ކަންކަން ހަނދާންވެފަ މޫޑް ގޯސްވީ.. ކަމަކާ ހިތްހަމަނުޖެހިފައެއް ނޫން.." ލީން ބުނެލިއެވެ.
"އިރާދަކުރެއްވިއްޔާ މާޒް އަދި ރަށަށް ޚިދުމަތްކުރަން އަންނާނެ.." ޒިޔާން ބުނެލިއެވެ.
"އާނ.. އަހަރެންވެސް އުއްމީދުކުރަނީ ތިހެން.. އަހަރެން މިރަށަކުން ނުދެކެން މާޒްހާ ރަނގަޅު މީހެއް.. އަހަރެން ހިތަށްއަރާ މާޒްގެ އެ ރަނގަޅުކަން އިކާއަށް ނުފެނުނީ ކީއްވެބާއޭ؟ މާޒްއާ ދޭތެރޭ އޭނަ އެއްވެސް އިރަކު ހިތްހެޔޮ ނޫނީ.. ނޫންނަމަ މާޒް އެ ހުރިހާ ދުވަހު ކޮށްދިން ކަންތައްތަކާ ދޭތެރޭ އޭނަ ދެކޭނީ އެގޮތަކަށް ނޫން.. އޭނަ ދެކުނީ އެއީ މާޒް އަމިއްލަ އެދުމައިގެން ކޮށްދިން ކަންކަންކަމަށް.." ލީން އަނެއްކާވެސް އައިކާގެ މަތިން ހަނދާންވިއެވެ.
"އަހަރެންވެސް މާޒްއަށްވުރެ ގޯސްތަ؟" ލީންގެ މޫޑް ރަނގަޅުކޮށްލުމަށް ޒިޔާން ސަމާސާކޮށްލިއެވެ.
"ދެން.. ސީރިއަސްވެބަލަ.."
"އޯކޭ އޯކޭ.. އަސްލުވެސް.. ދެން ތިވާހަކަ ހުއްޓާފަ ހިނގާބަލަ ނިދޭތޯ އުޅެމާ.. ތިވާހަކަ ދައްކާ ވަރަކަށް ލީންގެ މޫޑް ގޯސްވުން ނޫންކަމެއް ނުވާނެ.." ޒިޔާން އެހެން ބުނެލުމުން ލީންވެސް އިތުރަށް އެވާހަކަ ދައްކާކަށް ނޫޅުނެވެ.
**********
އާ ދުވަހަކަށް އިރުއެރީ އަނެއްކާވެސް ޔޫޝައުގެ ހަޔާތަށް އުފާވެރި ޚަބަރަކައިގެންނެވެ. އެތައް ދުވަހެއް ވާންދެން ކުރި އުއްމީދުތަކުގައި ކުލަޖެހުނީއެވެ. ﷲގެ ޙަޟްރަތަށް ކުރިހާ ދުޢާތައް އިޖާބަކުރެއްވީއެވެ. ލަމްހާ އޭނާގެ ދަރިއަކަށް ބަލިވެ އިނީއެވެ. މުޅި ގޭތެރެއަށް ހީވަނީ ބަހާރު މޫސުން އައިސްގެން އުޅޭހެންނެވެ. އެންމެން އެކަމާ އުފާ ފާޅުކުރަމުން ދާއިރު ބޯމަތިވަމުން އަންނަ ތޫފާނުގެ ހިލަމެއްވެސް އެމީހުންނަކަށް ނުވެއެވެ. ތޫފާނުގެ ވައިގަދަވާނީ ކިހާވަރަކަށް ކަމެއް އަންދާޒާކޮށްލަންވެސް ނޭނގެއެވެ. އެ ތޫފާނުގެ ވައިގައި އެމީހުންގެ ދިރިއުޅުމަށް ކުރާނީ ކިހާވަރެއްގެ އަސަރެއްބާއެވެ.
"އައިކާ! ހިނގާބަލަ މިއަދު ބިރިޔާނީ ކައްކަމާ.."
