''ވޯލްޑް އިންވެސްޓަރ ވީކް 2024'' ހުޅުވުމަށް ބޭއްވި ރަސްމިއްޔާތުގައި ދިވެހި ފުލުހުންގެ ހިދުމަތުން ބައިވެރިވެއްޖެއެވެ.
ކެޕިޓަލް މާކެޓް ޑިވެލޮޕްމަންޓް އޮތޯރިޓީން އިންތިޒާމުކޮށްގެން ކުރިއަށް ގެންދާ މި ހަރަކާތް ހުޅުވުމުގެ ރަސްމިއްޔާތު ބާއްވާފައިވަނީ މިއަދު ހެނދުނު 9:00 ގައި ސޮލައިޓްގައެވެ.
މި ރަސްމިއްޔާތު ކުރިއަށް ގެންދިޔައީ "ހުޅުވުމުގެ ރަސްމިއްޔާތު އަދި ފިންޓެކް އިނޮވޭޝަންސް: މަކަރާއި ހީލަތުން ރައްކާތެރިވުން" މި ނަމުގައެވެ. މި ރަސްމިއްޔާތު ޝަރަފުވެރިކޮށްދެއްވީ އެސިސްޓެންޓް ކޮމިޝަނަރ އޮފް ޕޮލިސް ޢަބްދުﷲ ޝަރީފެވެ.
މި ރަސްމިއްޔާތުގައި، ދިވެހި ފުލުހުންގެ ޚިދުމަތުގެ އެންޓި ސްކޭމް ސެންޓަރުގެ ފަރާތުން ހުށަހެޅި ޕްރެޒެންޓޭޝަނުގައި، މާލީ ޓެކްނޮލޮޖީގެ ކުރިއެރުންތަކާ ގުޅިގެން އުފެދެމުންދާ އޮންލައިން އިންވެސްޓުމަންޓް ސްކޭމްތަކާއި މަކާރާއި ހީލަތް ހެދުމުގެ މައްސަލަތަކާ ބެހޭ ގޮތުން ދުނިޔެއާއި ދިވެހިރާއްޖޭގެ ހާލަތަށް އަލިއަޅުވާލެއްވިއެވެ. މި ޕްރެޒެންޓޭޝަން ހުށަހެޅުއްވީ އިންސްޕެކްޓަރ އޮފް ޕޮލިސް އާދަމް ނަވީދެވެ.
މީގެ އިތުރުން، ބެންކު އޮފް މޯލްޑިވްސްގެ ފަރާތުން ވެސް ފިންޓެކް އީޖާދުތަކާ ބެހޭ ގޮތުން މައުލޫމާތު ދެއްވިއެވެ.
''ވޯލްޑް އިންވެސްޓަރ ވީކް'' އަކީ އިންވެސްޓަރުންގެ ހައްގުތައް ރައްކާތެރިކުރުމާއި، މާލީ ހޭލުންތެރިކަން އިތުރުކުރުމަށް ބާރުއަޅައި، އިންވެސްޓުކުރުމުގެ މުހިންމުކަން ފާހަގަކުރުމަށް ބައިނަލްއަގުވާމީ ގޮތުން ފާހަގަކުރާ ހަފުތާއެކެވެ.
