އިޓަލީގެ ކްލަބެއް ކަމުގައިވާ ކޯމޯއަށް ކުޅެމުން އަންނަ މާކޯ ކާޓޯ, ދެކުނު ކޮރެއާއަށް ނިސްބަތްވާ ވޮލްވްސްގެ ފޯވާޑް ހުވަންގް ހީ ޗެންއަށް ނަސްލީ މަލާމާތް ކުރި ކަމުގެ ތުހުމަތުގައި 10 މެޗަށް ސަސްޕެންޑް ކޮށްފިއެވެ.
ލޯނު އެއްބަސްވުމެއްގެ ދަށުން ކޯމޯ ދޫކޮށް, ސެސީނާއަށް ކުޅެމުން އަންނަ މާކޯ 10 މެޗަށް ސަސްޕެންޑް ކުރުމަށް ނިންމާފައިވާ ކަން ފީފާއިން ވަނީ ޔަގީން ކޮށްދީފައެވެ. މި ސަސްޕެންޝަނުގެ އިތުރުން މާކޯއަށް ވަނީ ކޮމިއުނިޓީ ސަރވިސް ކުރުމުގެ އިތުރުން ފީފާގެ ބެލުމުގެ ދަށުން މައުލޫމާތު ދިނުމުގެ ސެޝަންތަކަށް ދިއުމަށް އަމުރުކޮށްފައެވެ.
ފީފާގެ މި ނިންމުމަށް މަރުހަބާ ކިޔަމުން އިނގިރޭސި ޕްރިމިއާ ލީގުގައި ކުޅެމުން އަންނަ ވޮލްވްސްގެ މެޓް ވައިލްޑް ބުނި ގޮތުގައި ފީފާގެ މި ނިންމުމަކީ އެ މައްސަލައަށް އެކަށީގެންވާ އަދަބެއް ކަމަށް ދެކޭ ކަމަށާއި, އެ ނިންމުމާ މެދު ވޮލްވްސްއިން ހިތްހަމަޖެހޭ ކަމަށެވެ.
"މާކޯ ކާޓޯ 10 މެޗަށް ސަސްޕެންޑް ކުރަބް ފީފާއިން ނިންމި ނިންމުމަށް ވޮލްވްސްއިން މަރުހަބާ ކިޔަން. މި ފަދަ އަދަބުތަކަކީ މި ކަހަލަ ހަޑިހުތުރު އަމަލުތައް ފުޓުބޯޅައިގައި މަދު ކޮށްދޭނެ ކަމެއް. ވޮލްވްސްއިން އަބަދު ވެސް ތިބޭނީ ނަސްލީ ތަފާތު ކުރުމާ ދެކޮޅަށް" މެޓް ވައިލްޑް ބުންޏެވެ.
ނަސްލީ ތަފާތު ކުރުމުގެ މައްސަލަތަކަކީ ފަހަކަށް އައިސް ފުޓުބޯޅައިގައި ވަރަށް ގިނަވެފައިވާ މައްސަލައެކެވެ. މި މައްސަލައަށް ހައްލެއް ހޯދައިދިނުމަށް ފުޓުބޯޅަ ކުޅުންތެރިން ގޮވާލަމުން އަންނައިރު ފީފާއިން ވަނީ ދާދި ފަހުން "ގްލޯބަލް ސްޓޭންޑް އެގެއިންސްޓް ރޭސިޒްމް" ގެ ނަމުގައި ނަސްލީ ތަފާތާ ދެކޮޅަށް ކެމްޕޭނެއް ފަށާފައެވެ. މި ކެމްޕޭނުގެ ދަށުން ފުޓުބޯޅައިގައި ދިމާވާ ނަސްލީ ތަފާތުގެ މައްސަލަތަކަށްދޭ އަދަބުތައް ހަރުކަށިކޮށް, އެ ފަދަ ތަފާތު ކުރުންތައް ނައްތާލުމަށް ކުރެވޭ މަސައްކަތް އިތުރު ވެގެންދާނެ ކަމުގެ ޔަގީންކަން ފީފާއިން ދެއެވެ.
