ވޯލްޑް ބޮޑީބިލްޑިންގް އެންޑް ފިޒީކް ސްޕޯޓްސް (ޑަބްލިއުބީޕީއެފް) ޗެމްޕިއަންޝިޕް ނޮވެންބަރު މަހުގެ 5 ވަނަ ދުވަހު ރާއްޖޭގެ ކެނެރީފް ރިސޯޓުގައި ބޭއްވުމަށް ތާވަލު ކޮށްފިއެވެ.
ނޮވެންބަރު މަހު 5 ވަނަ ދުވަހުން ފެށިގެން 11 ވަނަ ދުވަހަށް ކުރިއަށް ގެންދާ މި އިވެންޓަކީ ރާއްޖޭގައި މިހާތަނަށް ބާއްވާ އެންމެ ބޮޑު އެއް ކުޅިވަރު އިވެންޓެވެ.
މި ކަން ފާހަގަކުރައްވާ, އިވެންޓުގެ ފެށުމުގެ ރަސްމިއްޔާތުގައި ރާއްޖޭގެ ބޮޑީބިލްޑިންގް އެސޯސިއޭޝަނުގެ ރައީސް އިބްރާހީމް ހަމީދު ވިދާޅުވި ގޮތުގައި މި އިވެންޓު އޮންނަ ދުވަސް ވެގެންދާނީ ރާއްޖޭގެ ތާރީހުގައި ނަން ފެވިގެންދާނެ ދުވަހެއް ކަމުގައެވެ.
"ނޮވެންބަރު މަހުގެ 5 ވަނަ ދުވަހަކީ ރާއްޖޭގެ ކުޅިވަރު ތާރީހުގައި ރަން އަކުރުން ފަވާލެވޭނެ ދުވަހެއް. ރާއްޖޭގައި މިހާތަނަށް ބޭއްވި އެންމެ ބޮޑު ކުޅިވަރުގެ އިވެންޓު ބޭއްވި ދުވަސް ގޮތުގައި އެ ދުވަސް ފާހަގަކުރެވިގެންދާނެ" ގަލޮޅު ދަނޑުގެ ވީއައިޕީ ހޯލުގައި ބޭއްވި ފެށުމުގެ ރަސްމިއްޔާތުގައި ވާހަކަދައްކަމުން ހަމީދު ބުންޏެވެ.
55 ގައުމަކުން 500 އާ ގާތްކުރާ އަދަދަކަށް އެތުލީޓުން ބައިވެރިވާ މި އިވެންޓަކީ ބައިނަލްއަގްވާމީ ފެންވަރުގައި ކުރިއަށް ގެންދާ މުބާރާތެކެވެ. ރާއްޖެއިން ވަނީ މީގެ ކުރިން ވެސް ބޮޑީބިލްޑިންގްގެ ބައެއް ބައިނަލްއަގްވާމީ މުބާރާތްތައް ހޯސްޓު ކޮށްފައެވެ. އޭގެ ތެރޭގައި ފާހަގަކޮށްލެވެނީ 2022 ވަނަ އަހަރުގެ އޭޝިއަން ބޮޑީ ބިލްޑިންގް ޗެމްޕިއަންޝިޕް އާއި ސައުތު އޭޝިއަން ބޮޑީބިލްޑިންގެ ޗެމްޕިއަންޝިޕްއެވެ. މި ފަހަރުގެ ވޯލްޑް ބޮޑީ ބިލްޑިންގެ ޗެމްޕިއަންޝިޕް ހޯސްޓު ކުރުމުގެ ފުރުސަތު ރާއްޖެއަށް ލިބުނީ, މި ދެ މުބާރާތް އިންތިޒާމް ކުރުމުގައި ރާއްޖެ ދެއްކި ނަމޫނާއިންނެވެ.
