ވާދަވެރި އާޖެންޓީނާ 1-2 އިން ބަލިކޮށް ފީފާ ފުޓްސަލް ވަރލްޑް ކަޕް ތަށި 6 ވަނަ ފަހަރަށް ބްރެޒިލުން މިރޭ ކާމިޔާބުކޮށްފިއެވެ.
އުޒްބެކިސްތާނުގެ ވެރިރަށް "ޓަޝްކެންޓް" ގައި ކުޅުނު ފައިނަލް މެޗުގައި ބްރެޒިލުން ދެލަނޑުވެސް ކާމިޔާބު ކުރީ ފުރަތަމަ ހާފުގައެވެ. ފުރަތަމަ ލަނޑު ކާމިޔާބު ކޮށްދިނީ ފެއްރާއޯއެވެ. ދެވަނަ ލަނޑު ކާމިޔާބު ކޮށްދިނީ ރަފާ ސަންތޯސްއެވެ. އާޖެންޓީނާގެ ލަނޑު ދެވަނަ ހާފުގައި ކާމިޔާބު ކޮށްދިނީ ރޮސާއެވެ.
މުބާރާތުގައި 10 ލަނޑު ޖަހައިގެން ރަންބޫޓް ހާސިލް ކުރީ ބްރެޒިލްގެ މާސެލްއެވެ.
އާޖެންޓީނާއިންވެސް ފުޓްސަލް ވަރލްޑް ކަޕް އެއްފަހަރު ކާމިޔާބު ކޮށްފައެވެ. މިއީ އާޖެންޓީނާއިން ޖެހިޖެހިގެން ފައިނަލުގައި ކުޅުނު 3 ވަނަ ފަހަރުކަން ފާހަގަ ކޮށްލެވެއެވެ.
މުބާރާތުގެ ތިންވަނަ މަގާމް ހޯދީ ޔޫކްރައިންއެވެ. ޔޫކްރޭނުން ތިންވަނަ ހޯދީ މަޝްހޫރު ފްރާންސް 7-1 ގެ ބޮޑު ތަފާތަކުން ބަލިކޮށްގެންނެވެ.
މިފަހަރުގެ ފުޓްސަލް ވަރލްޑް ކަޕުގައި ޖުމްލަ 52 މެޗް ކުޅެފައިވާއިރު 362 ލަނޑު ފެނުނެވެ. އެއީ މެޗަކަށް 6.96 ލަނޑެވެ.
ފުޓްސަލް ވަރލްޑް ކަޕް ދެން އޮންނާނީ 2028 ވަނަ އަހަރުއެވެ.
