ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު، އިންޑިއާގެ އާގްރާގައި ހުންނަ ދުނިޔޭގެ ހަތް އަޖައިބުގެ ތެރޭގައި ހިމެނޭ ތާރީޚީ އަދި މަޝްހޫރު ތާޖް މަހަލަށް ޒިޔާރަތްކުރައްވައިފިއެވެ.
ރައީސް އަދި އެމަނިކުފާނުގެ އަނބިކަނބަލުން މި ތާރީޚީ ބިނާއަށް ޒިޔާރަތްކުރެއްވީ، އިންޑިއާގެ ރައީސް ދުރޫޕަތީ މުރުމޫގެ ދަޢުވަތަކަށް އެ ޤައުމަށް ކުރައްވަމުންގެންދަވާ ރަސްމީ ދަތުރުފުޅުގެ ތެރެއިން މިއަދު ހެނދުނުއެވެ. ދެ ބޭފުޅުން ވަނީ ތާޖް މަހަލްއަށް ވަޑައިގެން އެތަން ބައްލަވާލައްވާފައެވެ.
ތާޖް މަހަލަކީ އިންޑިއާގެ އާގްރާގައި 17 ވަނަ ޤަރުނުގައި ބިނާކުރެވުނު ތާރީޚީ އަދި ސަޤާފީ ގޮތުން މުހިންމު ޢިމާރާތެކެވެ. މި މަޝްހޫރު ބިނާ ޢިމާރާތްކުރެއްވީ މޫގަލް އެމްޕަރަރ ޝާހް ޖަހާން، އެމަނިކުފާނުގެ ލޮބުވެތި އަނބިކަނބަލުން މުމްތާޒް މަހަލްގެ ހަނދާނުގައެވެ. އެކްސެޕްޝަނަލް ޔުނިވާސަލް ވެލިއު ހުރި ތަނެއްގެ ގޮތުގައި ޔުނެސްކޯއިން ވަނީ ތާޖް މަހަލް ވޯލްޑް ހެރިޓޭޖް ސައިޓެއްގެ ގޮތުގައި ކަނޑައަޅުއްވާފައެވެ.
މީގެ އިތުރުން، މި ޢިމާރާތަކީ ދުނިޔޭގެ އެންމެ މަޤުބޫލު ފަތުރުވެރިކަމުގެ މަންޒިލުތަކުގެ ތެރެއިން އެއް މަންޒިލެވެ.
