ބަންކަރިންގ ހިދުމަތް ހޯދާ އުޅަނދުފަހަރުން ކުނި ނައްތާލުމަށް ވެމްކޯއިން ބައިނަލްއަގުވާމީ ބަންކަރިންގ ހިދުމަތް ހޯދަން އަންނަ އުޅަނދުފަހަރުގެ ކުނި ނައްތާލުމުގެ ހިދުމަތް ފޯރުކޮށްދިނުމަށް ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) އާއި މޯލްޑިވްސް ޕޯޓްސް ލިމިޓެޑް (އެމްޕީއެލް) އާ ދެމެދު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގެ ދަށުން ވެމްކޯ އާއި އެމްޕީއެލް ގުޅިގެން އުޅަނދުފަހަރަށް ހަރުދަނާ ގޮތެއްގައި ކުނި ނައްތާލުމުގެ ހިދުމަތް ފޯރުކޮށްދޭނެއެވެ.
މިގޮތުން، އެމްޕީއެލްގެ ޒިންމާއަކީ ކުނި އެއްކުރުމާއި އެ ކުނި ވެމްކޯއާ ހަވާލުކުރުމެވެ. އެ ހިސާބުން ވޭސްޓް މެނެޖްމަންޓްގެ ދައުރު ވެމްކޯއިން ކުރަން ވަނީ ހަމަޖެހިފައިއެވެ.
އެއްބަސްވުމުގައި ސޮއިކުރުމަށްފަހު މީޑިއާއަށް މައުލޫމާތު ދެމުން، އެމްޕީއެލްގެ ޗީފް އެގްޒެކެޓިވް އޮފިސަރ (ސީއީއޯ) މުހައްމަދު ވަޖީހު އިބްރާހީމް ވިދާޅުވީ މި ހިދުމަތް ފޯރުކޮށްދެވޭނީ އެކަމަށް ހާއްސަކޮށްގެން ކައިރީގެ ރަށެއްގައި ގާއިމުކުރެވޭ ވަކި ފެސިލިޓީއެއްގައި ކަމަށެވެ.
އަދި މި މަސައްކަތުން އެމްޕީއެލް އާއި ވެމްކޯގެ އާމްދަނީ އިތުރުކުރުމަށް މުހިންމު ދައުރެއް އަދާކުރާނެ ކަމަށް އޭނާ ވިދާޅުވިއެވެ.
