ދިވެހިރާއްޖޭގެ އާބާދީގެ 70 އިންސައްތައަށްވުރެ ގިނަ މީހުން ލަފާކުރެވިފައިވާ މިންވަރަށްވުރެ ގިނައިން ލޮނު ބޭނުންކުރާކަމާމެދު ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ކަންބޮޑުވުން ފާޅުކޮށްފިއެވެ.
ލޮނު ގިނައިން ބޭނުންކުރުމަކީ ސިއްޙަތަށް ނުރައްކާތެރި ކަމެކެވެ. އަދި ދުވާލަކަށް ލަފާކުރެވިފައިވާ މިންވަރަށްވުރެ އިތުރަށް ލޮނު ބޭނުންކުރުމުން އެކި ބާވަތުގެ ސިއްޙީ މައްސަލަތަކާ ކުރިމަތިލާން ޖެހިދާނެއެވެ.
ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އިން 2020 އިން ފެށިގެން 2021 އާ ހަމައަށް ހިންގި ސްޓެޕް ސަރވޭއަކުން ދައްކާގޮތުގައި ސަރވޭގައި ބައިވެރިވި މީހުންގެ ތެރެއިން 70.3 އިންސައްތަ މީހުން ލަފާކުރެވިފައިވާ މިންވަރަށްވުރެ ގިނައިން ލޮނު ބޭނުންކުރެއެވެ.
ލޮނު ގިނައިން ބޭނުންކުރުމުގެ ނޭދެވޭ އަސަރު ހަމައެކަނި ލޭގެ ޕްރެޝަރ މައްޗަށް ދިއުމަކަށް ނޫނެވެ. މިކަމުގެ ސަބަބުން ހަށިގަނޑުގެ ދިފާޢީ ނިޒާމަށް އަސަރުކޮށް، އެކި ބާވަތުގެ ބެކްޓީރިއާގެ ސަބަބުން ދިމާވާ ސިއްޙީ މައްސަލަތަކަށް ފުރުސަތު އިތުރުވެއެވެ.
މީގެ އިތުރުން، ލޮނު ގިނައިން ބޭނުންކުރުމުގެ ސަބަބުން ހިތުގެ ބަލިތަކާއި ސްޓްރޯކް ޖެހުމުގެ ފުރުސަތުވެސް އިތުރުވެއެވެ. އެއީ ލޮނުގައި ހުންނަ ސޯޑިއަމްގެ ސަބަބުން ހަށިގަނޑުގައި އިތުރު ފެން ރައްކާކުރުމަށް ފުރުސަތު ބޮޑުވެގެންދެއެވެ. އިތުރަށް ރައްކާކުރެވޭ ފެނުގެ ސަބަބުން ލޭގެ ވޮލިއުމް އިތުރުވެ، އޭގެ ނަތީޖާއެއްގެ ގޮތުން ހިތުގެ ވިންދު އަވަސްވެގެން ދެއެވެ. މިކަމުގެ ސަބަބުން ލޭގެ ޕްރެޝަރު (ހައިޕަރޓެންޝަން) މައްޗަށް ދެއެވެ.
އެޗްޕީއޭއިން ލަފާދެނީ ދުވާލަކު 5 ގްރާމަށްވުރެ ގިނައިން ލޮނު ބޭނުން ނުކުރުމަށެވެ. މިއީ ގާތްގަނޑަކަށް މޭޒުމަތީ ސަމުސާއެއްހާ މިންވަރެވެ. ލޮނު ބޭނުންކުރާ މިންވަރު މަދުކުރުމުން ހިތުގެ ސިއްޙަތަށް ވަރަށް ބޮޑެތި ފައިދާތަކެއް ކުރާނެކަމަށް އެޗްޕީއޭއިން ފާހަގަކުރިއެވެ. އަދި ލޮނުގެ ބަދަލުގައި ހާބްސް އާ ސްޕައިސް ބޭނުންކުރުމުން ދުޅަހެޔޮކަމަށް ހެޠޮ އަސަރުތަކެއް ކުރާނެކަމަށް އެ އިދާރާއިން ވިދާޅުވިއެވެ.
