ދިވެހި ފުލުހުންގެ ޚިދުމަތުން މާލޭގެ މާރުކޭޓު ސަރަހައްދާއި ނޯތު ހާބަރުގައި މަޢުލޫމާތު ދިނުމުގެ ޚާއްޞަ ހަރަކާތެއް ކުރިއަށް ގެންގޮސްފިއެވެ.
މި ހަރަކާތުގެ މަޤްޞަދަކީ އެ ސަރަހައްދުގައި މަސައްކަތްކުރާ އަދި އުޅޭ ފަރާތްތަކަށް އެކި ބާވަތުގެ ކުށްތަކުން ރައްކާތެރިވުމަށް ބޭނުންވާ މަޢުލޫމާތު ފޯރުކޮށްދިނުމެވެ. ފުލުހުންގެ ޕަބްލިކް ޓްރަސްޓް އެންޑް ކޮންފިޑެންސް މެނޭޖްމަންޓުން ހިންގި މި ހަރަކާތުގައި، މާރުކޭޓު ގޮޅިތަކާއި ފިހާރަތަކުގައި މަސައްކަތްކުރާ މީހުންނާއި، ވިޔަފާރިވެރިން، އޮޑިދޯނިފަހަރުގެ މީހުން އަދި އާންމު ރައްޔިތުންނާ ބައްދަލުކޮށް މުހިންމު މަޢުލޫމާތުތަކެއް ހިއްސާކުރެވުނެވެ.
ހަރަކާތުގައި ބައިވެރިވި ފަރާތްތަކަށް މަކަރާއި ހީލަތުން ފައިސާއިސާއާއި މުދާ ހޯދުމުގެ މައްސަލަތަކުން ރައްކާތެރިވާނެ ގޮތްތަކާއި، އޮންލައިން ވިޔަފާރީގައި ސަމާލުވާންޖެހޭ ކަންކަމުގެ މަޢުލޫމާތު ދެވުނެވެ. އަދި ކޭޝްކާޑާއި އޯޓީޕީ ކޯޑު ފަދަ މުހިންމު މަޢުލޫމާތު އެހެން ފަރާތްތަކާ ހިއްސާނުކުރުމަށް އިރުޝާދު ދެވުނެވެ.
މީގެ އިތުރުން، އޮޑިދޯނިފަހަރާއި ފިހާރަތަކުން ވައްކަންކުރުމުގެ މައްސަލަތަކުން ރައްކާތެރިވުމަށާއި، ވިޔަފާރި ބަންދުކޮށްފައި ދާއިރު މުދަލުގެ ރައްކާތެރިކަން ކަށަވަރުކުރުމަށް އަޅަންޖެހޭ ފިޔަވަޅުތަކުގެ މަޢުލޫމާތު ދެވުނެވެ. އޮޑިދޯނިފަހަރަށް މުދާ އަރުވައި ބޭލުމުގައި ސަމާލުކަންދޭންޖެހޭ ކަންކަމާއި، ނުއަގުގައި ވިއްކާ ތަކެތި ނުގަތުމަށްވެސް އިރުޝާދު ދެވުނެވެ.
މި ހަރަކާތަކީ މާރުކޭޓު ސަރަހައްދުގައި އުޅޭ ފަރާތްތަކުގެ ސަލާމަތާއި ރައްކާތެރިކަން އިތުރުކޮށް، ކުށްކުރުން މަދުކުރުމަށް ފުލުހުން ކުރަމުންދާ މަސައްކަތުގެ ބައެއްކަމަށް ފުލުހުން ވިދާޅުވިއެވެ.
