އދގެ އާންމު ޖަލްސާގައި ޒަޔަނިސްޓުންގެ ބޮޑު ވަޒީރުގެ ވާހަކަ ނިންމާލުމާއެކު އިޒްރޭލުން ވަނީ ލުބުނާންގެ ވެރިރަށް ބެއިރޫތަށް ވައިގެ މަގުން ބޮން އަޅަން ފަށާފައެވެ. ނަތަންޔާހޫގެ ތަޤްރީރުގައި ބުނެފައި ވަނީ ބެއިރޫތުގައި ޙިޒުބުﷲ މީހުން އުޅޭ ސަރަޙައްދުގައި ގެތަކުގެ ބަދިގޭގައިވެސް މިސައިލްތައް ރައްކާކޮށްފައިވާ ކަމަށެވެ.
ނަތަންޔާހޫގެ ވާހަކަ ވަނީ މީޑިއާގައި ޖޯކަކަށް ވެފައެވެ. މީޑިއާއިން ސުއާލުކޮށްފައި ވަނީ 12 ފޫޓެއްހައި ދިގު މިސައިލްތައް މީސްމީހުން ގޭތެރޭގައި ގެންގުޅޭ އިރު އެކަހަލަ ކިތައް މިސައިލް ރައްކާކޮށްފައިވާކަން ނަތަންޔާހޫއަށް އެނގޭ ހެއްޔެވެ؟
އިޒްރޭލުން ވައިގެ ޙަމަލާ ދީފައި ވަނީ ޙިޒުބުﷲ މީހުން ގިނައިން އުޅޭ ދަހިއްޔާ އަވަށަށެވެ. އެ އަވަށަށް ބޮން އަޅައި ހަތް އުސް އިމާރާތް ހިމެނޭ އެޕާޓްމަންޓް ބްލޮކެއް އެއްކޮށް ބިމާ ހަމަ ކޮށްފައި ވެއެވެ.
އދގައި އިޒްރޭލަށް ޙަމަލާތައް ހުއްޓާލުމަށް ގޮވާލައި ޤަރާރެއްވެސް ފާސްކޮށްފައި ވެއެވެ. މި ޤަރާރަށް ޖަޕާނުން ތާއީދު ކުރިއިރު ދުނިޔޭގެ ދެކުނު ސަރަހައްދުގެ ޤައުމުތަކަށް ވާގިވެރިވާ ކަމަށް ބުނާ އިންޑިއާއިން ވަނީ ޤަރާރާ ދެކޮޅު ހަދާފައެވެ. އިންޑިއާގެ މުޙައްލިލުން ވަނީ އިންޑިއާ ސަރުކާރުންވެސް އިޒްރޭލަށް ވާގިވެރިވަނީ ކަމަށް ބުނެ ތުހުމަތު ކޮށްފައެވެ.
ޔޫރަޕްގެ ޚާރިޖީ ސިޔާސަތާ ބެހޭ ވެރިޔާ ޖޯސެފް ބޮރެލް އދގައި ނޫސްވެރިންނާ ވާހަކަ ދައްކަވަމުން ވިދާޅުވެފައި ވަނީ އިޒްރޭލުން އެއްވެސް ފަރާތެއްގެ ވާހަކަ އަޑެއް ނާހާ ކަމަށެވެ. އަދި ނަތަންޔާހޫ (ގެ އުދުވާން) ހުއްޓުވޭނެ މީހަކުވެސް ނެތް ކަމަށެވެ.
ދެކުނު ބެއިރޫތަށް ދިން ޙަމަލާގައި 700 މީހުން މަރާލާފައި ވެއެވެ. މުހައްލިލުން ދެކޭ ގޮތުގައި މިއީ އިޒްރޭލުން ދެމުންދާ އުދުވާނުގެ އައު ބާބެކެވެ. އަދި އިޒްރޭލުން ބޭނުން ވަނީ މި ހަމަނުޖެހުންތަކުގެ ތެރެއަށް އީރާނު ވައްދައި ހަމަނުޖެހުން އިތުރަށް ފުޅާ ކުރާށެވެ.
