ނަޕޯލީއަށް އިޓާލިއަން ސެރިއާގެ ތާވަލުގެ އެއްވަނަ ހައްގުކަމާމެދު ޝައްކުކުރާ ކަމަށް އެ ޓީމުގެ ކޯޗު އެންޓޯނިއޯ ކޮންޓޭ ބުނެފިއެވެ.
ކޮންޓޭ މިހެން ބުނީ އިއްޔެ ކޯމޯ އަތުން 3-1 އިން މޮޅުވެ, ސެރިއާ ތާވަލުގެ އެއްވަނައިގައި ނަޕޯލީއިން 4 ޕޮއިންޓުގެ ލީޑެއް ނެގުމާ ގުޅިގެންނެވެ.
"އަހަންނަށް ޔަގީނެއް ނޫން މި ނަޕޯލީ ޓީމަށް އެއްވަނަ ހައްގުކަމެއް. އެކަމަކު ހަގީގަތަކީ އަހަރެމެން މި އޮތީ އެއްވަނައިގަ. މީގެ ތިން މަސް ކުރިން މީހަކު އަހަރެން ކައިރީ މިހެން ވާނެއޭ ބުނި ނަމަ ގަބޫލު ވެސް ނުކުރެވޭނެ" ނަޕޯލީއިން ސީޒަން ފެށުގޮތާމެދު ހިތްހަމަޖެހުން ފާޅު ކުރަމުން ކޮންޓޭ ބުންޏެވެ.
ނަޕޯލީއިން ސެރިއާ ތާވަލުގެ އެއްވަނައިގައި އޮތީ 7 މެޗު ކުޅެގެން ލިބުނު 16 ޕޮއިންޓާއެކުގައެވެ. ދެވަނައިގައި އޮތް ޔުވެންޓަސްއަށް ލިބިފައިވަނީ 12 ޕޮއިންޓެވެ. ނަމަވެސް ޔުވެންޓަސްއިން ކުޅެފައިވަނީ އެންމެ 6 މެޗު ކަމުން އެ ފަރަގު ކުޑަ ކުރުމުގެ ފުރުސަތު އެ ޓީމަށް އެބައޮތެވެ.
2022 ވަނަ އަހަރު ސެރިއާ ކާމިޔާބު ކުރި ނަޕޯލީއަށް ވަނީ މި ދިޔަ ސީޒަނުގައި ރަނގަޅު ކުޅުމެއް ދެއްކޭ ގޮތް ނުވެފައެވެ. ނަޕޯލީއަށް އިޓަލީގެ ސްކުޑެޓޯ ކާމިޔާބު ކޮށްދިން ލޫސިއާނޯ ސްޕަލެޓީ އެ ޓީމުގެ ކޯޗުގެ މަގާމުން ވަކިވުމާއެކު, ނަޕޯލީއަށް ވަނީ އޭނާގެ ބަދަލަށް ރަނގަޅު ކޯޗަކު އައްޔަނު ކުރެވޭ ގޮތް ނުވެފައެވެ. ނަމަވެސް މި އަހަރުގެ އާ ސީޒަނަށް އެ ޓީމުގެ ކޯޗުގެ މަގާމަށް އައްޔަނު ކުރި ތަޖުރިބާކާރު އެންޓޯނިއޯ ކޮންޓޭ ވަނީ ނަޕޯލީގެ ކުޅުން ވަރުގަދަކޮށް, އެ ޓީމު ކުރިން އޮތް ނުރައްކާތެރި ފޯމަށް އަޅައިދީފައެވެ.
