ޕާކިސްތާނަކީ މިސައިލް ޓެކްނޮލޮޖީގައި މުހިންމު ކާމިޔާބީތަކެއް ޙާސިލުކޮށްފައިވާ ޤައުމެކެވެ. އެހެންވެ، އެމެރކާއިން އަޅާ ދަތިކުރުމުގެ ފިޔަވަޅުން ޕާކިސްތާންގެ މިސައިލް އުފެއްދުމަކަށް ހުރަހެއް އެޅޭނެކަމަކަށް ނުބެލެވެއެވެ.
އެމެރިކާއިން ޕާކިސްތާންގެ މިސައިލް ޕްރޮގްރާމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ހަގީގީ އަމާޒަކީ އިސްލާމްއާބާދާއެކު ވިޔަފާރިކުރާ ކުންފުނިތަކަށް ދަތިކުރުމެވެ.
މިއީ 2021 ވަނަ އަހަރަށްފަހު އެމެރިކާއިން ޗައިނާއާއި ޕާކިސްތާނުގެ ކުންފުނިތަކަށް ދަތިކުރުމަށް ފިޔަވަޅު އަޅާ ހަވަނަ ބުރެވެ. އެމެރިކާގެ މި ދަތިކުރުމުގެ ފިޔަވަޅު އައިސްފައި ވަނީ، ޕާކިސްތާނުން މެދު ރާސްތާއަށް ދަތުރުކުރާ އަބާބީލް ބެލިސްޓިކް މިސައިލްގެ ދެވަނަ ޓެސްޓެއް ކުރިތާ ދެ ދުވަސް ފަހުންނެވެ.
ޕާކިސްތާނުގެ ގިނަ މިސައިލްތަކަކީ ޗައިނާއާ ގުޅިގެން އުފައްދާފައިވާ މިސައިލްތަކެކެވެ. ނަމަވެސް ހުރިހައި މިސައިލަކަށްވެސް ނަން ދީފައި ވާނީ ޕާކިސްތާނުންނެވެ.
ޕާކިސްތާންގައި ބޭނުން ކުރާ މިސައިލްގެ ޓްރެކިންގ ސިސްޓަމްތަކަކީ ޗައިނާއިން ތަރައްޤީކޮށްފައިވާ ނިޒާމްތަކެވެ. 2018 ވަނަ އަހަރު ސައުތު ޗައިނާ މޯނިން ޕޯސްޓުން ރިޕޯޓްކޮށްފައިވާ ގޮތުގައި ޗައިނާއިން ޕާކިސްތާނަށް ޒަމާނީ ޓްރެކިން ސިސްޓަމެއް ވިއްކާލީ އިސްލާމްއާބާދުން ބެލިސްޓިކް މިސައިލްތަކުގެ ރާސްތާ ދިގުކުރުމަށް ކުރާ މަސައްކަތަށް އެހީތެރިވެ ދިނުމުގެ ގޮތުންނެވެ.
އެންމެ ފަހުގެ ދަތިކުރުމުގެ ފިޔަވަޅުތައް އެޅިއިރު އެމެރިކާ ސަރުކާރުން ބުނެފައި ވަނީ ޕާކިސްތާންގެ ދިގު ރާސްތާގެ ބެލިސްޓިކް މިސައިލްތައް އުފެއްދުމުގައި ޕާކިސްތާނުގެ ނޭޝަނަލް ޑިވެލޮޕްމަންޓް ކޮމްޕްލެކްސްއާ ގުޅިގެން ބެއިޖިން ރިސާޗް އިންސްޓިޓިއުޓް އޮފް އޮޓޮމޭޝަން ފޯ މެޝިން ބިލްޑިން އިންޑަސްޓްރީ (އާރުއައިއޭއެމްބީ) އިން މަސައްކަތް ކޮށްފައިވާ ކަމަށެވެ.
މިއީ ޝާހީން-3 އަދި އަބާބީލް މިސައިލް ފަދަ ޒަމާނީ މިސައިލް ނިޒާމުތަކުގައި ދުރަށް ދަތުރުކުރާ ރޮކެޓް މޯޓަރުތައް ހަރުކޮށް ޓެސްޓުކުރުމަށް މަސައްކަތް ކުރާ ފަރާތްތަކެވެ.