"އާނ ދޯ.. މިހާރު ދުވަސްކޮޅެއް ވެއްޖެ ދޯ ބިރިޔާނީ ނުކެއްކޭތާ.." އައިކާވެސް ލަމްހާއާ އެއްބައިވެލިއެވެ.
"އާނ.. އޭރު ހުރީ އަބަދު ބިރިޔާނީ ކައިކައި ފޫހިވެފަ.. ޔޫޝައުއަށް މާ މީރު އެއްޗެއްވިއްޔަ.. ކޮންމެ ހުކުރެއްގަ ކަހަލަ ގޮތަކަށް ޖެހޭނެ ބިރިޔާނީ ހަދަން.." ލަމްހާ އެހެން ބުނެލުމުން އައިކާވެސް ހީލިއެވެ.
"މިހާރު ކީކޭ ކިޔާފަ ތި ހެނީ؟ ހަމަ އެއްވަރެއްގެ ދެމީހުން މީ.. ކަމަކަށް ނުވާ ކަމެއްގަ ތިބެދާނެ ހީނހީނ.." ހާޖަރާ ބަދިގެއަށް ވަތްއިރު އައިކާއާއި ލަމްހާ ހޭން ތިބުމުން ބުނެލިއެވެ.
"އެއީ ސްކޫލްގަ އުޅުނުއިރު ދިމާވި މަޖާ ކަންކަމުގެ މަތިން ހަނދާންވީ.. އެވާހަކަ މިދެއްކެނީ.." ލަމްހާ ހާޖަރާއަށް ބަލާލަމުން ހީލިއެވެ.
އައިކާގެ ބަނޑަށް ހަތްމަސް ފުރިއްޖެއެވެ. އައިކާ ދިޔައީ ރީތިވާން ބޭނުންކުރާ ބައެއް ސާމާނު ހުސްވެފައި ހުރުމުން އެ ގަނެލަން ފިހާރައަކަށެވެ. އައިކާވެސް އަދި ލަމްހާވެސް އެކަނި ބާޒާރުކުރަން ދިއުމަކީ ޔޫޝައު އެހާ ހިތްހަމަޖެހޭ ކަމެއް ނޫނެވެ. ޔޫޝައުއަށް ދެވެން ނެތް ފަހަރަކު ވިއްޔާ ލަމްހާއާއެކު ދިއުމަށް ޔޫޝައު ވަނީ އައިކާއަށް އަންގާފައެވެ. އަދި ލަމްހާއަށްވެސް ވަނީ އެގޮތަށް އައިކާ ގޮވައިގެން ދިއުމަށް އަންގާފައެވެ. ނަމަވެސް ލަމްހާ ކުޑަކޮށް ބަލިކޮށް އުޅޭތީއާވެސް އެކުގައި ގޭ ކައިރީ ފިހާރައަކަށް ދާތީ އައިކާ ދިޔައީ އެކަންޏެވެ. އޭނާ ފިހާރައަށް ވަދެ ބޭނުންވާ ސާމާނު ގަނެގެން ގޮސް ގެއަށް ވަދެވަދެ ހުއްޓާ ފޯނަށް މެސެޖެއް އައެވެ.
"އައިމް ބެކް!!" ނުދަންނަ ނަންބަރަކުން އައިސްފައިވާ އެ މެސެޖް ފެނުމުން އޭނާގެ ހިތް ތެޅިގަތެވެ. އަނެއްކާ އެމީހަކީ ކާކުބާއެވެ.
"ކޮންގްރޭޓްސް!! ޕްރެގްވީމަ މިހާރު އަދި މާ ލޯބި.. މިހާރު ކިތައް މަސްތަ؟ ވިހާނެ ދުވަހެއްގެ އިންތިޒާރުގަ އަހަރެން މި ހުންނަނީ.. ލައްކަ ދުވަސް ވެއްޖެ ދުރުގަ ހުންނަތާ.. ދާނަން އިނގޭ މީޓްކޮށްލަން.. އެޑްރެސް ދީބަލަ.. ހަނދާން ނައްތާލެވޭތޯ ވަރަށް މަސައްކަތްކޮށްފިން.. އެކަމް އެކަމެއް ނުވި.." ފުލުފުލުގައި މެސެޖުތަކެއް ލިބެމުން ދިޔައެވެ.
