މާލޭގެ އެކި ސަރަޙައްދުތަކުގައި ހުރި ކެމިކަލް ގުދަންތަކާއި ސްޓީލް ސްޓްރަކްޗަރތަކުގެ މައުލޫމާތު އެއްކުރުމަށް ހިންގި "އޮޕަރޭޝަން ހިރާސް ފާސް" މާލޭގެ ބައިގައި ފުލުހުން ބައިވެރިވެެއްޖެއެވެ.
ފުލުހުން ބުނީ މި އޮޕަރޭޝަނަކީ މޯލްޑިވްސް ނޭޝަނަލް ޑިފެންސް ފޯސް (އެމް.އެން.ޑީ.އެފް) އިން އިސްނަގައިގެން ކުރިއަށް ގެންދިޔަ އޮޕަރޭޝަނެއް ކަމަށެވެ.
މި އޮޕަރޭޝަންގެ މާލޭގެ ބައިގައި ޖުމުލަ 10 ޓީމު ބައިވެރިވެފައިވާއިރު މި އިން ކޮންމެ ޓީމެއްގައި ވެސް މަދުވެގެން އެއް ފުލުހަކު ހަރަކާތްތެރިވެފައި ވެއެވެ.
މީގެއިތުރުން ފުލުހުން ބުނީ އޮޕަރޭޝަނަކީ މާލޭގައި ހުރި ކެމިކަލް ގުދަންތަކާއި ސްޓީލް ސްޓްރަކްޗަރތަކުގެ ތަފްސީލީ މައުލޫމާތު އެއްކޮށް، އެ ތަންތަނުގެ ރައްކާތެރިކަން ކަށަވަރުކުރުމާއި، އެފަދަ ތަންތަނުގެ ސަބަބުން ދިމާވެދާނެ ނުރައްކާތެރި ހާދިސާތަކަށް ތައްޔާރުވުމަށްވެސް ކުރިއަށް ގެންދިޔަ އޮޕަރޭޝަނެއް ކަމަށެވެ.
މި އޮޕަރޭޝަނުގައި ފުރަތަމަ ތިން ދުވަހުގެ މަތިން، އިންސްޕެކްޝަން ޓީމުތަކުން ވަނީ، މީހުން ދިރިއުޅޭ 347 އިމާރާތާއި، ނުރައްކާތެރި ކެމިކަލް ގުދަންކުރާ 31 ގުދަނާ އަދި ކެމިކަލް ވިއްކާ 24 ފިހާރަ ބަލައި މައުލޫމާތު އެއްކޮށްފައިވެއެވެ.
އެމްއެންޑީއެފް އިން ވިދާޅުވީ، އޮކްޓޫބަރު މަހުގެ 1 އިން 15 އަށް ކުރިއަށްގެންދިއުމަށް ހަމަޖެހިފައިވާ މި އޮޕަރޭޝަނުގައި، ކެމިކަލް ރައްކާކުރާ ތަންތަނާއި ވިޔަފާރިކުރާ ތަންތަން ހިންގަނީ ގަވާއިދާ އެއްގޮތަށްތޯ ބެލުމުގެ އިތުރުން، ގްރޭޓަރ މާލެ އޭރިއާގައި ފަސޭހައިން އަލިފާންރޯވާ ފަދަ ތަންތަނާއި އެ ތަންތަނުގައި ހުރި ހިރާސްތައް ވެސް މި އޮޕަރޭޝަންގެ ތެރެއިން ދެނެގަންނާނެކަމަށެވެ.
