13 ފުލުހަކު އެކި ގައުމުތަކުގައި ހިންގާ ބައިނަލްއަގުވާމީ ތަމްރީނު ޕްރޮގްރާމްތަކުގައި ބައިވެރިވުމަށް ފުރައިފިއެވެ.
ދިވެހި ފުލުހުންގެ ހިދުމަތުން މިއަދު ހާމަކުރި ގޮތުގައި، މި 13 ފުލުހުންގެ ތެރެއިން 10 ފުލުހުން ދަތުރުކޮށްފައިވަނީ ތުރުކީއަށެވެ. އޭގެ ތެރޭގައި 5 ފުލުހުން 2024 އިން 2026 އަށް ދެމިގެންދާ 2 އަހަރުގެ މގެ މާސްޓަރސް ޕްރޮގްރާމެއްގައި ބައިވެރިވާއިރު، އަނެއް 5 ފުލުހުން 2024 އިން 2029 އަށް ކުރިއަށްދާ 5 އަހަރުގެ ބެޗްލަރސް ޕްރޮގްރާމެއްގައި ބައިވެރިވާނެއެވެ.
ތުރުކީގައި ކުރިއަށްދާ މި ތަމްރީނުތަކުގައި ތުރުކީ ބަސް، ގާނޫނު ތަންފީޒުކުރުން، ލީޑަރޝިޕް، ޓެރަރިޒަމް، ސެކިއުރިޓީ މެނޭޖްމަންޓް އަދި ފިޒިކަލް އަދި ހަތިޔާރު ބޭނުންކުރުމުގެ ތަމްރީނުތައް ހިމެނެއެވެ.
އިތުރު 3 ފުލުހުން ތަމްރީނު ފުރިހަމަކުރަނީ ސިންގަޕޫރު އަދި އެމިރޭޓްސްގައެވެ. މީގެ ތެރެއިން ސަބް-އިންސްޕެކްޓަރ އަޙްމަދު ތައުސީފް އަދި އާދަމް ފަތުޙީ ބައިވެރިވަނީ ސިންގަޕޫރު ޕޮލިސް ފޯސްގެ 10 މަސްދުވަހުގެ ކޯހެއްގައެވެ. މި ކޯސް ފެށޭނީ 2024 ސެޕްޓެންބަރު 30 ގައި އަދި ނިމޭނީ 2024 ޖޫން 30 ގައެވެ. މި ކޯހުގެ މަޤްޞަދަކީ ލީޑަރޝިޕް އަދި ޓެކްޓިކަލް ހުނަރުތައް އިތުރުކުރުމެވެ.
ކޮންސްޓަބަލް ޢާއިޝަތު ޒޫނާ މުޙައްމަދު ބައިވެރިވަނީ އަބޫދާބީ ޕޮލިސް އެކަޑަމީގެ އެކްސްޗޭންޖް ޕްރޮގްރާމްގައެވެ. މި 4 މަސްދުވަހުގެ ޕްރޮގްރާމް ފެށޭނީ 2024 އޮކްޓޯބަރު 1 ގައި އަދި ނިމޭނީ 2025 ޖަނަވަރީ 31 ގައެވެ.
ދިވެހި ފުލުހުންގެ ޚިދުމަތުން ބުނީ މި ތަމްރީނުތަކުގައި ދިވެހި ފުލުހުން ބައިވެރިވުމުން، އެ ފަރާތްތަކުގެ ހުނަރާއި ތަޖުރިބާ އިތުރުވެ، ޚިދުމަތުގެ ފެންވަރު މަތިވާނެ ކަމަށެވެ.