"ކާކު ތީ؟" ވަރަށް ނުރުހިފައި އައިކާ މެސެޖެއް ފޮނުވާލިއެވެ. ނުދަންނަ ނަންބަރުތަކުން ފޮނުވާ މެސެޖުތަކާއި ފޯނުކޯލްތަކަށް ޖަވާބުދިނުމަކީ އޭނާ ކޮށްއުޅޭ ކަމަކަށް ނުވިނަމަވެސް އެމީހަކީ އޭނާ ވަރަށް ރަނގަޅަށް ދަންނަ މީހެއްކަން މެސެޖުތަކުން އެނގޭތީ، އެއީ ކާކުކަން އެނގެން އޭނާ ބޭނުންވިއެވެ.
"ކަލާގެ ލޯތްބަށް ފެންބޮވައިގެންފައިވާ އާވާރާއެއް.." ޖަވާބު ލިބުނެވެ. އައިކާ ގާތަށް އައީ އަމަށަކު ރުޅިއެއް ނޫނެވެ. އެ ޖަވާބުން އޭނާއަށް އެއީ މާޒްގެ ކަމެއްކަމުގައި ޤަބޫލުކުރެވުނެވެ. މިފިރިހެނާ އަދިވެސް އަހަރެންގެ ދިރިއުޅުމުން ދުރަށް ދާކަށް ނުވޭހެއްޔެވެ؟ އޭނާ އެހެރީ ހަމަ ރަނގަޅަށްވެސް ދުނިޔޭން މޮޔަވެފައެވެ. އޭނާއަށް އަހަރެން މިހުރި ހާލެއް ނުފެނޭ ހެއްޔެވެ؟ މިވަރުން އޭނާއަށް އަހަރެން ނުލިބޭނެކަން އެނގެން ވެއްޖެއެއް ނޫން ހެއްޔެވެ؟ އައިކާ ހިތާހިތުން މާޒްއާ ދިމާއަށް އެއްޗެހި ކިޔަމުން ގޭތެރެއަށް ވަނެވެ.
**********
"ހޭއި ލަމް.." ލަމްހާ އެކަނިމާއެކަނި ފިހާރައަކަށް ވަންނަނިކޮށް ދަންނަ އަޑަކުން ގޮވާލިހެން ހީވެގެން އޭނާ ބަލާލިއެވެ.
"އައްޒާމް!؟" ޔަޤީން ނުވެފައި ލަމްހާ އަހާލިއެވެ. އައްޒާމް ބޯޖަހާލީ ޔަޤީންކަން ދިނުމުގެ ގޮތުންނެވެ.
"ނުވެސް އެނގުނު ދޯ؟"
"ކިހިނެއް އެނގޭނީ؟ މުޅި މީހާ ތިހުރީ ބަދަލުވެފައެއްނު.. އޭރުގަ ކުދިން ކިޔާ އުޅުނު ކަޅު ބަ.."
"ބަބުރުކަމެއްވެސް ނެތެއްނު.." ލަމްހާ ބުނަންފެށި ޖުމްލަ އައްޒާމް ފުރިހަމަކޮށްލިއެވެ. އައްޒާމް އެހަނދާން އޮތުމުން ލަމްހާއަށް ހެވުނެވެ.
"ކޮބާ ކިހިނެއްތަ ހާލު؟" އައްޒާމް އަހާލިއެވެ.
"ރަނގަޅޭ.. އައްޒާމް ކިހިނެއް؟" ލަމްހާވެސް އަހާލިއެވެ.
"ރަނގަޅު.. ހާދަ ގިނަ ދުވަހެއް ފަހުންނޭ ދޯ މި ދިމާވީ.."
"އާނ.. ދިމައެއް ނުވާނެއެއްނު.. މާލެއިން ކިޔެވުން ނިންމާލިގޮތަށް ބޭރަށް ދިޔަގޮތަށް މިހާރުވިއްޔަ ތި ފެނިލީ.. ފަސްއަހަރު ފަހުން.. މިހާރު ކިޔެވުން އެއްކޮށް ނިންމާލީތަ؟" ލަމްހާ އަހާލިއެވެ.
