ދަތި އުނދަގޫ ހާލަތުގައި ވެސް ޝަކުވާއެއްނެތި ފުލުހުން ކުރަމުންދަނީ ގައުމީ މަސައްކަތެއް ކަމަށާއި، އެއީ ގައުމަށް އޮތް ލޯތްބެއްގެ ނަތީޖާއެއް ކަމަށް ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވެއްޖެއެވެ.
ސީޕީ މިހެން ވިދާޅުވީ މިހާރު ހއ. އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު ބާރަށަށް ޒިޔާރަތްކުރައްވައި އެ ރަށު ކައުންސިލް މެމްބަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
މި ބައްދަލުވުމުގައި ސީޕީ އިތުރަށް ވިދާޅުވެފައިވަނީ، ފުލުހުން މަސައްކަތްކުރަމުންދާ އިމާރާތްތައް ބާވެފައި ހުރި ނަމަވެސް، ޝަކުވާއެއްނެތި ގާނޫނު ތަންފީޒުކުރުމުގެ މަސައްކަތްކުރަމުން ގެންދިއުމަކީ ފަހުރުވެރިކަމާއެކު ފާހަގަކުރާ ކަމެއް ކަމަށެވެ.
އަދި ކުރިއަށް އޮތް ދެ އަހަރުގެ ތެރޭގައި ރާއްޖޭގެ ކޮންމެ ރަށެއްގައި ވެސް ފުލުހުންގެ ހިދުމަތް ދެވިގެންދާނެ ކަމަށާއި އަދި މިހާރުވެސް ރާއްޖޭގެ 140 އަށްވުރެ ގިނަ ރަށުގައި ފުލުހުންގެ ހިދުމަތް ލިބެމުންދާ ކަމަށާއި އިތުރު 35 ރަށުގައި ހިދުމަތް ފެށުމުގެ މަސައްކަތް ބާރަށް ކުރިއަށްދާ ކަމަށްވެސް ސީޕީ ވިދާޅުވިއެވެ.
ސީޕީ އިތުރަށް ފާހަގަކުރެއްވީ، ބާރަށަކީ ވަރަށް ގައުމީ، އިޖުތިމާއީ ކަންކަމަށް ލޯބިކުރާ އެކުވެރި ރައްޔިތުންތަކެއް ދިރިއުޅޭ ރަށެއް ކަމަށާ އަދި ރަށުތެރޭން ފެންނަ މައްސަލަތައް ހައްލުކޮށް މަސްތުވާތަކެތީގެ މައްސަލަ ކޮންޓްރޯލްކޮށް ހުއްޓުވުމަށް ރައްޔިތުންނާއި ކައުންސިލާއި ފުލުހުން ގުޅިގެން މަސައްކަތްކުރާނެ ކަމަށެވެ. އަދި މަސްތުވާތަކެތީގެ މައްސަލައާ ގުޅިގެން ހައްޔަރުކުރެވޭ މީހުންނަކީ ހަމަ އެކަނި ހެކީގެ މައްޗަށް ބިނާކޮށް ހައްޔަރުކުރެވޭ މީހެއް ނޫންކަމަށާއި ކޯޓަށް ގެންގޮސް މުއްދަތު ޖަހާ ކޮންމެ މީހަކީވެސް އެކަމާ ގުޅުންހުރި ހެކި ލިބިފައިވާ މީހެއް ކަމަށް ވިދާޅުވިއެވެ.
އަދި ފުލުހުންގެ މަސައްކަތްތައް ރައްޔިތުންނާ ގާތުން ކުރިއަށް ގެންދިއުމަށް އިސްކަންދޭނެ ކަމަށާއި ފުލުހަކު މަގުމަތީގައި ފެންނަން ހުރުމުންވެސް ވަރަށް ގިނަ ކަންތައްތަކެއް ދޭހަވާނެކަމަށާއި، ރަށްރަށަށް މަސްތުވާތަކެތި އެތެރެކުރެވެނީ މައިގަނޑު ގޮތެއްގައި ކަނޑުމަގުން ކަމަށާއި، މިކަން ހުއްޓުވުމަށް ބަނދަރުމަތީގައި ފުލުހުންގެ ހަރަކާތްތެރިކަން އިތުރުކުރެވުމުގެ އިތުރުން ފުލުހުންނަށް ޝައްކުކުރެވޭ ފަރާތްތަކުގެ ހަރަކާތްތަކުން އެކަން ދެނެގަނެވޭނެ ކަމަށާއި އަދި އެ މީހުން ބަލައި ފާސްކުރުމުގެ މަސައްކަތާއެކު، ރަށްރަށަށް މަސްތުވާތަކެތި އެތެރެކުރުން މަދުކޮށް ހުއްޓުވިދާނެ ކަމަށްވެސް އެމަނިކުފާނު ވިދާޅުވިއެވެ.
މީގެ އިތުރުން، ގުދުރަތީ ކާރިސާތަކަށް ތައްޔާރުވުމުގެ މުހިންމުކަން ފާހަގަކުރައްވަމުން ސީޕީ ވިދާޅުވީ، އެފަދަ ހާލަތްތަކަށް ތައްޔާރުވުމަށް އިމަޖެންސީ ރެސްޕޮންސް ޕްލޭނެއް އެކުލަވާލުމުގެ މަސައްކަތް ކުރިއަށްދާ ކަމަށެވެ.
ނިންމާލަމުން ސީޕީ ވިދާޅުވީ، ހުރިހާ ފުލުހުންނަށް ވެސް ޓްރެއިނިންގ ތަކުގައި ނަސޭހަތްދެނީ ގައުމަށް ހިދުމަތް ކުރުމަށްވުރެ މުހިންމު ކަމެއް ނޯންނާނެ ކަމަށެވެ. އަދި އެއީ ގައުމީ ލޯބި ކަމަށާއި، އޭގެ ވަރަށް ރަނގަޅު މިސާލެއް ފެންނަމުންދަނީ ފުލުހުން އުނދަގޫ ހާލަތްތަކުގައި ވެސް، ރައްޔިތުންނަށް ކޮށްދޭންޖެހޭ ކަންތައްތައް ދުވަހުން ދުވަހަށް ކޮށްދިނުމުން ކަމަށް ވިދާޅުވިއެވެ.
މި ބައްދަލުވުމުގައި ވާހަކަފުޅު ދައްކަވަމުން، ކެލާ ކައުންސިލުގެ ރައީސް ވިދާޅުވީ، ކުރިން ކުށްކުރުން ގިނަވެފައި އޮތް ނަމަވެސް، ޕޮލިސް ސްޓޭޝަން ގާއިމުކޮށް ފުލުހުންގެ ހިދުމަތް ދޭން ފެށުމާއެކު ކުށްކުރުން ވަރަށް ބޮޑަށް މަދުވެފައިވާ ކަމަށެވެ.
އަދި ފުލުހުންގެ އިމާރާތް ބާވެފައި ހުރުމުން އާ އިމާރާތެއް ލިބޭނެ ކަމުގެ އުންމީދު ލިބިފައިވާ ކަމަށާއި، އެ މަސައްކަތް އަވަސްކޮށްދިނުމަށް އެދޭ ކަމަށްވެސް ވިދާޅުވިއެވެ.
ނޫން މުސާރަހަލާލުވާވަތަށްކުރާމަސއްކަތް ވަރައްމަދު ހެޔޮނިޔަތުގައިކުރާމީހެއް