ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު އިންޑިއާއަށް ކުރައްވަމުންގެންދަވާ ފުރަމާނަ ދަތުރުފުޅުގައި މީޑިޔާއަށް ބަޔާނެއް ދެއްވައިފިއެވެ.
ރާއްޖެ އާއި އިންޑިއާގެ އެތައް ގަރުނެއް ވެފައިވާ ގުޅުމަށް އިޝާރާތްކުރައްވަމުން، ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު، އެ މަނިކުފާނުގެ ބަޔާނުގައި ވަނީ، އެކި ދާއިރާތަކުން ދެއްވާ އެއްބާރުލުން އިތުރުކުރުމަށް ކުރައްވާ މަސައްކަތުގައި ސާބިތުވެ ހުންނެވިކަމަށް ވިދާޅުވެފައެވެ.
ރާއްޖޭގެ އިގްތިސާދީ އަދި އިޖުތިމާޢީ ތަރައްގީގައި އިންޑިއާއިން އަދާކުރާ މުހިންމު ދައުރަށް އަލިއަޅުއްވާލައްވަމުން ރައީސް ވަނީ، އިންޑިއާއިން ރާއްޖެއަށް ކެނޑިނޭޅި ދެއްވާ އެއްބާރުލެއްވުމާއި، ކުރައްވާ ތާއީދަށްޓަކައި ބޮޑުވަޒީރު މޯދީއަށް ނިހާޔަތަށް ޝުކުރުދަންނަވާފައެވެ.
ވަކިން ހާއްސަކޮށް، 400 މިލިޔަން ޑޮލަރުގެ ކަރަންސީ ސްވޮޕް އެއްބަސްވުމާއި، އިތުރު އެހީގެ ގޮތުގައި ދެއްވި 30 ބިލިޔަން އިންޑިއާ ރުޕީޒް އާއި، ޓީ-ބިލް ރޯލްއޯވަރގެ ގޮތުގައި ދެއްވި މާލީ އެހީތެރިކަމަށްޓަކައި ރައީސުލްޖުމްހޫރިއްޔާ ވަނީ ޝުކުރު އަދާކުރައްވާފައެވެ.
އަދި ރާއްޖެ އާއި އިންޑިއާ އާ ދެމެދު މިނިވަން ވިޔަފާރީގެ އެއްބަސްވުމެއް ގާއިމުކުރެވި، އެ އެއްބަސްވުމުގެ އެހީގައި ދެ ގައުމަށް ހުރި އިގުތިސާދީ ފުރުސަތުތަކުގެ ފުރިހަމަ ބޭނުން ހިފައި، ރާއްޖޭގެ ފަތުރުވެރިކަމާއި ތަރައްގީގެ އެކި ދާއިރާތަކަށް އިންޑިއާއިން ކުރާ އިންވެސްޓްމަންޓް އިތުރުކުރެވޭނޭކަމުގެ އުންމީދުކުރައްވާކަމަށްވެސް އެމަނިކުފާނު ވިދާޅުވިއެވެ.
އިންޑިއާ އަކީ ރާއްޖެއަށް އެންމެ ގިނަ ފަތުރުވެރިން އަންނަ އެއް ބާޒާރުކަމުގައި ވާ ހިނދު، އިންޑިއާއިން ފަތުރުވެރިން އަންނަ މިންވަރު އިތުރުކުރެވޭނޭކަމަށް އުންމީދުކުރައްވާކަމުގައިވެސް އެމަނިކުފާނު ވިދާޅުވިއެވެ.
މި ބަޔާނުގައި ރައީސުލްޖުމްހޫރިއްޔާ ވަނީ، "އަ ވިޜަން ފޯ ކޮމްޕްރިހެންސިވް އިކޮނޯމިކް އެންޑް މެރިޓައިމް ސެކިއުރިޓީ ޕާޓްނަރޝިޕް" ތަސައްވަރު ކަރުދާހުގެ މަސައްކަތާ ގުޅުންހުރި ބައެއް ތަފްސީލުތައްވެސް ދެއްވާފައެވެ. އެގޮތުން، މި ކަރުދާހަކީ، ތަރައްގީ އާއި، ވިޔަފާރި އާއި ޑިޖިޓަލް، ސިއްޙީ އަދި ސަލާމަތީ ދާއިރާގައި ގުޅުން ބަދަހިކޮށްދޭނޭ އާރުކާޓީއަކަށް ވާނޭކަމަށް އެމަނިކުފާނު ވިދާޅުވިއެވެ.
އަންނަ އަހަރަކީ ދިވެހިރާއްޖެ އާއި އިންޑިއާއާ ދެމެދު ހާރިޖީ ގުޅުން ގާއިމުކުރިތާ 60 އަހަރު ފުރޭ މުނާސަބާކަން ފާހަގަކުރައްވަމުން ރައީސް ވަނީ، އަންނަ އަހަރު ދިވެހިރާއްޖެ އަށް ފުރަމަނަ ދަތުރުފުޅެއް ކުރެއްވުމަށް، އިންޑިއާގެ ބޮޑުވަޒީރު ނަރެންދްރަ މޯދީއަށް ދައުވަތު އަރުވާފައެވެ.
ރައީސްގެ ބަޔާން ނިންމަވާލައްވާފައިވަނީ، އިންޑިއާ އާއި ރާއްޖެ އާ ދެމެދު އޮންނަ ބަދަހިކަމުގެ ސަބަބުން، ދެ ގައުމުގެ މުސްތަގުބަލު އުޖާލާކުރެވޭނާކަމަށް ޔަގީންކުރައްވާކަމަށް ވިދާޅުވަމުންނެވެ.
ރައީސް މިހާރު ކުރައްވަމުން ގެންދަވާ ދަތުރުފުޅަކީ އިންޑިއާގެ ރައީސް ދުރޫޕަދީ މުރްމޫގެ ދަޢުވަތަކަށް ކުރައްވާ ދަތުރުފުޅެކެވެ. މި ދަތުރުފުޅުގައި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދާއި، މަތީ ފަންތީގެ ވަފުދެއް ބައިވެރިވެވަޑައިގަންނަވެއެވެ.
