މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ރިޒާވް ބޭންކް އޮފް އިންޑިއާ (އާރްބީއައި) އާއެކު 400 މިލިއަން އެމެރިކާ ޑޮލަރުގެ ބައިލެޓަރަލް ކަރަންސީ ސްވޮޕް އެއްބަސްވުމެއްގައި މިއަދު ސޮއިކޮށްފިއެވެ.
އެމްއެމްއޭ އިން މިއަދު ނެރުނު ނޫސްބަޔާނެއްގައި ބުނެފައިވާ ގޮތުގައި މި އެއްބަސްވުމުގައި ސޮއިކޮށްފައިވަނީ 7 އޮކްޓޫބަރު 2023 ގައެވެ. މި އެއްބަސްވުމުގެ ދަށުން އެމްއެމްއޭއަށް ދެ ކަރަންސީ ވިންޑޯއަކުން ސްވޮޕް ނެގުމުގެ ފުރުސަތު ލިބިގެންދާނެއެވެ. އެއީ އެމެރިކާ ޑޮލަރު/ޔޫރޯ އަދި އިންޑިއަން ރުޕީ ކަރަންސީ ވިންޑޯ މެދުވެރިކޮށެވެ.
'ފްރޭމްވަރކް އޮން ކަރަންސީ ސްވޮޕް އެރޭންޖްމަންޓް ފޯ ސާކް ކަންޓްރީސް 2024-2027' ގެ ދަށުން އެމްއެމްއޭއަށް 400 މިލިއަން އެމެރިކާ ޑޮލަރުގެ އިތުރުން 30 ބިލިއަން އިންޑިއަން ރުޕީސްގެ އަދަދާ ހަމައަށް އެކި ފަހަރު މަތިން ސްވޮޕް ނެގޭނެކަމަށް އެމްއެމްއޭ އިން މަޢުލޫމާތު ދީފައިވެއެވެ.
އެމްއެމްއޭ އިން ބުނެފައިވާ ގޮތުގައި ޑޮލަރު/ޔޫރޯ ސްވޮޕް ފެސިލިޓީއަކީ ކުރުމުއްދަތުގެ ފޮރިން އެކްސްޗޭންޖް ބޭނުންތަކަށް އެހީތެރިވާނެ ފިޔަވަޅެކެވެ. އަދި އިންޑިއަން ރުޕީސް ސްވޮޕް ފެސިލިޓީ މެދުވެރިކޮށް އިންޑިއާ އާއި ދިވެހިރާއްޖެއާ ދެމެދު ކުރެވޭ ވިޔަފާރީގެ މުއާމަލާތްތައް އެގައުމަކަށް ނިސްބަތްވާ ފައިސާއިން ކުރުމަށް މަގުފަހިވެގެންދާނެއެވެ.
މީގެ އިތުރުން މި އެއްބަސްވުމަކީ ދިވެހިރާއްޖެއާއި އިންި އިންޑިއާއާ ދެމެދު ކުރެވޭ ވިޔަފާރި އިތުރުވެ ހަރުދަނާވާނެ ކަމެއްކަމަށް އެމްއެމްއޭ އިން ފާހަގަކޮށްފައިވެއެވެ.
