ވާދަވެރި އިރުމަތި އެފްސީ 1-5 ގެ ބޮޑު ތަފާތަކުން ބަލިކޮށް ވެލާ ސްޕޯޓްސް ކްލަބުން އޭދަފުށީ ކަޕުގެ ޗެމްޕިއަންކަން މިއަދު ހަވީރު ހޯދައިފިއެވެ.
އޭދަފުށީ ހިތްގައިމު ދަނޑުގައި ކުޅުނު ފައިނަލް މެޗުގެ ތަރިޔަކަށްވީ ވެލާ ސްޕޯޓްސްއަށް ހަތަރު ލަނޑު ކާމިޔާބު ކޮށްދިން ފޯވާޑް މުހައްމަދު ފާސިރު (ފާއްޓޭ) އެވެ. ވެލާގެ އަނެއް ލަނޑު ކާމިޔާބު ކޮށްދިނީ ތަޖުރިބާކާރު ކުޅުންތެރިޔާ އިޝާން އިބްރާމް (ސައްޓު) އެވެ. އިރުމަތީގެ ހަމައެކަނި ލަނޑު ކާމިޔާބު ކޮށްދިނީ އައްޒާމް އަބްދުﷲ އެވެ.
ވެލާ ސްޕޯޓްސްގެ ސަޕޯޓަރުންގެ އަޑުން ގުގުމާލާފައި އޮތް ދަނޑަށް ކުޅިބަލަން ގިނަ އަދެއްގެ ސަޕޯޓަރުން ވަދެ ތިއްބެވެ.
މުބާރާތުގެ ރަންބޫޓާއި މޮޅު ކުޅުންތެރިޔާގެ މަގާމް ފާއްޓޭ ހޯދިއިރު، އެންމެ މޮޅު ޒުވާން ކުޅުންތެރިޔާގެ މަގާމް ހޯދީ ވެލާ ސްޕޯޓްސްގެ ޖައުޝަން އަހްމަދެވެ. މޮޅު ކޯޗަކީ ވެލާ ސްޕޯޓްސްގެ ކޯޗް އަހްމަދު ނިޔާޒް (ނިޔާ) އެވެ. މޮޅު ކީޕަރަކީ އިރުމަތި އެފްސީގެ އަބްދުއްސަދާދް އާދަމްއެވެ. ފެއާ ޕްލޭ ޓީމަކީ ހުސް ސޮންގުންނެވެ.
އެދަފުށީ ކައުންސިލުން މުބާރާތުގެ ޗެމްޕިއަން ޓީމަށް 50،000 ރުފިޔާގެ ފައިސާ އިނާމް ވަނީ ދީފައެވެ.
