ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިންޑިއާ ދަތުރުފުޅާއެކު އެ ޤައުމުން ފޯރުކޮށްދެއްވި އެހީތެރިކަމަކީ ދިވެހިރާއްޖޭގެ އިޤްތިޞާދު މިވަގުތު ކުރިމަތިލަމުންދާ ގޮންޖެހުންތަކަށް ވަރަށް ބޮޑު ލުޔެއް ކަމުގައި ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވެއްޖެއެވެ.

ރައީސް މުޢިއްޒު މިހާރު ކުރައްވަމުންގެންދަވާ އިންޑިއާގެ ރަސްމީ ދަތުރުފުޅުގެ ތެރޭގައި، އިއްޔެ ވަނީ ދެ ޤައުމުގެ މެދުގައި 400 މިލިއަން އެމެރިކާ ޑޮލަރުގެ ކަރަންސީ ސްވޮޕް ފެސިލިޓީއެއް ޤާއިމުކުރުމުގެ އެއްބަސްވުމެއްގައި ސޮއިކުރެވިފައެވެ. މީގެ އިތުރުން، 30 ބިލިއަން އިންޑިއަން ރުޕީސްގެ އަދަދާ ހަމައަށް އެކި ފަހަރު މަތިން ސްވޮޕް ނެގުމުގެ ފުރުޞަތު ވެސް ލިބިގެންދާނެއެވެ.

ވަޒީރު ވިދާޅުވި ގޮތުގައި، އިންޑިއާގެ އިންސްޓެންޓް ޕޭމަންޓް ސިސްޓަމް ކަމުގައިވާ ޔުނިފައިޑް ޕޭމެންޓްސް އިންޓަފޭސް (ޔޫޕީއައި) ގެ ދަށުން ރުޕޭ ކާޑު އިއްޔެ ރާއްޖޭގައި ތަޢާރަފުކުރުމާއި ދެ ޤައުމުގެ މެދުގައި މިނިވަން ވިޔަފާރީގެ އެއްބަސްވުމެއްގައި ސޮއިކުރުމަށް އެއްބަސްވެވުނުކަމީީ ވެސް ފާހަގަކޮށްލެވޭ ކުރިއެރުމެކެވެ. ވަޒީރު އިތުރަށް ވިދާޅުވީ، މި ދަތި އުނދަގޫ ދަނޑިވަޅުގައި މިއީ ދިވެހި ރައްޔިތުންނަށާއި ޤައުމުގެ އިޤްތިޞާދަށް ލިބިގެންދާނެ ތަނަވަސްކަމެއް ކަމުގައެވެ.

ވަޒީރު އިންޑިއާއަށް ތަޢުރީފުކުރައްވަމުން ވިދާޅުވީ، އިންޑިއާއަކީ އަބަދުވެސް ދިވެހިރާއްޖެއަށް ވަރަށް ގާތުން އެހީތެރިވަމުން އަންނަ ޤައުމެއް ކަމަށާއި ދިވެހިންނަށް ދިމާވާ އެކިއެކި ގޮންޖެހުންތަކުގައި އެންމެ ކައިރިން އެހީތެރިވެދޭ ޤައުމުތަކުގެ ތެރޭގައި އިންޑިއާ ހިމެނޭކަމަށެވެ. މީގެއިތުރުން، މިނިސްޓަރު ހަލީލް ވިދާޅުވީ، ދެ ޤައުމުގެ ދެމެދުގައި "ވިޝަން ޑޮކިއުމަންޓެއް" އެކުލަވާލެވިފައިވާ ކަމަށާއި، މި ލިޔުމުގައި ދިވެހި ރައްޔިތުންނަށް ވަރަށް ބޮޑަށް މަންފާކުރާނެ ކަންތައްތަކެއް ހިމެނިފައިވާ ކަމުގެ ޔަޤީންކަން ދެއްވިއެވެ.

ރައީސް މުޢިއްޒުގެ އާދިއްތަ ދުވަހު ފެއްޓެވި މިދަތުރުފުޅުގައި އިއްޔެ ވަނީ އިންޑިއާގެ ބޮޑުވަޒީރު ނަރެންދުރަ މޯދީއާ ބައްދަލުކުރައްވައިފައެވެ. ރައީސް މިއަދު މުމްބާއީއަށް ފުރާ ވަޑައިގެންނެވުމަށް ވަނީ ހަމަޖެހިފައިއެވެ. އަދި އެއަށްފަހު ބެންގަލޫރަށް ދަތުރު ކުރައްވާނެއެވެ. މުމްބާއީ އަދި ބެންގަލޫރަށް ކުރައްވާ ދަތުރުފުޅުތަކުގެ މައިގަނޑު މަޤްޞަދަކީ، ދިވެހިރާއްޖޭގައި ހުރި އިންވެސްޓްމަންޓް އަދި ވިޔަފާރީގެ ފުރުޞަތުތަކާ ބެހޭ މަޢުލޫމާތު، އިންޑިއާގެ އިންވެސްޓަރުންނާއި ވިޔަފާރިވެރިންނަށް ހިއްސާކުރުމެވެ.

އިތުރު ލިޔުންތައް އިންޑިއާ-ދިވެހިރާއްޖެ މިނިސްޓަރީ އޮފް ފޮރިން އެފެއާޒް