ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު، ޕްރިންސްޓަން ޔުނިވަރސިޓީގެ ޕަބްލިކް އެންޑް އިންޓަރނޭޝަނަލް އެފެއާޒް ސްކޫލްގެ އެޑްވަރޑްސް އެސް. ސެންފޯޑް ޕްރޮފެސަރ އޮފް ޕޮލިޓިކްސް އެންޑް އިންޓަރނޭޝަނަލް އެފެއާޒް، ޑީން އަމާނީ އޭ. ޖަމާލްގެ ދަޢުވަތަކަށް، ޕްރިންސްޓަން ޔުނިވަރސިޓީގައި މިރޭ ތަގުރީރު ކުރައްވާނެއެވެ.
މި ހަރަކާތަކީ "ޑީންސް ލީޑަރޝިޕް ސީރީޒް" ގެ ދަށުން ކުރިއަށްގެންދާ ހަރަކާތެކެވެ.
އެމަނިކުފާނުގެ ތަގުރީރު ކުރައްވަން ހަމަޖެހިފައިވަނީ ޝަރަފުވެރި އާތަރ ލުއިސް އޯޑިޓޯރިއަމްގައެވެ. މި ތަގުރީރަށްފަހު ދަރިވަރުންނާއި މުދައްރިސުންނާއެކު 'ފަޔަރސައިޑް ޗެޓް' އަކާއި ސުވާލާއި ޖަވާބު ސެޝަނެއް ބޭއްވުމަށްވެސް ވަނީ ހަމަޖެހިފައެވެ.
ރައީސްގެ ތަގުރީރުގައި މައިގަނޑު ގޮތެއްގައި އަލިއަޅުވާލައްވާނީ ދިވެހިރާއްޖެއާ ގުޅުންހުރި މުހިންމު މައުޟޫޢުތަކުގެ މައްޗަށެވެ. މީގެ ތެރޭގައި ކުދި ޖަޒީރާ ތަރައްގީވަމުންދާ ގައުމުތައް (ސިޑްސް)، އިންޑިއާ ކަނޑު، އަދި މޫސުމަށް އަންނަ ބަދަލުތައް ހިމެނެއެވެ.
މި ޒިޔާރަތަކީ ތަޢުލީމީ އަދި ބައިނަލްއަގުވާމީ ކަންކަމުގައި ދުނިޔޭގެ އެކި ފަރާތްތަކާއެކު ގުޅުންބަދަހިކުރުމަށް އެމަނިކުފާނު ދެއްވާ އަހަމިއްޔަތަށް ބާރުދޭ ހެއްކެކެވެ.
ރައީސުލްޖުމްހޫރިއްޔާ ޕްރިންސްޓަން ޔުނިވަރސިޓީއަށް ކުރައްވާ މި ޒިޔާރަތަކީ އެކުވެރި ދައުލަތްތަކުގެ ޢާންމު މަޖިލީހުގެ 79 ވަނަ ސެޝަންގައި ބައިވެރިވެވަޑައިގަތުމަށް އެމެރިކާއަށް ކުރައްވާ ދަތުރުފުޅުގެ ރަސްމީ އެޖެންޑާގައި ހިމެނޭ ކަމެކެވެ.
