ބައިނަލްއަޤްވާމީ ގެވެށި މަސައްކަތްތެރިންގެ ދުވަހާއި ދުނިޔޭގެ އަންހެން ވިޔަފާރިވެރިންގެ ދުވަސް ފާހަގަކުރުމަށް ކުޅުދުއްފުށި ސިޓީގައި އަންހެން ކަނބަލުންނަށް އަމާޒުކޮށްގެން ބާއްވާ ޙާއްސަ މައުރަޒުގައި ބައިވެރިވުމުގެ ފުރުސަތު ހުޅުވާލައިފިއެވެ.
ބިޒްނަސް ސެންޓަރ ކޯޕަރޭޝަން (ބީސީސީ) އާއި ކުޅުދުއްފުށި ސިޓީ ކައުންސިލުން ގުޅިގެން ކުރިއަށް ގެންދާ މި މައުރަޒު ބޭއްވުމަށް ހަމަޖެހިފައިވަނީ ނޮވެންބަރު މަހުގެ 29 ވަނަ ދުވަހާއި 30 ވަނަ ދުވަހުއެވެ. މި މައުރަޒަކީ 16 އަހަރުން މަތީގެ އަންހެން ކަނބަލުންނަށް އަމާޒުކޮށްގެން ކުރިއަށް ގެންދާ މައުރަޒެކެވެ.
މި މައުރަޒުގައި, ވިއްކުމަށާއި އިންސާފު ކުރުމަށް ޓަކައި އަމިއްލަ އުފެންދުންތައް ބޭނުންކުރެވޭނެއެވެ. އިންސާފު ކުރުމަށް ހުށައަޅާ ތަކެތީގެ ކެޓަގަރީތަކަކީ:
- ގިނަ ދުވަހު ބެހެއްޓޭ/ ބަންދުކޮށްފައިވާ ތައްޔާރީ ކާނާ
- ފެހުމުގެ ބާވަތްތައް/ ފޮތިން ތައްޔާރުކޮށްފައިވާ ތަކެތި
- ކޭކު/ ޕޭސްޓްރީސް
- އަތްތެރި މަސައްކަތުގެ އެހެނިހެން ބާވަތްތައް
- ގޭތެރެ ޒީނަތްތެރިކުރުމަށް ބޭނުންކުރާ ތަކެތި
ނޮވެންބަރު މަހު ބާއްވާ މި މައުރަޒުގައި ބައިވެރިވެލެއްވުމަށް ޓަކައި ފުރިހަމަ ނަން, އައިޑީ ކާޑު ނަންބަރު, އަތޮޅާއި ރަށް, މޯބައިލް ނަންބަރު ޖެއްސެވުމަށް ފަހު 7917089 އަށް އެސްއެމްއެސް ކުރެއްވުމަށް މައުރަޒު އިންތިޒާމް ކުރާ ފަރާތްތަކުން ވަނީ އެދިފައެވެ. މައުރަޒުގައި ބައިވެރިވުމުގެ ސުންގަޑިއަކީ 30 އޮކްޓޯބަރު ވާ ދުވަހެވެ.
