ސްޕެއިންގެ ތަޖުރިބާކާރު މިޑްފީލްޑަރު އަންޑްރޭސް އިނިއެސްޓާ, ފުޓުބޯޅައިން އޭނާ ރިޓަޔާވާން އުޅޭ ކަމުގެ އިޝާރާތެއް ދައްކާލައިފިއެވެ.
އިނިއެސްޓާ ވަނީ, އޭނާގެ ސޯޝަލް މީޑިއާ ޗެނަލްސްތަކަށް ފުޓުބޯޅަ އާއި އޭނާގެ ކެރިއަރާ ބެހޭ ގޮތުން ވާހަކަދައްކާ ވީޑިއޯއެއް އާއްމުކޮށްފައެވެ. "އެލް ޖުއޭގޯ ކޮންޓިނިއުއާ" މިހެން ކެޕްޝަން ކޮށްފައި އިން މި ވީޑިއޯގައި 40 އަހަރުގެ އިނިއެސްޓާއަށް ކޯޗުކޮށްދިން ބައެއް ފަރާތްތަކުން ވަނީ އޭނާގެ ކާމިޔާބުން ފުރިގެންވާ ކެރިއަރާ ބެހޭ ގޮތުން ވާހަކަދައްކާފައެވެ.
އިނިއެސްޓާ މި ވަގުތު ކުޅެމުން އަންނަނީ ޔޫއޭއީގެ ކްލަބެއް ކަމުގައިވާ އެމިރޭޓްސް ކްލަބުގައެވެ. މި ސީޒަންގެ ނިޔަލަށް އޭނާގެ ކޮންޓްރެކްޓް ހަމަވާނެ ކަމުގައިވިއަސް އިތުރު އަހަރަކަށް ކޮންޓްރެކްޓް ދިގު ކުރުމުގެ ފުރުސަތު އޭނާއަށް އެބަ އޮތެވެ. ނަމަވެސް ހިތާމަވެރި ރާގަކަށް އޭނާގެ ކެރިއަރުގެ އުސްއަލިތައް ހިއްސާކުރި މި ވީޑިއޯއަކީ, އިތުރު އަހަރަކަށް ކޮންޓްރެކްޓް ދިގުނުކޮށް, ސީޒަން ނިމުމުން ފުޓުބޯޅައަށް އަލްވަދާއު ކިޔާނެ ކަމުގެ އިޝާރާތެއް ކަމަށް މީޑިއާތަކުން އަންނަނީ ލަފާ ކުރަމުންނެވެ.
އަންޑްރޭސް އިނިއެސްޓާ އޭނާގެ ކެރިއަރު ފެށީ 2002 ވަނަ އަހަރު ބާސެލޯނާގައެވެ. 2002 ވަނަ އަހަރުން ފެށިގެން 2018 ވަނަ އަހަރާ ހަމައަށް އޭނާ އެ ކްލަބުގައި ހޭދަކުރި 16 އަހަރު ތެރޭގައި ދެއްކި ހުނަރުވެރިކަމުން އޭނާ ވަނީ ފުޓުބޯޅަ ތާރީހުގައި ރަން އަކުރުން ނަން ފަވާލާފައެވެ.
އިނިއެސްޓާގެ ކާމިޔާބުން ފުރިގެންވާ ކެރިއަރު ނިމުމަކާ ހަމައަށް އަންނައިރު އޭނާ ވަނީ ޖުމްލަ 38 ތަށި ކާމިޔާބު ކޮށްފައެވެ. އޭގެ ތެރެއިން އެންމެ ފާހަގަކޮށްލެވެނީ 2010 ވަނަ އަހަރު ކާމިޔާބު ކުރި ވޯލްޑް ކަޕެވެ. އެ އަހަރު ސްޕެއިންއަށް ވޯލްޑް ކަޕު ކާމިޔާބު ކޮށްދިން ލަނޑު ޖަހައިދިން ކުޅުންތެރިޔާއަކީ އިނިއެސްޓާކަން ފާހަގަ ކޮށްލަން ޖެހެއެވެ.
އިނިއެސްޓާގެ ކެރިއަރުގެ ފުރިހަމަކަން ރަމްޒުކޮށްދޭ ކަމަކީ އޭނާއަކީ ފުޓުބޯޅައިގެ ތާރީހުގައި ހަތަރުވަނައަށް އެންމެ ގިނަ ތަށި ކާމިޔާބު ކޮށްފައިވާ ކުޅުންތެރިޔާކަމެވެ.