"އާނ.. މިހާރު ދެން މި އެއްކޮށް ނިންމާލީ.. ލަމް ކީއްކުރަނީ؟" އައްޒާމް އަހާލިއެވެ. ސްކޫލް ދައުރުގެ ދެ ރައްޓެހިން ދިމާވުމުން ދެމީހުންވެސް ތިބީ ނުހަނު އުފާވެފައެވެ.
"އަހަރެންނަށް ބަލާލީމަވެސް އެނގެއެއްނު ކީއްކަން ކުރަނީ.." ލަމްހާ ކުޑަކޮށް އެނގެން ފަށާފައިވާ އޭނާގެ ބަނޑުގައި އަތް ޖައްސާލަމުން ބުނެލިއެވެ.
"މެރީކުރީ ދޯ؟ ޕްރެގް ދޯ؟ ކިތައް މަސް؟" އައްޒާމް އެހެން އަހާލުމުން ލަމްހާ ބޯޖަހާލާފައި މިހާރު މިއޮތީ ހަތަރު މަހަށޭ ބުނެލިއެވެ.
"ކޮބާ ފިރިމީހާ؟ އެކަނިތަ ބާޒާރަށް ނުކުމެ ތިއުޅެނީ؟"
"ފިރިމީހާ ވީ އޮފީހުގަ.. މީ އަނެއްހެން ބާޒާރުކުރާކަށް ނޫނޭ މި ނުކުތީ.. މީ ކޫސަނި ކާއެއްޗެއް ގަނެލަންވެގެން.." ހީނގަންނަމުން ލަމްހާ ބުނެލިއެވެ.
"އެހެންދޯ ވީ.. ހޫމް.. ދެން ކޮންއިރަކުން ފިރިމީހާ ތަޢާރަފްކޮށްދޭނީ؟" އައްޒާމް އަހާލިއެވެ.
"މިރޭ އަންނަންވީނު އަހަރެމެން ގެއަށް.. އޭރުން އަހަރެންގެ ފިރިމީހާ ތަޢާރަފްކޮށްދޭނަން.." ލަމްހާ އެހެން ބުނެލުމުން އައްޒާމް އެއްބަސްވުމުގެ ގޮތުން ބޯޖަހާލިއެވެ.
ލަމްހާ ގެއަށް އައިއިރު ދޮރުމަތީގައި ޔޫޝައުގެ ބޫޓު ހުރުމުން ޔޫޝައު ގެއަށް އައިކަން އޭނާއަށް އެނގުނެވެ. އޭރު އަދި ޔޫޝައުގެ އޮފީސް ނިމޭ ގަޑި ޖެހެން ކައިރިވެސް ނުވެއެވެ. އެހެންކަމުން ޔޫޝައު ގެއަށް އަންނާނީ ކޮންމެވެސް ބޮޑުކަމެއް ވެގެންކަން އޭނާއަށް އެނގުނެވެ.
"ޔޫ!" ކޮޓަރިއަށް ވަތްއިރު އެއްޗެހި ބަދަލުކޮށްލައިގެން އެނދުގައި އޮށޯވެ ލޯމަރާލައިގެން އޮތް ޔޫޝައު ފެނުމުން ލަމްހާ ގޮވާލިއެވެ. އެއާއެކު ވަރުބަލިކަމާއެކު ޔޫޝައު ދެލޯ ހުޅުވާލިއެވެ.
"ކިހިނެއްވީ؟" ޔޫޝައުގެ ރަތްވެފައިވާ ދެލޯ ފެނުމުން ކަންބޮޑުވެފައި ލަމްހާ އަހާލިއެވެ.
