ރާއްޖެއާއި އިންޑިއާ ދެމެދު 5 އެއްބަސްވުމެއް އެކުލަވާލައިފިއެވެ. މި އެއްބަސްވުންތައް އެކުލަވާލާފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިހާރު އިންޑިއާއަށް ކުރައައްވަމުން ގެންދަވާ ދަތުރުފުޅުގައިއެވެ.
މި އެއްބަސްވުންތައް އެކުލަވާލުމުގެ ރަސްމިއްޔާތުގައި ރައީސް މުޢިއްޒު އަދި އިންޑިއާގެ ބޮޑުވަޒީރު ނަރެންދުރަ މޯދީގެ އިތުރުން ދެ ޤައުމުގެ އިސް ވެރިން ބައިވެރިވެ ވަޑައިގެންނެވިއެވެ.
ދިވެހިރާއްޖެއާއި އިންޑިއާއާ ދެމެދު ވެވުނު އެއްބަސްވުންތަކުގެ ތެރެއިން އެންމެ ފާހަގަކޮށްލެވޭ އެއް އެއްބަސްވުމަކީ ކަރަންސީ ސްވޮޕް އެގްރީމަންޓެވެ. މި އެއްބަސްވުން އެކުލަވާލެވިފައިވަނީ ދިވެހިރާއްޖޭގެ މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާއި އިންޑިއާގެ ރިޒަރވް ބޭންކާ ދެމެދުގައެވެ.
ކަރަންސީ ސްވަޕް އެއްބަސްވުމުގެ އިތުރުން، ދިވެހިރާއްޖޭގެ ނޭޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމަންޓާއި އިންޑިއާގެ ރާޝްތްރިޔާ ރަކްޝާ ޔުނިވަރސިޓީއާ ދެމެދު ވެވުނު އެއްބަސްވުމަކާއި، ދިވެހިރާއްޖޭގެ 200 ޖުޑީޝަލް އޮފިސަރުންނަށް ތަމްރީނު ޕްރޮގްރާމެއް ހިންގުމަށްޓަކައި، ޖުޑީޝަލް ސަރވިސް ކޮމިޝަނާއި ނޭޝަނަލް ޖުޑީޝަލް އެކަޑަމީއާ ދެމެދު ވެވުނު އެއްބަސްވުމެއްހިމެނެއެވެ.
މީގެ އިތުރުން، ކޮރަޕްޝަން މަދުކުރުމަށް ގުޅިގެން މަސައްކަތް ކުރުމަށް، އެންޓި ކޮރަޕްޝަން ކޮމިޝަނާއި ސެންޓްރަލް ބިއުރޯ އޮފް އިންވެސްޓިގޭޝަން އޮފް އިންޑިއާ ފޯ ބައިލެޓްރަލް އާ ދެމެދު އެކުލަވާލި އެއްބަސްވުމަކާއި އެކްސްޓެންޝަން އޮފް ދަ މެމޮރަމްޑަން އޮފް އަންޑަސްޓޭޏްޑިން ބިޓްވީން މޯލްޑިވްސް އެންޑް މިނިސްޓްރީ އޮފް ޔޫތު އެފެއާޒް އެންޑް ސްޕޯޓްސް އޮފް ދަ ރިޕަބްލިކް އޮފް އިންޑިއާ އޮން ކޯޕަރޭޝަން އިން ސްޕޯޓްސް އެންޑް ޔޫތު އެފެއާޒްވެސް މި 5 އެއްބަސްވުމުގެ ތެރޭގައި ހިމެނެއެވެ.
