ހުޅުމާލޭގައި ޕާކިން އިމާރާތްތައް އަޅަން، ހައުސިންގ ޑިވެލޮޕްމެންޓް ކޯޕަރޭޝަނުން (އެޗްޑީސީ)އާއެކު ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން މިއަދު ސޮއިކޮށްފިއެވެ.
އެކަން ހާމަކުރައްވާ އެޗްޑީސީން ވަނީ އެކްސްގައި ޕޯސްޓެއް ކުރައްވާފައެވެ.
އެގޮތުން 4000 ޕާކިން ސްލޮޓް ހިމެނޭގޮތަށް 15 ޕާކިން ޢިމާރާތް އެޅުމާގުޅޭ މިއެއްބަސްވުމުގައި ސޮއިކުރެއްވީ ދަތުރުފަތުރާ މަދަނީ އުދުހުންތަކާ ބެހޭ ވަޒީރު މުހައްމަދު އަމީނާއި، އެޗްޑީސީގެ މެނޭޖިން ޑިރެކްޓަރ އިބްރާހީމް ފަޒުލް ރަޝީދެވެ.
އެކަމަށްޓަކައި މިއަދު ހެނދުނު އުމަރު ޒާހިރު ބިލްޑިންގައި ބޭއްވި މި ރަސްމިއްޔާތުގައި ވާހަކަފުޅު ދަައްކަވަމުން ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުހައްމަދު އަމީންވިދާޅުވީ އެއީ ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް މާލެ ސަރަހައްދުގެ ޕާކިންގެ ދަތިކަމަށް އެކަށީގެންވާ އަވަސް ހައްލެއް ހޯދުމަށް އެޅުނު މުހިންމު ފިޔަވަޅެއް ކަމަށެވެ.
އަދި ވަޒީރު އަމީން ވަދާޅުވީ މަޝްރޫއުގެ ދަށުން ސްލޮޓްތައް ވިއްކާނީ ދާއިމީކޮށްކަމަށާއި، އެތަނުން ގަރާޖު ސިޓީވެސް ނެގޭގޮތަށްކަމަށެވެ.
މީގެއިތުރުން މި ރަސްމިއްޔާތުގައި އެޗްޑީސީގެ މެނޭޖިން ޑިރެކްޓަރ އިބްރާހީމް ފަޒުލް ރަޝީދު ވާހަކަފުޅުު ދައްވަމުން ވިދާޅުވީ 15 ޢިމާރާތުގެ މަސައްކަތް ކުރިއަށްގެންދާނީ ދެ ފިޔަވައްސަކަށް ބަހާލައިގެންކަމަށާއި މިއަހަރު ނިމުމުގެ ކުރިން ކޮންޓްރެކްޓަރެއް ނަގައި މަސައްކަތް ފެށުމަށް މަސައްކަތް ކުރަމުންދާކަމަށެވެ.
އަދި ފުރަތަމަ އަހަރު ހަތް އިމާރާތުގެ މަސައްކަތް ނިންމުމަކީ އަމާޒުކަމަށްވެސް އެމަނިކުފާނު ވަނީ ވިދާޅުވެފައެވެ.
ޕާކިން ބިލްޑިންގެ މަޝްރޫޢުގައި ސްލޮޓް ވިއްކާ ސަރަޙައްދު ތަރައްގީކުރާނީ، ސޮލޮޓް ވިއްކާ ފައިސާއިން ކަވަރުކުރާގޮތަށެވެ. މި މަޝްރޫއުގެ ކޮމާޝަލް ސަރަހައްދުތައް ހެދުމަށް ފަންޑުކުރާނީ އެޗްޑީސީންނެވެ.
އަދި އެކުންފުނިން ވަނީ މިދިޔަ އޮގަސްޓް މަހުގެ ތެރޭގައި ހުޅުމާލޭގައި 15 ޕާކިން އިމާރާތެއް އަޅައިދޭނެ ބަޔަކު ހޯދަން އިއުލާނުވެސް ކޮށްފައެވެ.