"ހުން އައީ.." ޔޫޝައުއަށް އެހެން ބުނެވުނުތަނާ އޯކާ ދެމިގަތެވެ. އޭނާއަށް އެނދުން ރަނގަޅަށް ނުތެދުވެވެނީސް ހޮޑުލެވިއްޖެއެވެ. ޔޫޝައުއަކީ ހުން އައިސްފިނަމަ ވަރަށް ބޮޑުވަރުވާ މީހެއްކަން އެނގޭތީ ލަމްހާ ވަރަށް ކަންބޮޑުވިއެވެ. ހަށިގަނޑަށް ލިބުނު ލޮޑުކަމާއެކު ޔޫޝައުއަށް ބޮލުގައި ހިފަހައްޓާލެވުނީ ބޮލަށް އެނބުރުން އަރާހެން ހީވާތީއެވެ. އޭނާއަށް އެނދުގައި އިށީނދެވުނުތަނާ އޭނާ އެނދުމައްޗަށް ދެމުނެވެ. ލަމްހާ އަވަސްއަވަހަށް މުށިތަކުމަތީ ހުރި ހޮޑުތައް ސާފުކޮށްލިއެވެ. އަދި ޔޫޝައު ހޭއަރާތޯ ގޮވަން ފެށިއެވެ.
"ޔޫ! ޔޫ!" ޔޫޝައުގެ މޫނުގައި ފެން އުނގުޅަމުން ލަމްހާ ގޮވަމުން ދިޔައެވެ. އިރުކޮޅަކު އެގޮތަށް ފެން އުނގުޅާ ހަދަން ފެށުމުން ޔޫޝައު ލޯ ހުޅުވާލިއެވެ. އޭނާ ލަމްހާއަށް ބަލާލަމުން ހިނިތުންވެލެވޭތޯ މަސައްކަތްކުރިއެވެ. ނަމަވެސް ހަށިގަނޑުގައި އަޅަމުންދިޔަ ވޭނުގެ ސަބަބުން އެކަންވީ ނާކާމިޔާބެވެ.
"އަހަރެން އެބަ އަންނަން ސޫޕް ހަދައިގެން.. އޭރުންނެއްނު ގައިގަ ވަރުޖެހޭނީ.. ހިނގާ ހޮސްޕިޓަލަށް ދާން.." ލަމްހާ ވަރަށް ލޯތްބާއެކު ބުނެލިއެވެ.
"މީ.. އެވަރު ކަމެއް.. ނޫނޭ.. ބޭސް ކައިގެން.. ނިދާލަނިކޮށް.. ރަނގަޅުވެދާނެ.." ޔޫޝައު ލަސްލަހުން އެހެން ބުނެލުމުން ލަމްހާ ބޯ ހޫރާލިއެވެ.
"އުހުނ.. ދާންވާނެ.."
"މާދަމާއަށް.. ރަނގަޅު ނުވެއްޖެއްޔާ.. ދާނީ.. އޯކޭ އެއްނު.." ޔޫޝައު އެހެން ބުނެލުމުން ލަމްހާ އެންމެ ރަނގަޅޭ ބުނެ ބޯޖަހާލިއެވެ. އަދި ދާން ހިނގައިގަތުމުން ޔޫޝައު އޭނާގެ އަތުގައި ހިފެހެއްޓިއެވެ.
"ކޮންތާކަށް ތިދަނީ؟"
"ސޫޕް ހަދަން.. އެހާ ގިނައިން ހޮޑު ލެވުނީމަ ތިއޮތީ މާބޮޑަށް ވަރުބަލިވެފަ.. އެއްޗެއް ކައިލައި ބޮއިލައިގެން ބޭސް ކައިގެން ނިދާލާނީ އިނގޭ.. އެބަ އަންނަން.." ލަމްހާ ދާން ހިނގައިގަތުމުން އަނެއްކާވެސް ޔޫޝައު އޭނާ ހިފެހެއްޓިއެވެ.
"މަޑުކޮށްބަލަ.. އިކާ ގާތު.. ބުނެބަލަ ސޫޕް ހަދާލަން.." ޔޫޝައު ބޭނުންވީ ލަމްހާ އޭނާ ގާތުގައި ބައިންދާށެވެ.
"އޯކޭ.. މި އަންނަނީ އިނގޭ ބުނެފަ.." ލަމްހާ އެހެން ބުނެފައި ދިޔައީ އައިކާ ގާތުގައި ބުނާށެވެ.