މީގެ އިތުރުން ޗައިނާގެ ތިން ކުންފުންޏެއް ކަމަށްވާ ހުބޭ ހޫޗަންގްޑާ އިންޓެލިޖެންޓް އިކުއިޕްމަންޓް ކޯ، ޔުނިވާސަލް އެންޓަޕްރައިސް އަދި ޝިއާން ލޮންގްޑޭ ޓެކްނޮލޮޖީ ޑިވެލޮޕްމަންޓް ކޯ އަށް ވެސް އެމެރިކާއިން އަމާޒުކޮށްފައިވެ އެވެ. ޕާކިސްތާނުގައި ހުންނަ އިނޮވޭޓިވް އިކުއިޕްމަންޓާއި ޗައިނާގެ ރައްޔިތެއް ކަމަށްވާ ލުއޯ ޑޮންގްމޭ ('ސްޓީލް' ލުއޯގެ ނަމުން ވެސް ނަންދެވިފައިވާ) މީހާ އާ ދެކޮޅަށްވެސް ދަތިކުރުމުގެ ފިޔަވަޅުތައް އެމެރިކާއިން އަޅާފައި ވެއެވެ. މިހުރިހައި ފަރާތަކީ ޕާކިސްތާންގެ މިސައިލް ނިޒާމަށް ވާގިވެރިވާ ފަރާތްތަކެވެ.
އެމެރިކާގެ ސްޓޭޓް ޑިޕާޓްމަންޓުން ބުނެފައި ވަނީ އެނގިހުރެ، އެމެރިކާގެ ބްލެކްލިސްޓުގައި ހިމަނާފައިވާ ފަރާތަކާ އެކު މިސައިލް ޓެކްނޮލޮޖީގެ ސާމާނުތައް ބަދަލު ކުރުމާ ގުޅިގެން ދަތިކުރުމަށް ފިޔަވަޅު އެޅީކަމަށެވެ. އަދި މިދަތިކުރުމުގެ ފިޔަވަޅުތައް ބޭނުން ކުރަނީ ވެޕަންސް އޮފް މާސް ޑިސްޓްރަކްޝަން، ޚާއްސަކޮށް ދުރުރާސްތާ އަށް ފޯރާ ހަތިޔާރު ފެތުރުން ހުއްޓުވުމަށް ކަމަށް ވެސް އެމެރިކާ އިންބުނެއެވެ.
2024 ވަނަ އަހަރުގެ އޭޕްރީލް މަހު ވެސް އެމެރިކާއިން ޕާކިސްތާނުގެ ދުރު ރާސްތާގެ މިސައިލް ޕްރޮގްރާމަށް ދަތިކުރުމުގެ ފިޔަވަޅުތަކެއް އެޅިއެވެ. އެއީ، ބެލަރޫސް އާއި ޗައިނާގެ ހަތަރު ކުންފުންޏަކުން އެހީތެރިވެ ދިނުމުން އެފަރާތްތައް އެމެރިކާއިން ބްލެކްލިސްޓް ކުރުމުންނެވެ.
އޭރު ޕާކިސްތާނުގެ ފޮރިން މިނިސްޓްރީން ބުނެފައި ވަނީ އިސްލާމްއާބާދުގެ ބެލިސްޓިކް މިސައިލްސް ޕްރޮގްރާމށް ސަޕްލައިކުރާ ބޭރުގެ ކުންފުނިތަކާ ދެކޮޅަށް "އެއްވެސް ހެއްކެއް ނެތި" ފިޔަވަޅު އަޅަނީ ކަމަށެވެ.
"އެކްސްޕޯޓް ކޮންޓްރޯލަކީ ސިޔާސީ ހަތިޔާރަކަށް ހެދުމާ ޕާކިސްތާން ދެކޮޅު،" ފޮރިން އޮފީހުގެ ތަރުޖަމާނު މުމްތާޒް ޒަހުރާ ބަލޫޗް ނެރުނު ބަޔާނެއްގައި ވިދާޅުވި އެވެ.
