ނުކުޅެދުންތެރިކަން ހުންނަ ފަރާތްތައް ވަޒީފާގެ މާހައުލުގައި ޝާމިލުކުރުމާއި ގުޅޭގޮތުން ރޯޑް ޑިވަލޮޕްމަންޓް ކޯޕަރޭޝަން (އާރުޑީސީ) ގެ މުވައްޒަފުންނަށް ތަމްރީނު ސެޝަނެއް ބާއްވައިފިއެވެ.
އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން މަޢުލޫމާތު ދެއްވާފައިވާ ގޮތުގައި، މި ސެޝަން ބޭއްވުނީ ސެޕްޓެމްބަރ މަހުގެ 29 އަދި 30 ވަނަ ދުވަހުއެވެ. މި ތަމްރީނު ސެޝަންގެ މައިގަނޑު މަޤްޞަދަކީ އާރުޑީސީގައި އިންޓަރންޝިޕް ފެށުމަށް ހަމަޖެހިފައިވާ ފަސް ކެންޑިޑޭޓުން ނިސްބަތްވާ ޑިޕާޓްމަންޓްތަކުގެ ސުޕަވައިޒަރުންނާއި މުވައްޒަފުން ތައްޔާރުކުރުމެވެ. މި ސެޝަންތައް ކުރިއަށް ގެންދެވުނީ ދެ ބެޗަކަށް ބަހާލައިގެންނެވެ. އަދި މި ސެޝަންތަކުގައި އާރުޑީސީގެ ޖުމްލަ 19 މުވައްޒަފުން ބައިވެރިވެފައިވާކަމަށް ވުޒާރާއިން ހާމަކޮށްފައިވެއެވެ.
ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުޞަތުތައް ފަހިކޮށްދިނުމަކީ ސަރުކާރުގެ އިސް އަމާޒުތަކުގެ ތެރޭގައި ހިމެނޭ ކަމެކެވެ. މި ފަދަ ތަމްރީނު ޕްރޮގްރާމްތަކުން ވަޒީފާދޭ ފަރާތްތަކަށް ނުކުޅެދުންތެރިކަން ހުންނަ މުވައްޒަފުންނާއެކު މަސައްކަތްކުރުމުގެ ހުނަރު ލިބި، އެ ފަރާތްތަކަށް މަސައްކަތުގެ މާހައުލުގައި ހަމަހަމަ ފުރުޞަތުތަކެއް ލިބިގެންދާނެއެވެ.
