އާޓްސް އެންޑް ކަލްޗަރ ސެންޓަރެއް ތަރައްޤީކުރުމަށް ބިޒްނަސް ސެންޓަރ ކޯޕަރޭޝަން (ބީސީސީ) އާއި މޯލްޑިވްސް ޕޮލިޓެކްނިކްއިން އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ސޮއިކުރެއްވީ ބީސީސީގެ ޗީފް ސްޓްރެޓެޖިކް އޮފިސަރ މަރިޔަމް ނަޝާ އާއި މޯލްޑިވްސް ޕޮލިޓެކްނިކުގެ ސީއީއޯ ޒޫޝަން ކަމާލުއްދީނެވެ.
މި އެއްބަސްވުމުގެ ދަށުން، ބީސީސީ އާއި މޯލްޑިވްސް ޕޮލިޓެކްނިކްއިން އާޓްސް އެންޑް ކަލްޗަރ ސެންޓަރު ހިންގުމާއި މެނޭޖްކުރުމުގައި ގުޅިގެން މަސައްކަތްކުރުމަށް ވަނީ ނިންމާފައިއެވެ. މީގެ ތެރޭގައި ސެންޓަރަށް ބޭނުންވާ މުހިންމު ވަސީލަތްތައް ހޯދައިދިނުމާއި، މި ވަސީލަތްތައް ބޭނުންވާ ފަރާތްތަކަށް ދޫކުރުމާ ގުޅޭ އިންތިޒާމުތައް ހަމަޖައްސައިދިނުންވެސް ހިމެނެއެވެ.
މި އެއްބަސްވުމުގެ ދަށުން ތަޢުލީމީ ވަސީލަތްތައް ފޯރުކޮށްދިނުމާއި، ބޭނުންވާ ލަފާ އާއި ލޮޖިސްޓިކަލް އެހީތެރިކަން ފޯރުކޮށްދިނުން ހިމެނޭކަމަށް ބީސީސީން ވިދާޅުވެފައިވެއެވެ.
މީގެ އިތުރުން، އާޓްސް އެންޑް ކަލްޗަރ ސެންޓަރު ޕްރޮމޯޓްކުރުމަށާއި، ވިޔަފާރިވެރިންނާއި އަމިއްލަ ޖަމްޢިއްޔާތައް ފަދަ ކަމާގުޅޭ ފަރާތްތަކަށް ސެންޓަރާ ބެހޭ އިތުރު މަޢުލޫމާތު ދިނުމަށް އެކި ޙަރަކާތްތައް ރާވައި ހިންގުމަށް މޯލްޑިވްސް ޕޮލިޓެކްނިެކްނިކާ އެކު މަސައްކަތްކުރާނެ ކަމަށް ބީސީސީން ވިދާޅުވެފައިވެއެވެ.
