ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު، އަވައްޓެރި ނޭޕާލްގައި ހިނގި ފެންބޮޑުވުމާއި ބިންގަނޑު ކަނޑައިގެންދިއުމުގެ ހާދިސާއާ ގުޅިގެން، އެ ގައުމުގެ ބޮޑުވަޒީރު ކޭޕީ ޝަރްމާ އޮލީއަށް ހަމްދަރުދީގެ މެސެޖެއް ފޮނުއްވައިފިއެވެ.
ރައީސް، އެ މަނިކުފާނުގެ ރަސްމީ 'އެކްސް" އެކައުންޓުން ކުރެއްވި ޕޯސްޓެއްގައި، މި ހިތާމަވެރި ހާދިސާގައި އެގައުމުގެ އެތައް ބައެއްގެ ފުރާނަ ގެއްލުނު ހަބަރު އެމަނިކުފާނު އެއްސެވީ ފުން ހިތާމައާއެކުގައިކަން ހާމަކުރައްވާފައި ވެއެވެ.
އެމަނިކުފާނުގެ މެސެޖުގައި ވަނީ، ނޭޕާލްގެ ބޮޑުވަޒީރަށާއި ހާދިސާގައި ގެއްލުން ލިބުނު އާއިލާތަކަށް، ވަރަށް އިހުލާސްތެރިކަމާއިއެކު ހަމްދަރުދީ ފޮނުއްވާފައެވެ. އަދި ހާދިސާގައި ޒަހަމްވި މީހުންނަށް އަވަސް ޝިފާއަކަށް އެދިވަޑައިގެން، ގެއްލިފައިވާ މީހުން، ސަލާމަތްތެރިކަމާއެކު ފެނުމަށް އުންމީދުކުރައްވާކަމުގައި އެމަނިކުފާނު ވިދާޅުވެފައިވެއެވެ.
ނޭޕާލަކީ ދިވެހިރާއްޖޭގެ އެކުވެރި، އަވައްޓެރި ޤައުމެއްކަމުގައި ފާހަގަކުރައްވަމުން، ރައީސް ވަނީ، މި ހިތާމަވެރި ދަނޑިވަޅުގައި ދިވެހިރާއްޖެ ވަނީ ނޭޕާލާއެކުގައި ކަމަށް ވިދާޅުވެފައެވެ.
