ސްޕެނިޝް ލަލީގާގައި ރެއާލް މެޑްރިޑާ ދެކޮޅަށް މިދިޔަ ހޯމަ ދުވަހު ކުޅުނު މެޗުގައި އެޓުލެޓިކޯ މެޑްރިޑުގެ ސަޕޯޓަރުން ރެއާލްގެ ކުޅުންތެރިންގެ ގަޔަށް ކުނިބުނި އުކި މައްސަލައިގައި އެ ޓީމު ޖޫރިމަނާ ކޮށްފިއެވެ.
އެޓުލެޓިކޯގެ ދަނޑު ކަމުގައިވާ މެޓްރޮޕޮލިޓާނޯ ސްޓޭޑިއަމްގައި ދެ ޓީމު 1-1 އިން އެއްވަރުވެގެން ނިމުނު މެޗުގެ ދެވަނަ ހާފުގައި އެޓުލެޓިކޯގެ ސަޕޯޓަރުން ރެއާލުގެ ކުޅުންތެރިންގެ ގަޔަށް ކުނިބުނި އުކަން ފެއްޓުމާއެކު ރެފްރީއަށް ވަނީ މެޗު އިރުކޮޅަކަށް މެދު ކަނޑާލަން ޖެހިފައެވެ.
އިއްޔެ ސްޕެއިންގެ ފުޓުބޯޅަ ފެޑެރޭޝަނުގެ ކޮމްޕެޓިޝަން ކޮމިޓީއިން ވަނީ މި މައްްސަލައާ ގުޅިގެން 49,000 ޑޮލަރުން އެޓުލެޓިކޯ މެޑްރިޑު ޖޫރިމަނާ ކޮށް, ތިން މެޗަށް އެ ޓީމުގެ ދަނޑުގެ "ފޮންޑޯ ސާ" ސްޓޭންޑަށް އެއް ވެސް ސަޕޯޓަރަކަށް ނުވަދެވޭ ގޮތަށް ހެދުމަށް އަންގާފައެވެ.
މިދިޔަ ހޯމަ ދުވަހު ހިނގި މި މައްސަލައާ ގުޅިގެން އެޓުލެޓިކޯއިން އަންނަނީ އެ ކްލަބުގެ ގަވާއިދުތަކަށް ބަދަލުތައް ގެނެސް, އެ މައްސަލައިގައި ބައިވެރިވި ފަރާތްތަކާ މެދު ފިޔަވަޅު އަޅަމުންނެވެ. އެ ގޮތުން އެ ކްލަބުން ހާމަކުރި ގޮތުގައި ދަނޑު މައްޗަށް ތަކެތި އުކި އެކަކު ވަނީ އުމުރު ދުވަހަށް މެޓްރޮޕޮލިޓާނޯ ސްޓޭޑިއަމްއަށް ނުވަދެވޭ ގޮތަށް ހަދާފައި ކަމަށެވެ. އޭގެ އިތުރުން މީގެ ފަހުން ދަނޑަށް ވަންނަ ފަރާތްތަކަށް ތަކެތި ނިވާ ކޮށްގެން ވެއްދޭނެ ޒާތުން ހެދުން ނުލެވޭނެ ގޮތަށް އާ ގަވާއިދެއް ހެދުމަށް ނިންމާފައިވާ ކަމަށް އެ ކްލަބުން ހާމަކުރެއެވެ.
މި މައްސަލައާ ބެހޭ ގޮތުން ވާހަކަދައްކަމުން އެޓުލެޓިކޯގެ ކޯޗު ޑިއޭގޯ ސިމިއޯނޭ ބުނި ގޮތުގައި ސަޕޯޓަރުންގެ އަމަލުތައް ރަނގަޅު ނޫން ކަމުގައިވިއަސް އެ އަމަލުތަކަކީ ރެއާލުގެ ކުޅުންތެރިން ކުރާ ކަންކަމުގެ ރައްދެއް ކަމަށެވެ. އަދި ކުރިއަށް އޮތް ތަނުގައި މި ފަދަ ކަމެއް ހިނގަން ބޭނުން ނުވާ ނަމަ ދެ ފަރާތުން ވެސް އަޚުލާހީ ފެންވަރު ރަނގަޅު ކުރަން ޖެހޭ ކަމުގައެވެ.