"އައިކާ! ވަރަށް އަވަހަށް ނޫޑްލްސް ސޫޕެއް ހަދާލަބަލަ.. މިއުޅެނީ ޔޫޝައު ހުން އައިސްގެން.." ލަމްހާގެ އަޑު އިވިފައި އައިކާ ހައިރާންވިއެވެ.
"ކޮންއިރަކު؟ ޔޫޝް ނުވެސް ބުނޭ އަހަރެން ކައިރިއަކު ތިކަހަލަ ވާހަކައެއް.. އަހަރެން ގާތު ބުނީ މާ ވަރުބަލިވީމަ ގެއަށް އައީއޭ.." އައިކާ އެހެން ބުނެލުމުން ލަމްހާވެސް ހައިރާންވިއެވެ.
"ވެދާނެ ގެއަށް އައި ފަހުން ހުން އައީކަމަށް.. އަވަހަށް ސޫޕް ހަދާލައްޗޭ.. ޔޫޝައު ހިތްހަމައެއް ނުޖެހުނު އަހަރެން ހަދާ ސޫޕް ބޯކަށް.. އައިކާގެ އަތުގަ ތިހުރީ ކޮންކަހަލަ ޖާދޫއެއްބާއޭ އަހަރެންގެ ހިތަށްއަރަނީ.. މިއޮއްވަރަށް ކައްކާއިރުވެސް އަހަރެންނަކަށް އައިކާ ކާއެއްޗެހީގަ ތި ލައްވާ މީރު ރަހައެއް ނުލެއްވުނު.." ލަމްހާ އައިކާއަށް ތަޢުރީފްކޮށްލުމުން އައިކާ ރަކިވިއެވެ.
"ކެއްކުމަކީވެސް ހުނަރެއް.. ލަމްހާ ކައްކާ އެއްޗެހިވެސް ވަރަށް މީރު.. އެކި މީހުންގެ ހުންނާނީ އެކި ހުނަރު އެކި ވަރަށް.. އެގޮތަށް އައިކާ ލަމްހާއަށްވުރެ ކައްކަން މޮޅީ.. ހަމަ އެގޮތަށް އައިކާއަށްވުރެ މޮޅަށް ލަމްހާއަށް ކުރެވޭ ކަންކަންވެސް ހުންނާނެ.." ހާޖަރާއަށް އެމީހުން ދެއްކި ވާހަކަ އަޑުއިވުމުން އެއްޗެކޭ ނުބުނެއެއް ނީނދެވުނެވެ. ލަމްހާ ހިނިއައިސްފައި ހުރެ ބޯ ހޫރާލަމުން ކޮޓަރިއަށް ވަނީ ހާޖަރާގެ އަނަގަގަދަކަމޭ ހިތަށް އެރުމުންނެވެ.
އެރޭގެ ވަގުތެވެ. އައްޒާމް ލަމްހާމެންގެއަށް ދިޔައީ ރޭގަޑު ނުވައެއް ޖަހަން ގާތްވެފައި ވަނިކޮށެވެ. ގޭގެ ބެލް އަޅާލި އަޑަށް ޓީވީއަށް ގެއްލިފައި އިން އައިކާއަށް ސިހިފައި ދޮރަށް ބަލާލެވުނެވެ.
"އައިކާ! ދޮރު ހުޅުވަބަލަ.. އަހަރެން މިދަނީ.." ލަމްހާ އެހެން ބުނެލުމުން އައިކާ ބުރުގާ އަޅާލައިގެން ގޮސް ދޮރު ހުޅުވާލިއެވެ. އެވަގުތު އޭނާއަށް ސިހުމެއް ލިބުނީ ކުރިމަތީގައި ހުރި އައްޒާމް ފެނުމުންނެވެ. އައްޒާމްއަށްވެސްވީ ހަމަ އައިކާއަށް ވީފަދަ ގޮތެކެވެ. އެދެމީހުން ބަހެއްވެސް ނުބުނެ އެކަކު އަނެކަކަށް ބަލަހައްޓައިގެން ތިއްބާ ލަމްހާ ކޮޓަރިން ނުކުމެއްޖެއެވެ.
